JUECES 16

Gaza pueblopi Sansón cashcamanta

1Shuc punzhami Sansonca Gaza puebloman rishpa, cullquimanta huainayashpa causac huarmita ricushpa paihuan tandarirca. 2Gaza pueblopi causaccunamanca: «Sansonca cai pueblomanmi shamushca» nishpami parlarcacuna. Chaimantami pueblota muyushpa chai pueblo pungupi chapashpa pacarircacuna. Chashna tuta upalla chapacushpami: «Tutamanta achicyamucpimi huañuchishun» nircacuna. 3Shina cacpipish Sansonca chaupi tutacamanllami chaipi carca. Chai pacha jatarishpami chai pueblo pungucunataca ishcai caspicunandi, aldabacunandi llucchirca. Chashna llucchishpaca hombros jahuapi churashpami Hebrón chimbapurapi tiyac urcuman rirca.

Dalila Sansonta huatashpa cushcamanta

4Chai quipaca Sansonca Sorec pambapi causac Dalilatami cuyarca. 5Chai huarmipacman filisteocunata pushaccuna rishpaca:

—Sansontaca ima shinapish inquitashpa, ima shina yalli fuerzata charishcata, ima shina paita mishanata tapui. Chaita yachashpami, paitaca alli huatashpa mandashpa charichun. Canmanca ñucanchicca cada shucmi huaranga shuc patsac cullquita cushun— nircacuna.

6Chaimantami Dalila Sansontaca:

—¿Ima shinatac canca yalli fuerzata charingui? ¿Ima shina huatashpatac cantaca ati pudinchic?— nirca.

7Shina nicpimi Sansonca:

—Ñucaca manarac chaquishca canchis anguhuan huatacpimi, mana fuerzata charishpa irquiyashpa shuctac runacuna shina saquirisha— nirca.

8Shina nicpimi, filisteocunata pushaccunaca, canchis manarac chaquishca angucunata Dalilaman curca. Chaimantami paica Sansonta huatarca. 9Chai huarmica tauca runacunatami chai ucupi pacashpa charicurca. Chashna charicushpami paica:

—¡Sansón, filisteocunaca canta japigricunca!— nishpa caparirca.

Shina caparicpimi Sansonca paita huatashca angucunataca nina puchcata rupachic shina pitirca. Filisteocunaca Sansón ima shina yalli fuerzata charishcata mana yacharcacunachu. 10Chaimantami Dalilaca:

—Canca, llullashpami ñucata burlashcangui. Cunanca canta ima shina huatanata huillaiyari— nirca.

11Shina nicpimi Sansonca:

—Manapish ucupashca mushuc huascahuan sinchita huatacpica, irquiyashpa shuctac runacuna shinami casha— nirca.

12Shina nicpimi Dalilaca, mushuc huascata japishpami huatarca. Chashna huatashpaca:

—¡Sansón, filisteocunaca canta japigricunca!— nishpa caparirca.

Shina caparicpi, Sansonca paipac rigrapi huatashca huascataca puchcata shinami pitirca. 13Chashna piticpimi Dalilaca Sansontaca:

—Cunancamanmi canca llullashpa ñucata burlashcangui. Canta ima shina huatanata huillaiyari— nirca.

Shina nicpimi Sansonca:

—Ñuca acchata telar ñacchahuan canchis jimbata ruhuashpa telar ishtacahuan pirca cuchupi huatacpica, irquiyashpa shuctac runacuna shinami casha— nirca.

Shina nicpimi, Dalila huarmica Sansonta sueñuchishpa telar ñacchahuan canchis jimbata ruhuarca. 14Quipaca telar ishtacahuan huatashpami:

—¡Sansón, filisteocunaca canta japigricunca!— nishpa caparirca.

Shina caparicpimi Sansón riccharishpa, telar ishtacataca ahuashca pañondi llucchishpa jatarirca. 15Shina ruhuacpi Dalilaca:

—¿Manapish ñucapi shunguta churashpaca ima shinatac cantaca cuyanimi ningui? Caihuanca ña quimsa cutinmi ñucata burlashpa can ima shina yallita fuerzata charishcataca mana huillashcangui— nirca.

16Punzhanta chashna tapucucllapimi Sansonca, yallita shungupi nanarishpa huañunalla tucurca. 17Chaimantami Sansonca ima shina yalli fuerzata charishcata huillashpaca:

—Ñucaca, mamapac huicsamanta pachami Diospaclla chicanyachishca nazareo cani. Chaimanta ñuca acchataca jaicapi navajahuan mana pitircanichu. Ñuca uma acchata pitichishpaca irquiyashpa fuerzata chingachishpami shuctac runacuna shina casha— nirca.

18Sansón mana llullashpa tucui shungumanta huillashcata yachashpami, Dalilaca filisteocunata pushaccunata cayachun cachashpaca: «Pai ima shina yalli fuerzata charishcata, shungupi pacashcataca yachanimi» nichun cacharca. Chashna cayacpimi filisteocunaca cullquita apashpa chai huarmipacman rirca.

19Dalilaca Sansonta changapi sueñuchishpami shuc runata cayashpa chai canchis accha jimbata pitichirca. Shina piticpi, Sansón fuerza illac tucucpimi, paitaca llaquichi callarirca.

20Chaimantami Dalilaca:

«¡Sansón, filisteocunaca canta japigricunca!» nishpa caparirca.

Sansón riccharishpaca: «Cutinllatac atishami» yuyashpa jatarirca.

Ashtahuanpish paica Mandac Dios paimanta anchurishcataca mana yacharcachu. 21Filisteocuna paita japishpaca ñahuita surcushpami Gaza puebloman aparca. Chaipimi bronce cadenacunahuan huatashpa carcelpi tiyac molinopi cutachun churarca. 22Shina cacpipish pitishca acchaca cutinmi huiñai callarirca.

Sansón huañushcamanta

23Filisteocunaca Sansonta japishcamanta cushicushpami paicunapac Dagón diosman animalcunata cushpa rupachingapac tandanacurcacuna. Chaipica:

«¡Ñucanchic diosca ñucanchicta

piñac Sansontami ñucanchic

maquipi churashca!» nircacuna.

24Chaita tucui gentecuna ricushpami, paicunapac diosta alli nishpaca:

«¡Ñucanchic diosmi

ñucanchicta piñac,

ñucanchic llactata

llaquichicta ñucanchic

maquipi churashca.

Paimi ñucanchicpura

gentecunataca yallita

huañuchirca!» nircacuna.

25Paicunaca tucui shunguhuan cushilla cashpami:

—Sansonta burlashpa asingapac llucchimugrichic— nircacuna.

Sansonta burlashpa asingapacmi, carcelmanta llucchishpa, jatun huasi ishcai pilar chaupipi shayachircacuna. 26Chaipimi Sansonca maquimanta aisashpa shamuc huambrataca:

—Huasita charicuc ishcai pilarcunapi taunallingapac ñuca maquita chayachi— nirca.

27Chai jatun huasipica caricunapish, huarmicunapish, jundami carca. Shinallatac filisteocunata pushaccunapish, tucuimi chaipi tiyacurca. Huasi jahuapica quimsa huaranga gentecunami Sansonta burlashpa asicurca. 28Chaipimi Sansonca Mandac Diostaca:

—¡Mandac Dioslla, ñucata yuyariyari! Filisteocuna ñuca ñahuicunata llucchishcamanta paicunatapish tucuchingapac cutinllatac ñucaman fuerzata cuiyari— nishpa mañarca.

29Shina mañashpaca chai jatun huasita charicuc ishcai pilarcunapi, alli maquihuanca shuc lado pilarpi lluqui maquihuanca caishuc lado pilarpi taunallishpami, 30Sansonca:

—Filisteocunahuanmi huañugrini— nirca.

Shina nishpami chai jatun huasita sinchita tangashpaca pushaccunapac tucui gentecunapac jahuapi urmachirca. Chai shina urmachishpami Sansonca paipac tucui causaipi huañuchishcata yalli huañuchirca.

31Chashna paipish huañucpimi huauquicunapish, paipac taitapac huasi ucupurapish shamushpa aparcacuna. Shina apashpaca Zora pueblo, Estaol pueblo chaupipi paipac taita Manoata enterrashca ladollapitacmi enterrarcacuna. Sansonca ishcai chunga huatatami israelcunata mandarca.

Currently Selected:

JUECES 16: QCA10

Highlight

Copy