GÉNESIS 34
34
Dina solterata japirishpa llaquichishcamanta
1Lea huarmipi Jacobo charishca Dina solterami chai llactapi causac solteracunata ricungapac rirca. 2Chashna ricpimi, chai llactata mandac heveocunapuramanta Hamorpac churi Siquemca chai solterata ricushpa, japirishpa llaquichirca. 3Chai mosoca Jacobopac ushi Dinata tucui almahuan cuyashpami, pai rimashcacunahuan Dinapac shungupi yaicurca. 4Chaimantami Siquemca paipac taita Hamortaca:
—Cai solterahuan cazarachi— nirca.
5Jacoboca paipac ushi Dinata Siquem moso japirishpa llaquichishcata yacharcami. Shina yachashpapish paipac churicuna michina pambapi animalcunata cuidacucpimi, paicuna shamungacaman mana huillarca. 6Chashna cacpimi, Siquempac taita Hamorca Jacobohuan parlangapac rirca.
7Jacobopac churicuna michina pambamanta cutishpa, paicunapac pani Dina ima tucushcata yachashpaca yallitami llaquirirca. Israelcunapurapica Siquem Dinata japirishpa llaquichishcaca jatun pingaimi carca. Pipish mana ruhuashcatami ruhuashca carca. Chaimantami Jacobopac churicunaca yallita piñarirca. 8Hamor paicunahuan parlashpaca:
—Ñuca churi Siquemca cancunapac panipac shunguman yaicushcami. Chaimanta ñuca churihuan cazarachun cuichic. 9Ñucanchicpish cancunapac ushicunahuan, cutin cancunapish ñucanchic ushicunahuan cazarashpa, familiapura tucushun. 10Allpaca cancunapac maquipimi. Chaimanta ñucanchic-huan causangapac caipi saquirichic. Imatapish randishpa, catushpa cai allpapi causaichiclla— nirca.
11Siquempish Dinapac taitata, turicunataca:
—Cancunapac ñahuipi ñuca alli ricuricpica, cancuna imata mañashcatami cusha. 12Shuc huarmimanta cuna cashcamanta ashtahuan yallitapish cushallami, ima caranatapish cushallami, Dinataca ñucahuan cazarachun cuichicyari— nishpa mañarca.
13Shina nicpipish, Siquem moso Dinata japirishpa llaquichishcamantaca paitapish, paipac taitatapish Jacobopac churicuna umashpaca:
14—Mana circuncisionta ruhuashca runamanca ñucanchic panitaca mana cui pudinchicchu. Chashna cucpica, ñucanchicmanca pingaimi canga. 15Ashtahuanpish ñucanchic shinallatac cancunapurapipish tucui caricuna circuncisionta ruhuana cacpica cushunllami. 16Shina ruhuashpaca, ñucanchic ushicunahuan cazarai pudinguichicmi, shinallatac ñucanchicpish cancunapac ushicunahuan cazarashpa, cancunahuan causashpa, shuc llactallami tucushun. 17Cutin cancuna mana circuncisionta ruhuasha nicpica, ñucanchic panita apashpa, caimanta llucshishunllami— nirca.
18Hamorpish, paipac churi Siquempish paicuna nishcataca chasquircami. 19Jacobopac ushita yallita munashcamantami chai mosoca utca circuncisionta ruhuarca. Siquemca paipac taitapac huasi ucupica mai alli nishcami carca. 20Chaimantami paipish, paipac taitapish chai llacta yaicunaman rishpa, chaiman yaicuccunataca:
21—Cai runacunaca ñucanchic-huan apanacucmi, cai llactapimi randishpa, catushpa causagrincuna. Caipica achca allpami tiyan, shinallatac ñucanchicpish paicunapac ushicunahuan cazarai pudinchicmi, cutin paicunapish ñucanchic ushicunahuan cazarai pudincunami. 22Shina cacpipish, shuc llactalla tucushpa, cai llactapi causachunca, paicuna shinallatacmi ñucanchicpurapipish tucui caricuna circuncisionta ruhuana canchic. 23Shina ruhuacpica, tucui paicuna charishcapish, paicunapac animalcunapish ñucanchicpacmi canga. Cai nishcacunata ari nicpica, paicunaca ñucanchic-huan causangapac saquiringallami— nirca.
24Hamor, shinallatac paipac churi Siquem nishcataca tucui chai punguta yaicuccunami chasquishpa, tucui caricuna circuncisionta ruhuarca.
25Shina cacpipish, quimsa punzha quipa, circuncisionta ruhuashcamanta yalli nanaihuan cacpimi, Jacobopac churi Simeón, Leví espadahuan cungailla rishpa, tucui caricunata huañuchirca. Paicunaca Dinapac turicunami carca. 26Hamortapish, paipac churi Siquemtapish espadahuan huañuchishpami, Dinataca Siquempac huasimanta aparirca. 27Jacobopac churicunaca paicunapac pani Dinata japirishpa llaquichishcamantami chai huañushcacunapac jahuata rishpa, chaipi ima tiyashcacunata tucui shuhuashpa aparca. 28Shinallatac llactapi tiyashcacunatapish, michina pambapi tiyashca ovejacunatapish, vacacunatapish, burrocunatapish, 29huasipi tucui ima tiyashcacunata tucuimi shuhuashpa aparca. Huarmicunatapish, huahuacunatapish prezu aparcami. 30Chaimantami Jacoboca Simeontapish, Levitapish rimashpaca:
—Cancuna chashna ruhuashpaca, cai llactapi causac cananeocunapac, ferezeocunapac piñanatami ñucataca ruhuashcanguichic. Cunanca piñangacunami. Ñucanchicca ashalla runacunatami charinchic. Paicuna tandanacushpa, jahualla ñucatapish, ñuca familiatapish huañuchingami— nirca.
31Shina nicpimi paicunaca:
—¿Ñucanchic panitaca cullquimanta huainayac huarmi shinatachu ruhuana carca?— nirca.
Currently Selected:
GÉNESIS 34: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.
