GÉNESIS 30

1Raquelca Jacobopacta mana huahuata chari pudishpami: “Ñucaca Lea cashpachari alli caiman” nic carca. Chaimantami paipac cusataca:

—¡Huahuata cui, mana cucpica huañugrinimi!— nirca.

2Chashna nicpi, Jacobo piñarishpaca:

—Diosmi cantaca mana huahuata chari pudicta ruhuashca. Ñucaca huahuata cungapacca, ¿pitac caniyari?— nirca.

3Chaimantami Raquelca:

—Riqui, ñucata servic Bilha huarmipi chayari. Pai huicsayuc tucushpa, ñuca changa jahuapi sajuaricpica, chai huahuaca ñuca quiquin huahua shinami canga. Chashnami paimanta huahuata chari pudisha— nirca.

4Chashnami Raquelca paita servic Bilhata paipi huahuata charichun Jacoboman curca. Jacobo Bilhapi chayaricpica, 5shuc cari huahuatami Jacobopacta charirca. 6Chaimanta Raquelca: «Diosca ñuca mañashcata uyashcami. Ñucamanpish huahuata cushpaca, cashcatami ruhuashca» nishpami Danta shutichirca.

7Raquelta servic Bilhaca quipataca cutinllatacmi Jacobopacta shuc cari huahuata charirca. 8Chaimanta Raquelca: «Mandac Dios ayudacpimi, ñuca ñañahuan chimbapurashpa atishcani» nishpami Neftalita shutichirca.

9Lea ña mana huahuata chari pudishpami, paita servic Zilpa huarmita Jacoboman paipac huarmi cachun curca. 10Leata servic Zilpa huarmipish shuc cari huahuatami Jacobopacta charirca. 11Shina huahuata charicpica, Leaca: «¡Alli huashami cani!» nishpami Gadta shutichirca.

12Chai quipaca cutinllatacmi Leata servic Zilpa huarmica Jacobopacta shuc cari huahuata charirca. 13Chaimanta Leaca: «¡Caica achca cushicuimi! Cunanca, tucui huarmicunami ñucataca achca cushicuihuanmi cangui ningacuna» nishpami Aserta shutichirca.

14Trigo piti punzhacunami Rubenca mandrágora frutacunata tarirca. Chaitami paipac mama Leaman apamurca. Chai mandragorata Raquel ricushpami Leataca:

—Cambac huahua apamushca maijan mandragoracunata carai— nirca.

15Shina nicpimi Leaca:

—Canca cusata quichushcataca, ¿manachu yuyaringui? ¿Cunanca, ñuca huahua apamushca mandragoracunatapish quichushachu ningui?— nirca.

Shina nicpica Raquelca:

—Can mandragoracunata cushcamantaca cunan tutami Jacobota canhuan sueñuchun cachasha— nirca.

16Chishita Jacobo ña pambamanta cutimucpi, Lea tupangapac llucshishpaca:

—Cunan tutaca ñucahuanmi sueñungui. Chaica, ñuca huahua apamushca mandragoracunata Raquelman cushpami canta mañarcani— nirca.

Chai tutaca Jacoboca Leahuanmi sueñurca 17Diosca Lea nishcata uyarcami. Chaimantami pichcaniqui cari huahuata Jacobopacta charirca. 18Chaimanta Leaca: «Ñucata servic huarmita ñuca cusaman cushcamantami Mandac Diosca ñucamanca sumac japinata cushca» nishpami Isacarta shutichirca.

19Leaca quipata cutinllatac huicsayuc tucushpami, suctaniqui huahuata Jacobopacta charirca. 20Chaimanta Leaca: «Mandac Diosmi sumac caranata cushca. Suctaniqui huahuatami Jacobopacta charini. Chaimantami ñuca cusaca alli ninga» nishpami Zabulonta shutichirca. 21Leaca chai tucui cari huahuacunapac quipaca shuc huarmi huahuatami charirca. Chai huahuataca Dinatami shutichirca.

22Shina cacpipish, Mandac Diosca Raqueltapish yuyarishpami, pai mañashcata uyarca. Chaimantami huahuacunata charichun saquirca. 23Raquel shuc huahuata charishpaca: «Huahuata mana charic cashcamanta pingaihuan cacpimi, Diosca pingaita anchuchishca, 24shinallatac shuc huahuatapish charichun saquinmanllami» nishpami Joseta shutichirca.

Jacobo Labanta umashcamanta

25Raquel Joseta charishca quipa Jacoboca Labantaca:

—Ñuca quiquin llactaman cuti richun saqui. 26Ñuca huarmicunamantaca ñami canta servishcani. Cunanca ñuca huarmicunatapish, huahuacunatapish apashpa richun saqui. Ñuca ima shina servishcataca canllatac yachanguimi— nirca.

27Shina nicpimi Labanca:

—Cambac ñahuipi alli ricurishca cacpica, caipi saquirilla. Canmanta Dios ñucaman bendiciashcataca yachanimi. 28Can servishcamanta mashnata pagachun nishcata pagashallami— nirca.

29Shina nicpimi Jacoboca:

—Ñuca ima shina canta servishcatapish, cambac animalcunata ima shina cuidashcatapish canllatac yachanguimi. 30Ñuca manarac shamucpica, ashallatami charircangui. Cunanca achcami mirashca. Ñuca shamushcamantami Diosca achcata bendiciashca. Shina cacpica, ¿ima horatac ñuca familiamanca trabajashayari?— nirca.

31Shina nicpimi Labanca:

—Shinashpaca, ¿imatatac cuchun ningui?— nishpa catirca.

Shina nicpimi Jacoboca:

—Ama imata cuichu, ashtahuanpish ñuca mañashcata can uyacpica, cambac ovejacunata cuidangapac saquirishallami. 32Cunanllatacmi cambac manada ovejapacman rishpa, tucui yana, muru, shuyu ovejacunatapish, chivocunatapish ñucaman chicanyachigrini. Canta servishcamanta ñuca japinaca chaillami canga. 33Ñuca servishcamanta mashnata pagana cashcata caya mincha cungapac shamushpami, ñucataca cashcata ruhuac cashcata yachangui. Ñuca manada ovejapi yana, muru ovejacuna, mana shuyu chivocuna cacpica, ñucataca mana shuhuac cashcatami yuyangui— nirca.

34Shina nicpimi Labanca:

—Can nishca shina cachun— nirca.

35Shina cacpipish, chai punzhallatacmi Labanca tucui muru, shuyu cari, huarmi chivocunata, asha yurac, shinallatac yana ovejacunata chicanyachishpa, paipac churicunaman michichun curca. 36Chashna chicanyachishpaca, Jacobopacmanta quimsa punzha purina shina carumanmi, chai animalcunataca caruyachirca. Shina ruhuacpipish, Jacoboca Labanpac shuctac saquirishca animalcunataca michishpami catirca.

37Chashna michicushpami, álamo, almendro, castaño caspicunata pitishpa, yuranlla ricurichun, carata llushtirca. 38Chai llushtishca caspicunataca manada ovejacuna yacuta ubiana ñaupapimi churarca. Chaipimi cari ovejacunaca huarmi ovejapi chayaric carca. 39Chashnami llushtishca caspi ladopi chayaricpica, huarmi ovejacunaca muru, shuyu ovejacunata chichuc carca. 40Chashnami Jacoboca yana, shuyu, muru ovejacunata Labanpac manada ovejacunamanta chicanyachishpa, paipac manada ovejacunapi churarca. 41Cutin huira ovejacuna chayarinacucpica, Jacoboca yacu ubiana ladopimi chai llushtishca caspitaca churac carca. Ovejacuna chai caspi ñaupapi chichuchunmi chashna ruhuac carca. 42Shina cashpapish, tullu ovejacuna yacuta ubiangapac shamucpica, mana chai caspita churacchu carca. Chaimantami huira ovejacunaca Jacobopac, cutin tullu ovejacunaca Labanpac carca. 43Chashnami Jacoboca yallita chayuc tucushpa, achca ovejacunatapish, servic caricunatapish, servic huarmicunatapish, camellocunatapish, burrocunatapish charirca.

Currently Selected:

GÉNESIS 30: QCA10

Highlight

Copy