GÉNESIS 16

Agarmantapish, Ismaelmantapish

1Abrampac huarmi Saraica mana huahuata chari pudicchu carca. Shina cashpapish, Egiptomanta Agar shuti servic huarmitami charirca. 2Chaimantami Saraica Abramtaca:

—Ñucataca Mandac Diosllatacmi mana huahuayucta ruhuashca. Chaitaca canllatac yachanguimi. Chaimanta ñucata servic Agarpi chayari. Paimanta huahuayuc tucushapishchari— nirca.

Shina nicpica, Abramca paipac huarmi Sarai mañashcata uyarcami. 3Chunga huatata Canaanpi causacushpami, Saraica Egiptomanta paita servic Agarta paipac cusa Abramman paipac huarmi cachun curca. 4Agarpi Abram chayaricpica, huicsayucmi tucurca. Chashna huicsayuc cashpami, Agarca paipac ama Saraitaca mana valichi callarirca. 5Chaimantami Saraica paipac cusa Abramtaca:

—Ñucata servic Agar huicsayuc tucushpaca, ñucata yalli tucushpami, mana valichi callarin. Canmi juchayuc cangui. Cunanca, Diosllatac ñuca, mana cashpaca can mana allita ruhuashcata ricuchun— nirca.

6Shina nicpi, Abramca Saraitaca:

—Riqui, canta servic huarmica cambac maquillapitacmi. Can imata ruhuasha nishpaca, cambac allipac ruhuailla— nirca.

Agarca Sarai sinchita llaquichicpimi, paipac ñaupamanta miticushpa rirca. 7Chashna rishpa, Shur shitashca pambaman rina ñan ladopi tiyac yacu jundu ladota ricucpimi, Mandac Dios cachashca ángel tupashpaca:

8—Saraita servic Agar, ¿maimantatac shamucungui? ¿Maimantac ricungui?— nirca.

Shina nicpimi paica:

—Ñuca ama Saraipac ñaupamantami miticushpa ricuni— nirca.

9Shina nicpimi, Mandac Diospac angelca:

—Cambac ama Saraipac ñaupallamantac cutishpa, pai mandashcata cazugri. 10Cambac huahua huahuacunataca maita mana yupaipactami achcata mirachisha. 11Cunanca, huicsayucmi cangui, shuc cari huahuatami charingui. Chai huahuataca Dios cambac llaquita uyashcamantami Ismaelta shutichingui. 12Paica yalli piñami canga. Paica tucuihuanmi piñanacunga. Shinallatac tucuimi paita piñanga. Tucui paipac huauquicunahuanmi piñanacushpa causanga— nirca.

13Agarca paihuan rimacuc Mandac Diostaca: «Ñucata ricuc Diosmi cangui» nishpami shutichirca. Shinallatac: «Chaica, ¿manachu ñucata ricuc Diosta ricuni?» nirca. 14Chaimantami chai jundutaca: «Ñucata ricucuc, causaiyuc» nishpa shutichirca. Chai junduca Cades-huan, Bered llactahuan tupanacuipimi.

15Agarca Abrampactami shuc cari huahuata charirca. Abramca Agar charishca huahuataca Ismaeltami shutichirca. 16Agar Ismaelta sajuaricpica, Abramca pusac chunga sucta huatayucmi carca.

Currently Selected:

GÉNESIS 16: QCA10

Highlight

Copy