AMÓS 3
3
Mandac Dios llaquichinamanta
1Israelcunalla, Egiptomanta llucchimuc, cancunata Mandac Dios rimarishcata uyaichic. Paica:
2«Cai pachapi causacpuramantaca
cancunallatami ñucaca acllarcani.
Chaimantami cancuna
mana allita ruhuashcamantaca
llaquichisha» ninmi.
3Shuc runa manarac
shuc yuyailla tucushpaca,
¿shuc runaca, shuc runahuan
ishcai tucushpa puringachu?
4Leonca, ¿sachapi manarac
animalta japishpaca
huacangachu? Huahua leonca,
¿jutcupi mana aicha tiyacpica
huacangachu?
5Volac animalca,
¿manapish tucllata tiyacpica,
japi tucungachu?
Tucllaca, ¿manapish imata
japishpa huichaiman
cuyuringachu?
6Llactapi cornetapi manarac
tocacpi, ¿gentecunaca
mancharishpa caparingachu?
Mandac Dios manarac
llaquichicpi, ¿llactapi
llaqui tiyangachu?
7Mandac Diosca,
pai ima nishcata huillac,
paita serviccunaman manarac
huillashpaca mana llaquichingachu.
8León huacacpica,
¿pitac mana mancharinga?
Mandac Dios rimacpica,
¿pitac mana huillanga?
Samaria llactata tucuchinamanta
9Asdod llactapi, Egipto llactapi
mandashpa tiyana huasicunapipish
huillashpaca:
«¡Samaria urcupi tandanacushpa,
chai llacta llaqui tucushcata,
chaipi causaccuna llaquilla
causacushcata ricuichicyari!»
nichic ninmi.
10Mandac Diosca:
«Paicunaca imatapish
mana allita ruhuanata yachanchu.
Macashpa quichushcallatami,
paicunapac mandashpa
tiyana huasicunapi jundachin.
11Chaimantami chai llactataca
piñaccuna muyushpa shayaringa.
Sinchi torretapish urmachingami.
Mandashpa tiyana
huasicunamantapish
tucui shuhuashpa apangami.
Chaitaca Mandac Dios
ñucami nini» ninmi.
12Mandac Diosca:
«Samariapi causac israelcunaca
ñutunlla tiyarinacunapi,
cama esquinapimi tiyarin.
Paicunaca shuc michic leonpac
shimimanta ishcai oveja
chaquita mana cashpaca,
ringrita quichushca shinami,
ashalla saquiringa» ninmi.
13Tucuita Mandac Diosca:
«Uyaichic, Jacobopac huahuacunata
llaquichinata huillaichic.
14Israel ñucata
mana cazushcamantami
llaqui punzhapica
Bet-elpi tiyac altarcunatapish
tucuchisha.
Chai altar esquinacunapi
cac gachucunatapish
paquishpami pambaman urmachisha.
15Shinallatac tamya punzhacunapi,
usyai punzhacunapi
causana huasicunatapish
urmachishami.
Marfilhuan ruhuashca
huasicunapish tucuringami.
Achca huasicunami
llaquinayaita tucuringa.
Chaitaca Mandac Dios
ñucami nini» ninmi.
Currently Selected:
AMÓS 3: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.
