HECHOS 2

Diospac Espíritu shamushcamanta

1Pentecostés punzha chayamucpica, tucui criccunami shuc shinalla tandanacushca carcacuna. 2Chashna tiyacucpimi, jahua pachamanta cungailla huaira huaj nic shina shamushpa, paicuna tiyacuc huasipi jundarca. 3Chaimantaca nina japirishpa pitiric shinami, tucui criccunapac jahuapi asha asha tiyarirca. 4Chashnami tucui chaipi caccunapi Diospac Espíritu yaicurca. Chaimantami Diospac Espíritu rimachicpi, chican chican rimaicunata rimai callarirca.

5Chai punzhacunapica tucui llactacunamantami, Diosta yuyariccunaca Jerusalén pueblopi causacurca. 6Chai huaira huaj nicucta uyashpami, taucacuna tandanacumurca. Chai shamuccunaca paicunapac quiquin rimaicunapi rimacucta uyashpami, yallita mancharirca. 7Chashna mancharishpa, caishuc chaishuc parlanacushpaca:

—Riquichic, cai rimacuccunaca, ¿manachu Galilea llactamanta? 8Ñucanchicca quiquin rimaipi rimacuctami uyanchic. ¿Imamantac quiquin rimaipi rimacuncuna? 9Caipica Partia llactamanta, Media llactamanta, Elam llactamanta, Mesopotamia llactamanta, Judea llactamanta, Capadocia llactamanta, Ponto llactamanta, Asia llactamanta, 10Frigia llactamanta, Panfilia llactamanta, Egipto llactamanta, Africa, Cirene pueblo cuchulla llactacunamantami canchic. Roma llactapi causac israelcunapish, Israel aillucunapishmi canchic. Maijancunaca israelcuna yachachishcata caticcunallami canchic. 11Shinallatac Creta llactamanta, Arabia llactamantami caipi canchic. Dios mancharinata ruhuashcataca, tucui shamuccunami quiquin rimaipi uyacunchic— ninacurca.

12Chashnami tucui mashna mancharishpaca:

—¿Imatatac nisha nin?— nishpa tapunacurca.

13Ashtahuanpish maijancunaca:

—Caicunaca machashcacunami— nishpami asircacuna.

Achca gentecunaman Pedro huillashcamanta

14Pedro caishuc chunga shuc apostolcunahuan shayarishpa, sinchita rimashpaca: «Israelcunapish, tucui Jerusalenpi causaccunapish ñuca huillashcata alli uyaichic. 15Cunanca chairac tutamantaracmi. Caicunaca mana cancuna yuyashca shina machashcacunachu. 16Ashtahuanpish Dios ima nishcata huillac Joel huillashcami pactashca. Pai huillashpaca:

17“Diosca: Tucuri punzhacunapica

Espiritutaca tucuimanmi cachasha.

Chashna cachacpimi,

cancunapac churicunapish,

ushicunapish ñucamanta huillanga.

Cancunapac quipa huiñaicunapish,

muscuipi shina ricungacunami.

Pushac yuyaccunapish muscungacunami.

18Chai punzhacunapica

ñucata cazuc

caricunamanpish, huarmicunamanpish

ñuca Espirituta cachashami.

Chashna cachacpica,

ñucamanta huillangacunami.

19Jahua pachapica,

mancharinacunatami ricuchisha.

Cai pachapica,

yahuarta, ninata,

cushni puyutami ricuchisha.

20Ñuca taripana

jatun punzha

manarac chayamucpimi,

intica amsayanga,

quillaca yahuar shina

puca tucunga.

21Chaipica tucui ñuca shutipi

mañaccunaca quishpiringami” ninmi.

22Tucui israelcuna, cai ñuca huillashcata alli uyaichic. Diosca Nazaret pueblomanta Jesusta cachashpami, mancharinacunata ruhuachishpa, milagrocunata ricuchishpa, Jesús pi cashcata cancunaman ricuchirca. Chaitaca cancunallatacmi alli yachanguichic. 23Dios ñaupaman yachashca shina, munashca shinami, chai Jesustaca prezushpa, chacatachun millai runacunaman curcanguichic. Chashnami huañuchircanguichic. 24Chashna huañuchicpipish, Diosca llaquiman apac huañuimantaca cacharichishpami causachirca. Huañuica Jesustaca mana charicui pudircachu. 25David Jesusmanta huillashpaca:

“Ñucata Mandac punzhanta

ñucahuan cactami ricuni.

Paica ñuca alli ladopimi.

Chaimanta ñucataca

pi mana urmachingachu.

26Chaimantami ñuca shungupi

cushicushpa, ñuca shimihuan cantani.

Ñuca huañushca quipapish,

Diostami shuyasha.

27Dioslla, ñuca almataca

ucu pachapi cachunpish,

cambaclla cuerpo

ismuchunpish mana saquinguichu.

28Huiñai causai ñantapish,

canmi ricuchishcangui.

Can ñucahuan cacpica,

yallitami cushicuni” nishcami.

29Tandanacushca huauquicunalla, ñaupa mandac Davidmantaca, tucui ima shina cashcatami huillagrini. Pai huañucpica, enterrarcami. Pai maipi enterrashcatapish yachanchicmi. 30Davidca Dios ima nishcata huillacmi carca. Chaimantami Diosca paitaca: ‘Cambac huahua huahuacunapuramantami Quishpichic Cristoca shamunga. Pai shamushpaca, can mandashca shinami mandanga’ nishpa ari nirca. 31Davidca pai ricushca shinami Quishpichic Cristo causarinamanta, paipac cuerpo ucu pachapi mana saquirinamanta, paipac aicha mana ismunamanta ñaupaman huillarca. 32Diosca pai cachashca Jesusllatatacmi causachirca. Ñucanchicca chai ricushcata huillaccunami canchic. 33Jesús causarishpaca, jahua pacha Diospac alli maquimanmi tiyacun. Chashnami Diosca pai cusha nishca paipac Espirituta Jesusman cucpi, paica ñucanchicman cachashca. Chaitami cunanca cancunaca ricucunguichic, uyacunguichic. 34Mana Davidchu jahua pachaman rirca. Ashtahuanpish paillatacmi:

“Jesusmanta huillashpaca:

‘Mandac Diosca ñucata Mandactaca:

35Canta piñaccunata cambac

chaqui sarunapi churangacaman,

canca ñuca alli maquiman

tiyacuilla’ ninmi” nirca.

36Chaimanta tucui israelcuna, caitaca alli yachaichic. Chai cancuna cruzpi chacatashca Jesusllatatacmi Diosca, Mandac cachunpish, Quishpichic Cristo cachunpish churashca» nirca.

37Chaipi caccunaca Pedro chashna huillacta uyashpami, shungupi llaquirirca. Chaimantami Pedrotapish, apostolcunatapish tapushpaca:

—Huauquicuna, ¿imatatac ruhuashun?— nirca.

38Chashna tapucpimi, Pedroca paicunataca:

—Juchayuc cashcamanta llaquirishpa, Diosman cutirishpa, Jesucristopac shutipi bautizarichic. Chashna ruhuacpimi, Diosca juchacunata perdonashpa, paipac Espirituta cunga. 39Chaitaca Mandac Diosmi cancunamanpish, cancunapac huahuacunamanpish, tucui carupi causaccunamanpish, tucui pai acllashcacunaman cusha nishca— nirca.

40Pedro cutin cutin cunashpaca:

—Cunan millaita ruhuaccunataca, Diosca llaquichingami. ¡Chai llaquimanta quishpirichic!— nircami.

41Pedro huillashcata shungupi chasquiccunaca bautizarircami. Chai punzhapica, quimsa huaranga shinami cric tucushpa, caishuc criccunahuan tandanacurca. 42Paicunaca apostolcuna yachachishcata allimi cazuccuna carca. Caishuc chaishuc-huan allimi apanacuc carca. Shinallatac Jesús huañushcata yuyarishpa tandata micungapacpish, Diosta mañangapacpish tandanacucmi carca.

Punta criccuna ima shina causashcamanta

43Apostolcunaca milagrocunatapish, mancharinacunatapish tauca cutinmi ruhuarca. Chaita ricushpaca, tucui gentecunami mancharishpa saquirircacuna. 44Tucui criccunami shuc yuyailla carcacuna. Tucui paicunapac charishcacunaca tucuipacmi carca. 45Paicunapac allpatapish, ima charishcacunatapish catushpami, mana chariccunaman caishuc chaishucman cuc carca. 46Punzhantami Diosta mañana huasipi tandanacuc carca. Shinallatac paicunapac huasicunapipish tandanacushpa, Jesús huañushcata yuyarishpa, cuyai shunguhuanmi micuc carca. 47Shinallatac Diosta “allimari cangui” niccunami carca. Tucuipac alli nishcacunapishmi carca. Maijanpish quishpirisha niccunataca, punzhantami Diosca quishpichishpa, criccunata mirachirca.

Currently Selected:

HECHOS 2: QCA10

Highlight

Copy