1 JUAN 2
2
Cristoca ñucanchicmanta rimac cashcamanta
1Ñuca cuyashca huahuacuna, cancuna ama juchallichunmi caicunataca quillcani. Shina cacpipish maijan juchallishpaca, Dios-huan rimactami charinchic. Paica imatapish cashcata ruhuac Jesucristomi. 2Jesucristoca Dios ñucanchic juchacunata perdonachunmi, ñucanchicpac randi huañurca. Shina huañushpaca mana ñucanchicpac juchacunallamanta ashtahuanpish tucui cai pachapi causaccunapac juchata perdonachunmi huañurca.
3Diospac mandashcacunata pactachishpaca, paita ricsishcatami yachanchic. 4Maijanpish «ñucaca paita ricsinimi» nishpapish, Dios mandashcacunata mana pactachishpaca llullami can. Shina cacpimi paipac shungupica imatapish cashcata ruhuashpa causana yuyaica mana tiyan. 5Shina cacpipish Dios rimashca shimita maijanpish cazucca, Dios cuyac shinallatacmi mai cuyac cashcata ricuchin. Chashna cashpami paihuan shuclla cashcata yachanchic. 6Maijanpish Dios-huan shucllami cani nishpaca, Jesucristo causashca shinallatacmi causana can.
Mushucta mandashcamanta
7Cuyashca huauquicuna, mana mushuc mandashcatachu quillcani, ashtahuanpish ñaupaman cancuna chasquishca mandashcallatatacmi quillcani. Cai mandashcatami ña uyashpa chasquircanguichic. 8Shina cacpipish mushuc mandashcata quillcac shinallatacmi quillcani. Cai mandashca mana llulla cashcataca Jesucristomi ricuchirca, shinallatac cancunapish ricuchicunguichicmi. Imatapish cashcata ruhuac luz achicyachicucpimi, amsaca chingarishpa caticun.
9Maijanpish ñucaca achic luzpimi cani nishpapish huauquita piñashpaca, amsapirami causacun. 10Maijanpish huauquita cuyacca achicyachic luzpimi causacun. Paitaca ima juchapish mana urmachingachu. 11Ashtahuanpish huauquita maijanpish piñacca amsapimi puricun, shinallatac amsallapitacmi causacun. Chai amsallatac ñahuita mana ricucta ruhuacpimi maiman ricushcatapish mana yachashpa causacun.
12Cuyashca huahuacuna, cancunapac juchacunataca Jesucristomanta Dios ña perdonashca cashcamantami, cancunamanca quillcani. 13Taitacuna, ima manarac tiyacpi Pai ña tiyashcata cancuna ricsishcamantami, cancunamanca quillcani. Quipa huiñaicuna, diablota mishashcamantami cancunamanca quillcani. 14Taitacuna, ima manarac tiyacpi Pai ña tiyashcata cancuna ricsishcamantami, cancunamanca quillcani. Quipa huiñaicuna, cancuna sinchi cashcamanta Dios rimashca shimita chasquishpa shungupi huacaichishcamanta, shinallatac diablota mishashcamantami, cancunamanca quillcani. Huahuacuna, Diosta ricsishcamantami cancunamanca quillcani.
15Cai pachatapish, cai pachapi ima tiyashcacunatapish ama cuyaichicchu. Maijanpish cai pachapaclla caccunata cuyacca, Diostaca mana cuyanchu. 16Tucui cai pachapi tiyac millai munaicunapish, tucui ricushcata charina munaicunapish, charishcacunahuan jatun tucuna munaicunapish mana Diosmantachu shamun, ashtahuanpish cai pachallami chai munaicunataca cun. 17Cai pachaca tucui ima tiyashca millai munaicunandimi chingaringa, ashtahuanpish Dios munashcata ruhuacca huiñaitami causanga.
“Cristomi cani” nishpa llullaccuna tiyanamanta
18Cuyashca huahuacuna, tucuri punzhacunaca ñami chayamushca. Llullashpa huillac, Cristota piñac runa shamungami nishcataca uyashcanguichicmi. Chai shinallatac Cristota piñaccuna ña taucacuna ricurimucpimi tucuri punzhacuna ña chayamushcataca yachanchic. 19Chaicunaca ñucanchicpuramanta llucshishca cashpapish, mana ñucanchicpuratachu carcacuna. Ñucanchicpura cashca cashpaca, ñucanchicmantaca mana llucshinmanchu carcacuna. Chaicunaca mana ñucanchicpura cashcata ricuchunmi, chashnaca llucshirca.
20Cristo cancunaman Diospac Espirituta cushcamantami, cashcata nic huillashcataca tucui cancuna yachanguichic. 21Chashna cashcata nic huillashcata ña cancuna yachacpimi quillcani. Mana yachacpica, mana quillcaimanchu carcani. Cashcata nic huillashcapi ima llulla mana tiyashcataca, cancunallatacmi yachanguichic. 22Maijanpish “Jesusca mana Quishpichic Cristochu” nicmi, llullashpa huillacca. Cristota piñacca Diostapish, Diospac Churitapish mana cricmi can. 23Maijanpish “Cristoca mana Diospac Churichu” nicca mana Dios-huanchu, ashtahuanpish “Jesusca Diospac Churimi” nishpa huillacmi, Dios-huanca can.
24Shina cashcamanta cancuna callarimanta pacha uyashcataca shungupi huacaichinguichic. Callarimanta pacha uyashcata shungupi huacaichishpaca, Diospac Churihuanpish, Dios-huanpish shucllami canguichic. 25Jesucristo ñucanchicman cusha nishcaca, huiñai causaimi can.
26Cancunamanca llullashpa huillaccuna ima shina cana cashcamantami quillcani. 27Jesucristo cushca Diospac Espirituca cancunapimi causacun. Diospac Espiritullatacmi tucui imatapish yachachicun. Pai yachachishpaca, mana llullashpa chashnatac cashcatami huillan. Chaimanta pi yachachictaca mana mashcanachu canguichic. Diospac Espíritu yachachishca shina, Jesucristohuan shuclla causaichic.
28Cuyashca huahuacuna, shinashpaca Jesucristo ricuricpi mana manchashpa ñahui ñahui ricuringapacca, paihuan shuclla causaichic. Chashna causashpami pai cutin shamucpica, paipac ñaupapi mana pingashpa tupashun. 29Jesucristo imatapish cashcata ruhuac cashcataca yachanguichicmi. Chashna yachashpaca, maijanpish cashcata ruhuacca Diospac huahua cashcatami yachanguichic.
Currently Selected:
1 JUAN 2: QCA10
Highlight
Share
Copy
Want to have your highlights saved across all your devices? Sign up or sign in
Biblia Quichua Cañar, Dios Rimashcata Quillcashcami © Sociedades Biblicas Unidas, 2010.