Апостолэнгири Буты́ 10

Пэ́три и Корни́лиё

1Кэ Кесария дживдя́ екх ману́ш, савэ́с кхардэ́ Корнилиё, ёв сыс пэ Италийсконэ (Италиякиро) полко шэлэнгиро барыдыро́, 2ёв сыс дэвлы́тко ману́ш, сарэ́ пэ́скирэ сэм΄яса (ирьяса) патяндыя Дэвлэ́скэ и дарандыя Лэ́стыр, ёв бут помогинэлас чорорэнгэ манушэ́нгэ и ўса́ды (сак) мангдя́пэ Дэвлэ́скэ, 3е́кхвар дывэсэ́, пашэ́ еня́то мардо́ (шту́нда), кэ ёв явдя́ Дэвлэ́скиро Янго́ло, савэ́с ёв куч дыкхця́, и саво́ и пхэндя́ лэ́скэ: “Корни́лие.” 4Ёв дыкхця сы́гэс пэ лэ́стэ и пиристрахадыи, пхуця́: “Раё Дэ́вла?” Янго́ло отпхэндя́ лэ́скэ: “Тыро́ мангипэ́н и дова́, со ту дэ́са васт чорорэ́ манушэ́нгэ, явнэ́ Дэвлэ́скэ пэ рипирибэ́н. 5И какана́ бичха́в манушэ́н кэ Иопия, соб (кай) ёнэ тэ кхарэ́н Симонос, савэ́с кхарэ́на Пэ́три. 6Ёв исын гостё дро Симоноскиро кхэр, саво́ исын тэрдо́ пашы́л мо́рё (дэрья́в), и адава́ ману́ш выкэрэла цыпи. 7Ке́ли Янго́ло, саво́ ракирдя́ Корнилиёса, отгия́, тэды ёв кхардя́ кэ пэ дуе пэ́скирэ дынарье́ндыр (слугэ́ндыр) и екхэ халадэс, саво́ сыс дэвлы́тко и ўса́ды (сак) кхэтанэ́ лэ́са; 8и, ке́ли ёв роспхэндя́ лэ́нгэ саро́, тэды бичхадя́ лэн дрэ Иопия. 9Пэ яви́р дывэ́с, ке́ли ёнэ подгинэ́ пашылэды́р кэ фо́ро, Пэ́три пашэ́ шо́вто мардо́ (шту́нда) гия́ упрэ́ пэ кхэр тэ мангэ́лпэ Дэвлэ́скэ. 10И ёв бокхалыя и закамдя́ тэ хал. Нэ пака ёнэ кэравэнас хабэ́н, лэ́скэ явдя́ дыкхибэ́н и ёв издрандыя. 11И дыкхэ́ла ёв: болыбэ́н исын отчхакирдо, и вари-со, со подджа́ла пэ бари цэ́рга, сави́ сыс припхандлы пал штар вэ́нглы, мэкэласпэ тэлэ́ пэ пхув; 12и одо́й сыс сарэ́ штарґэритка мурдала́ (жывотна), савэ́ псирэ́на пир пхув, и савэ́ ползынэна, и болыбны́тка чирикля́. 13И зан пхэндя́ лэ́скэ: “Пэтрие! Ушты́, чхин адалэ́ мурдалэ́н и ха” 14Нэ Пэ́три пхэндя́: “Над, Раё Дэ́вла! Мэ ние́кхвар на хаём нисо́ джунгалыпнастыр (брыткиматыр) и со исын нажужо.” 15И сыс яви́р мо́ло зан, сави́ пхэндя́ лэ́скэ: “Со Дэвэ́л кэрдя́ жужэса (чыстонэса), дова́ ту на гин пал нажужэстэ.” 16И адя́кэ сыс трин мо́лы и коригэды́р (позжэ) цэ́рга нэвэ́стыр ґаздыя́пэ пэ болыбэ́н. 17Ке́ли Пэ́три пиридуминэлас кокоро́ пэ́скэ, со дава́ саро́ значынэ́ла, со лэ́скэ сыкадыя́ болыбна́стыр, ёв дыкхця́; ґа́да, адалэ́ мануша́, савэ́н бичхадя́ Корнилиё, латхнэ́ Симоноскиро кхэр, подгинэ́ кэ по́рта, 18и зоралэ́ заня́са пхучнэ́: “Ци исын ада́й Си́моно, Савэс кхарэ́на Пэ́три?” 19Пака Пэ́три думиндя пал дова́, со ёв дыкхця́, Ду́хо (Фа́но) пхэндя́ лэ́скэ: “Ѓа́да, трин мануша́, савэ́ родэ́на тут; 20ушты́ и джа́ тэлэ́ и джа́ кхэтанэ́ лэ́нца ни палсо́ на пиридумин; пал-дова́ со дава́ мэ лэн бичхадём кэ ту.” 21Пэ́три гия́ тэлэ́ кэ мануша́, савэ́ сыс прибичхадэ кэ ёв Корнилиёстыр и пхэндя́: “Мэ сом одова́, конэ́с тумэ́ родэ́на; пал саво́ рэ́ндо (де́ло) тумэ́ явнэ́?” 22Ёнэ отпхэндлэ́ лэ́скэ: “Корнилиё бичхадя́ амэн, шэлэнгиро барыдыро́, ману́ш чачуно́ и саво́ дарэ́ла Дэвлэ́стыр и сарэ́ Юды лэс шунэ́на, а свэ́нто Янго́ло пхэндя́ лэ́скэ тэ кхарэл тут дро лэ́скиро кхэр и тэ шунэ́л тырэ́ лава́.” 23Тэды Пэ́три кхардя́ лэн дро кхэр и дыя́ тэ хал. Пэ яви́р дывэ́с Пэ́три и вари-кицы́ пша́ла Иопиятыр гинэ́ лэ́са кхэтанэ́. 24Пэ атася́ ёнэ явнэ́ дрэ Кесария. А Корнилиё ужакирдя лэн, и кхардя́ кэ пэ сари́ пэ́скири сэмэ́нца и пашатунэ́ малэн (другэн). 25Ке́ли Пэ́три заджалас дро кхэр, Корнилиё пирилыя лэс, пыя́ кэ лэ́скирэ ґэра́ и кэрдя́ шэрэ́са (поклониндяпэ) лэ́скэ. 26Нэ Пэ́три ґаздыя́ лэс, пхэни́: “Ушты́! И мэ сом адасаво́-паць ману́ш.” 27И ке́ли Пэ́три ракирдя́ дурэды́р Корнилиёса, ёв загия́ дро кхэр и латхя́ бут манушэ́н, савэ́ кэдынэпэ. 28И ёв пхэндя́ лэ́нгэ: “Тумэ́ джинэ́на, со пир амаро́ Зако́но нашты́ Юдоскэ тэ ракирэ́л Наюдэнца, ци тэ явэ́л кхэтанэ́ лэ́нца; нэ Дэвэ́л сыкадя́ ма́нгэ, тэ на кхарав ние́кхвар манушэ́с налачхэса ци нажужэса. 29Палдава́, сыр ман кхардэ́, мэ явдём би ловэнгиро; и какана́ мэ тумэ́ндыр пхучава: “Ваш саво́ рэ́ндо тумэ́ бичхадэ́ пал ма́ндэ?” 30Корнилиё пхэндя́: “Штар дывэса́ палэ мэ постиндёмпэ кэ/жы́ко кадава́ моменто, дрэ дава́-паць часо мэ мангдёмпэ Дэвлэ́скэ дрэ миро кхэр, сыс еня́ (биекхэ́скиро дэш) мардэ́; и ґа́да, анги́л ма́ндэ тэрдия́ ману́ш дрэ зяиндлы и́дя, 31и пхэндя́: “Корни́лие! Дэвэ́л шундя́ тыро́ мангипэ́н и дова́, со ту дэ́са васт чорорэ́ манушэ́нгэ. 32Бичха́в палдова́ манушэ́н дрэ Иопия пал Симоностэ, савэ́с кхарэ́на “Пэ́три”; ёв исын сыр гостё дро Симоноскиро кхэр, саво́ исын тэрдо́ пашы́л пани́ и адава́ ману́ш выкэрэла цыпи; ёв явэ́ла и пхэнэ́ла ту́кэ. 33Палдава́ мэ дрэ дава́-паць часо бичхадём манушэ́н пал ту́тэ и ту куч кэрдя́н, со явдя́н. Какана́ амэ сарэ́ ада́й сам анги́л Дэвлэ́стэ тэ шунас саро́, со Дэвэ́л пхэндя́ ту́кэ, соб (кай) ту тэ пхэнэ́с амэ́нгэ.”

Пэтри́скиро Пхэныбэ́н

34Пэ́три лыя́ тэ ракирэ́л: “Какана́ мэ ґалёвава, со Дэвэ́л кутякирэла шэра́ (ра́внэс) сарэ́н манушэ́н; 35и Ёв прилэ́ла манушэ́н сарэ́ нацые́ндыр, ко́ли адалэ́ мануша́ дарэ́на Лэ́стыр и кэрэ́на пир чачипэ́н. 36Ёв бичхадя́ лав Израилёскирэ чхавэ́нгэ, саво́ роспхэнэ́ла пал “рама́нё” пир Исусо́стэ Христосо́стэ, Ёв исын Рай Дэвэ́л пир саро́ свэ́то. 37Тумэ́ джинэ́на и пал дова́, со сыс пало́ (после) болдэипэн, саво́ пхэндя́ Иа́но пир сари́ Юдэ́я аж Галилеятыр, 38пал Исусо́стэ Назаретостыр: сыр Дэвэ́л дыя́ Свэ́нто Ду́хо (Фа́но) Лэ́скэ и зор, и, сыр Ёв псирдя́ пир сари́ пхув, кэрдя́ лачхипэ́н и састякирдя сарэ́н, савэ́ндэ сыс налачхэскири зор, пал-дова́ со Дэвэ́л сыс Лэ́са. 39Амэ сам якхи́тка далэ́ сарэскэ, со Ису́со кэрдя́ пэ Юдэякири пхув и дро Ерусалимо, ёнэ замардэ́ Лэс и убладэ Лэс пэ трушу́л. 40Нэ Дэвэ́л пэ три́то дывэ́с отджидякирдя́ Лэс мэрибна́стыр и дыя́ Лэ́скэ саштыпэн, соб (кай) мануша́ тэ дыкхэ́н Лэс. 41Нэ на сарэ́ мануша́, а амэ, савэ́н Дэвэ́л выкэдыя́ сыр якхитконэн, дыкхцям, амэ, савэ́ хаям и пиям кхэтанэ́ Лэ́са пало́ дова́, сыр Ёв отджидыя́ мэрибна́стыр. 42И Ёв припхэндя́ амэ́нгэ тэ пхэнас лав манушэ́нгэ и тэ допхэнас пал дова́, со Ёв исын Одова́, Савэс Дэвэ́л выкэдыя́ тэ явэ́л Сэндариса пэ мулэ́ и джидэ́ манушэ́ндэ. 43Сарэ́ проро́ки допхэнэна пал Лэ́стэ, со одолэ́скэ, кон патя́ла дрэ Лэ́стэ, явэ́на отмэкнэ грэ́хи Лэ́скирэ лавэ́са.”

На́юды Дорэсэ́на Свэ́нто Ду́хо (Фа́но)

44Ке́ли Пэ́три ракирдя́ далэ́ лава́, Свэ́нто Ду́хо (Фа́но) гия́ тэлэ́ пэ сарэ́ндэ, кон шундя́ лав. 45И Юдытка дэвлы́тка, савэ́ явнэ́ Пэтриса, дивиндлэ́пэ, со Свэ́нто Ду́хо (Фа́но) гия́ тэлэ́ и пэ Наюдэ́ндэ; 46пал-дова́ со ёнэ шундлэ́, сыр одолэ́ ракирдэ́ пэ яви́р чиба́/чибья́, и ёнэ барьякирэнас паты́в Дэвлэ́скэ. Тэды Пэ́три пхэндя́: 47“Кон могинэ́ла (сашты́) тэ запхэнэл тэ болэнпэ пане́са, одолэ́нгэ, савэ́ прилынэ́ Свэ́нто Ду́хо (Фа́но), адя́кэ-паць, сыр и амэ?” 48И пхэндя́ лэ́нгэ тэ болэнпэ дро Исусо́скиро Христосо́скиро лав. Коригэды́р (позжэ) ёнэ мангнэ́ Пэтрис тэ явэ́л лэ́нца вари-кицы́ дывэса́.

Currently Selected:

Апостолэнгири Буты́ 10: ROMBALT

Highlight

Copy