Zefania 2
2
1HNYEI ame ca hmehma lö, ûkhacaköu thʼ öbun, eke, ûkhacaköu thö; 2e ka tiga ca oâ hna otilâ, e ka tiga ca he but bong helâ me thatûnyin hwit, e ka tiga ca o bi köbun hmonyin ae gan anyi Iehova, e ka tiga ca o bi köbun bong bonginy hmonyin anyi Iehova. 3Elöm Iehova thʼ öbun hia tavat ae ilemuk hnyi hnyei, tavat adre ânyâ hnen hna owisa; elâm dö hwakecin ae wisa, elâm dö menyik: adre me ne he ka ikhölʼ öbun hnyi bonginy hmonyin anyi Iehova. 4Anyin adre me he be ka hota degecâ Gaza, ke ame he ka ba wan Asekelona: adre me he ka obâ Asedoda hnyi jebigo, kʼ adre me he ka oc Ekerona me iwân. 5Ekölö ge tavat adre me labâ hobat köiö, wale hneyi iny at Kerethi! e ve e möbun hofuc ho Iehova, Kanana, hnyei iny at Filisiti; oge me he ka ohiö u me me ba at ame he ka labâ. 6Ke haba hobat köiö, me ame he ka hu je uma umen tavat tuö mamoe hnyin, ke ta je hnyeuleny je hnahat mamoe. 7Ke haba hobat köiö, me ame he ka hnân hobi kâu je kolon lap anyi Juda; kʼ adre me he ka han haledrin ta je hnahat mamoe eling: kʼ adre me he lû mokulec je uma umo Asekelona hnyi sahac; anyin ame he Iehova Khongudrin ka senʼ ödrin, me ohmetu ödrin ûhedrin hnyi hna bâ. 8Oge hia but long hna haikongoâ hnö Moaba, ke hna û hnen lakon Amona, waleji tavat adre me haikongoâ lakeik, kʼ adre me bi gan hnyi je hnyigöulödra. 9Anyin a wale, haingö Iehova tuhan sabaoth, Khongu Isaraela, ka habe, Kia inya inya a gʼ ame he Moaba ka ûcû me Sodoma, kʼ ame he lakon Amona ka ûcû me Gomora, a iny jut vhat, ke thopiny sâlt, ke ba wan nyiele balua: kʼ ame he je kolon lakeik ka sei ödra, ke ame he je kolon hnyi ik hnyei ka hwöhwabödra. 10Adre me he ka hu e can anyidra bi gan, anyin adre hia but haikongoâ me bi gan ka lakei Iehova tuhan sabaoth. 11Ke ame he Iehova ka ooti ödra: anyin a e ame he ka ohia tilâ je khong khongon hmeledrany hia; me ame he tavat ka khudrung kâu, ke at me ke at hnyi je ve hnödra, wale ta je bomeneiny ta ogo hnyei hia. 12Ke haba öbun, at Aithiop lö, me adre me he ka hlingʼ öbun ge anyik hele vat. 13Ke e ame he ka hai hnyamen ka hnyi ke keihen ka hnyi hwadro, me ohia Asuria; ke e ame he ka öba wan Nineve, me me hwahwacit helâ me hnyebuba. 14Ke ame he je hnahat meno ka mokut hnyi wanben e, a omenoiny ta je hnyei hia: ame he kati me kifoda ka mokut hnyi ban je hmolominy: kʼ adre me he ka cûk hnyi je mamalama; ke ba at hnyi je hwanuma: anyin a e ame he ka hom singiny ûnyi hnyi hon hna huliwan arasi. 15Walang taun waleji ame senyin me laba wia, at ame ha eû hnyi hnyekon ka habe, Inya thibi, ke ba hmetu ke at: Ekölö, e ba but wan e, hnân mokut hnen je meno ae hiny! ame he tavat adre me he unyin ka jû, me nyinyikâ ban.
Currently Selected:
Zefania 2: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
