Zakaria 8
8
1KE ame o könya hofuc ho Iehova, ame ha, ka habe, 2Walang hna ha hnö Iehova tuhan sabaoth, ka habe, Oge me ciâ Ziona, ke gan hmâ hna ciâ, ke oge me ciâ e hnyi hmonyin ae gan. 3Walang hna ha hnö Iehova, ka habe, Oge me laba hmetu hnyi Ziona, ke oge me he ka laba hnyi wanben Jerusalema: ke adre me he ka hwenyi ien Jerusalema, me Taun ae hnathu; kʼ adre me he ka hwenyi ien bucen anyi Iehova tuhan sabaoth, ka habe, Bucen ae kap. 4Walang hna ha hnö Iehova tuhan sabaoth, ka habe; Ame he bi wahingat me wasomaca ka laba hnyi ta je getheniny Jerusalema, kʼ adre me he ka ve he me uci, hoton ûhingatidra bi. 5Ke ame he ka unöngöt je getheniny taun ge wainda me waindusem hnyat adre me walak eû hnyi ta je gethen. 6Walang hna ha hnö Iehova tuhan sabaoth, ka habe, Ame ne hnân lâiâ ka je kolon tavat ang hnyi je bong eling, hawa e ca ûcû könya he ka hnyi lâiâ? haingö Iehova tuhan sabaoth. 7Walang hna ha hnö Iehova tuhan sabaoth, ka habe, Wâ bi, oge me he ka omelö lakeik ûnyi hnyi hnyei e deiö, ke hnyei e jio: 8ke oge me he ka hum ödra, mʼ adre me he ka laba hnyi wanben Jerusalema; ke adre me he ka lakeik, ke oge me he ka Khongudrin hnyi hnathu me hwakecin ae wisa. 9Walang hna ha hnö Iehova tuhan sabaoth, ka habe, Ohwegiâ thö je hnyamöbun, tavat öbun e long hnyi bong ang hofuc ang a deny je perofeta a ödra hnyi bong adre bi taben hnyin uma umo Iehova tuhan sabaoth, wale uma kap, mʼadre me he ka op e. 10Anyin ae tiga ca o je bong eling, adre me ca bi hwaban ka tavat, me hobi kâu je meno; ke ba hnahic ka at ame didrut me didro can iwahnaihmiony: anyin oge me ve kunâ tavat hia he ka ûiwahnai-hmiönyköu. 11Ke walang ang, oge me ca he ka helâ hnyi je bong a bân ka je kolon tavat ang, haingö Iehova tuhan sabaoth. 12Anyin ame he ka hu hatonginy ûsoköu; ame he vine ka wa, ke kânâ ame he ka oâ jeûiny, ke ame he drany ka ham dân hau; ke oge me he ka kunâ je kolon tavat ang ka hu ta je ûnyi hia eling. 13Adre ohnaûhangʼ öbun lap anyi Juda, me lap anyi Isaraela unyin je hnyei, helâe oge me he ka omeli öbun, ke öbun e he ka hnahic: ca ot bi, owhigiâ thö je hnyamöbun. 14Anyin a walang hna ha hnö Iehova tuhan sabaoth, ka habe, Oge ûnykûme he ka ânyâ ûnyi ae kong köbun, waleji ge hnen lakamöbun hna ohmönyini nya, haingö Iehova tuhan sabaoth, ke oge me ca ietra; 15helâe oge me ûnykûme hmetu hnyi bong ang he ka ânyâ so ka Jerusalema, me ka lap anyi Juda: ca ot bi. 16Walang ûnyi öbun e he ka ânyâ. Ûhaköuâ thö hnathu; owisa hnatho thö me hnahic hnyi je homa-göulebun: 17ke ca he ke at unyibun he ka ûnykûme ûnyi ae kong hnyi je hnyekubun ka ke at; ke ca hnyok bi hna khemanyin thoi: anyin a hûkötiânök ta je ûnyi hia e, haingö Iehova.
18Ke ame o but könya hofuc ho Iehova tuhan sabaoth, ka habe, 19Walang hna ha hnö Iehova tuhan sabaoth, ka habe. Haba hna ânyâ ca han hnyi tehi a vakiny, me hna ânyâ ca han hnyi tehi a thabûnginy, me hna ânyâ ca han hnyi tehi a seveniny, me hna ânyâ ca han hnyi tehi a teniny, me ame he ka hnân senyin me hobâ ka lap anyi Juda, me bijeû ae so. 20Walang hna ha hnö Iehova tuhan sabaoth, ka habe, Ame he hmetu ka o tavat, ke aten ta je taun ae se hia: 21kʼ ame he aten ke taun ka he ka aten ke taun bi me ha, ka habe, E so ate me he mweimwei me sumâtâ ibetengiö ga Iehova, me elöm Iehova tuhan sabaoth: ke oge me he ka hnyi he. 22Eke, ame he ka o but tavat ae se hia ke ta je hnyei ae hwege he ka elöm Iehova tuhan sabaoth hnyi Jerusalema, me sumâtâ ibetengiö ga Iehova. 23Walang hna ha hnö Iehova tuhan sabaoth, ka habe, Hnyi je bong eling, me ame he hnyat a ten ka kât obiny ûkhaû anyin at Juda, walödrin hnyi ta je hwen hnyei hia, me ha, ka habe, Ohmun e he ka tha he möbun, anyin ae khanʼ ohmun dut a e unyibun Khong.
Currently Selected:
Zakaria 8: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
