Zakaria 1
1
1HNYI tehi a eitiny hnyi huna a loi Dariu, ame o but hofuc ho Iehova ko Zakaria, nöku Berekia, nöku Ido profeta, ame ha, ka habe, 2Iehova ame hia but hmonyin gan hmâ ka lakamöbun. 3Anyin a wale ha thö kodra, ka habe, Walang hna ha hnö Iehova tuhan sabaoth ka habe, Hmetu ju könya, me oge me he bi nya ka hmetu köbun, haingö Iehova tuhan sabaoth. 4Ca he öbun ka helâ me lakamöbun waleji adre me hongot ka ta je perofeta kâû adrem, me ha, ka habe, Walang hna ha hnö Iehova tuhan sabaoth, ka habe, Hmetu ju öbun walang ang ûnyi hnyi debun ta je gethen ae kong, ke anyibun je huliwa ae kong: ke adre me ca long bi, kʼ adre me ca tevehlöng könya, haingö Iehova. 5Ewa lakamöbun? ke ta je perofeta, hawa, adre me möt balua? 6Ke haba hok je hofuc ke anyik je hnanyibu, waleji oge me hûna ka lathnyabaik a je perofeta, hawa, ödrin e ca khaû lakamöbun? me adre me hmetu me ha, ka habe, Haba Iehova tuhan sabaoth ame ûnykûme he ka ânyâ kohmun, hoton dehmun je gethen, ke anyihmun je huliwa, ke helâe e ame hia but ânyâ kohmun.
7Ke haba hnyi bong a twente foainy tehi a eleveniny, wale hnyi tehi Sebat, hnyi huna a loi Dariu, me ame o but hofuc ho Iehova ko Zakaria nöku Berekia, nöku Ido perofeta, me ame ha ka habe, 8Oge me wâ hnyi hnyinghet, ke wâ bi at ame tabâ hors ae dra, ke e ame tot hnyi wanben je ûö adasi hnyi dok ae hwaelu; ke hwaban e je hors ae dra, ke hngingidra, ke hau. 9Me oge me ha, ka habe, Than lö, je ieû e? Ke haba angela at ame ûhnenamö mönya ame ha, ka habe, Oge me he ka omanenâ köu bongon ta je ûnyi ang. 10Me ame thu hnen at ame tot hnyi wanben ta je ûö adasi, me ha, ka habe, Wale je hna kunâ hnö Iehova he ka vheno hmeledrany. 11Ke adre me thu ka angela anyi Iehova at ame tot hnyi wanben je ûö adasi me ha, ka habe, Ohmun e hia but vheno hmeledrany, ke, wâ bi ame laba wia hmeledrany hia, ke hnahic. 12Me haba angela anyi Iehova ame thu me ha, ka habe, Iehova tuhan sabaoth lö, ke ne o but kebö a u me ca he ka betenge ge Jerusalema, me je tauniny Juda, wale u je hmönyâm ka hnyin, hnyi je huna a sevente? 13Ke haba Iehova ame thu ka angela at ame ûhnenamö mönya hnyi je hofuc ae so, wale je hofuc hnân okhaukahwa hnyok. 14Me haba angela at ame ûhnenamö mönya, ame ha könya, ka habe, Hongot dö me ha, ka habe, Walang hna ha hnö Iehova tuhan sabaoth, ka habe, Inya oge me ciâ Jerusalema, me Ziona, ke gan hmâ hna ciâ. 15Ke e gan hmâ anyik hmonyin ka tavat adre me laba hnahic: anyin ae ûhnyûkong anyik hmonyin, ke haba ödrin bi, me adre me ogânâ hna ovecâ. 16Anyin a wale, walang hna ha hnö Iehova, ka habe, Inya oge me hmetu Jerusalema ai me je ibetengiö; adre me he ka op hmetu umök uma eling, haingö Iehova tuhan sabaoth, ke adre me he ka lelö tulut tö hon Jerusalema. 17Hongot hmetu thö, me ha, ka habe, Walang hna ha hnö Iehova tuhan sabaoth, ka habe, Ame he ka se hia hmetu anyik je taun ûnyi ge hnahic; ke ame he hmetu Iehova ka otubwelâ Ziona, me senyin ka Jerusalema.
18Ke oge me bwele thö me wâ, ke wâ bi vak ta faoiny meno. 19Ke haingök ka angela at ame ûhnenamö mönya, ka habe, je ieû e? Ke haingen könya, ka habe, Wale je faoiny meno hnyat ödrin e hia but oveseâ Juda, me Isaraela, me Jerusalema. 20Haba Iehova ame omanenâ könya je hnyat huliwa a vak. 21Me oge me ha ka habe, Ieû ang ödrin e o kâu? Ke haingen, ka habe, Wale je fao a vak ödrin e oveseâ at Juda, me me ba at ame ogöranyâ ban: ke so bi haba hnyat ang ödrin e o but he ka ooti ödrin, he ka hagutâ je faoiny je hnyei, tavat adre me ogöranyâ je fao ûcon hnyei Juda me oveseâ.
Currently Selected:
Zakaria 1: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
