Mareko 2

1KE e ame dit hmetu hnyi Kaperenauma hwaban ke je bong, me ame lung, ka habe, wale thö eiö hnyin uma. 2Me ame ûkhacaköu thö tavat ae se hia, me me hnek dö ke ne o but hnyi hwanuma: me e ame ha hofuc kodra. 3Ke adre me hom but kâu at ae mat, ame vadren hnen hnyat a vak. 4Ke ca khanʼ ödrin bi he ka hakekenyâ e, anyin ae ûhneki tavat, me ödrin e khong hon uma wale hnyi dok a e cicö: ke ödrin e hia but kia, me ödrin e hnahna but hna mokut wale ame mokut at ae mat hon. 5A wâ but Iesu anyidrin labageju, me e ame ha ka at ae mat, ka habe, Nokuk lö, adre hia but hna degecâ ânyâm je hulö. 6Ke ame laba eling keihen hnyat sihnalimen, me ödrin e ûnykûme eû hnyi je hnyekudrin, ka habe, 7Ehö at ang ame fuc helâe? e ame ha bigan ka Khong: ia ae khana he ka thang degecâ ta je hulö, a hake Khong thibi? 8Ke ame ie manen dut kö Iesu eû hnyi hnyekon ifucidrin helâe eû hnyi je hnyekudrin, me e ame ba ködrin, ka habe, Ieû gabun öbun e fuc eû hnyi je hnyekubun ge je ûnyi eling? 9Ieû ae hâhâ he ka ha ka at ae mat, ka habe, Adre hia but thang degecâ ânyâm je hulö, me he ka ha bi kâu ka habe, Tödrö, hom dö hnâm me he thö? 10Ke so bi mʼ öbun e he ka wâ ae tren man Nokon at eang hmeledrany he ka thang degecâ ta je hulö, (e ame ha ka at ae mat, ka habe,) 11Inya oge me ha köu, Todrö, hom minya thö hnâm, me he thö ka hnyi umâm uma. 12Me e ame todrö me hom dö hnen, me didrut hnyi hnyimakodra hia; me adre me lâiâ me ogânâ Khong, me ha, ka habe, Ate me ca wâ bala hwakecin helâng.

13Ke e ame he hmetu hnyi hobat köiö; me ame o but kâu tavat ae se hia, ke e ame ûne kodra. 14Me e ame he, ke ame ō Levi nöku Alefaio ame laba hnyi uma khop fat, me e ame ha kâu, ka habe, He hotuk. Me e ame todrö me he hoton. 15Ke e ame laba hnyin umen uma, ame han, ke se hia minya ta je telona me tavat ae kong adre me tha laba me Iesu me laten: anyin a ödra se hia, hnyat adre me he hoton. 16Ke a wâ but e hnen hnyat sihnalimen, hanen je Faresaio a gʼ ame tha han me je telona me tavat ae kong, me adre me ha ka laten, ka habe, E ame tha han me ic me ta je telona me tavat ae kong. 17Ke a long ut Iesu, me e ame ha kodra, ka habe, E ca ûnyi hnathu at ae tren bubuny ka tavat ae hwege, ke so bi ka tavat ae mok: oge me ca o but he ka hawâ tavat ae wisa, ke tavat bi ae kong, mʼ adre me ietra. 18Ke haba latö Ioane, ke laten ta je Faresaio, adre me ânyâ ca han: me adre me o but kâu, me ha, ka habe, Haba latö Ioane me laten ta je Faresaio adre me ânyâ ca han, ke haba lâtâm, me ödrin e ca munyi ânyâ geû ca han? 19Ke Iesu ame ha kodra, ka habe, Hawa, e khana lahanen at a tep faipoipo he ka ânyâ ca han ke tiga e unyidrin at a tep faipoipo? E ca khanʼ ödra he ka ânyâ ca han, e ka tiga laba unyidra at a tep faipoipo. 20Ke ame he ka o ûen he ka hom gadra at a tep faipoipo, me wale but e ûen adre me he bi ka ânyâ hnyin ca han. 21E ba ke at ame ûtibetköuâ ecmano a teb ûnyi ka hnyi ûkhaû ae bobot ut: wâ e nye ok ut ecmano ae bobot ge ecmano ae hât adre me ip hnân okhötâ, me ame he ka gan hmâ but mou. 22Ke ba at ame hingâlâ waina a teb ûnyi ka hnyi je tangen a je unen meno ae bobot: wâ e nye hmouca but ta je tangen hnen waina, me ame he ka hingölö waina, me kong ut ta je unen meno: ke so bi adre me hingâlâ waina ae teb ûnyi ka hnyi je unen meno a teb ûnyi.

23Ke haba hnyi ke bong sabath e ame he hnyi wanben je hna belökâ hwit; ke haba laten ödrin e hwân he ka thu tilâ je wan hwit. 24Ke haingen ta je Faresaio kâu, ka habe, Wâ bi, ieû gadrin ödrin e ânyâ hnyi bong sabath ûnyi adre hnyibo? 25Me e ame ha kodra, ka habe, Hawa öbun e ca munyi aû ehac hna mâdrâ hnö Davita hnyi ûen ae ba han, ke e ame mekihnânem me anyin bunyen? 26Wale ge hnen hna didro ka hnyi uma umen Khong hnyi ûen at bihut ae nua a Abiathara, me an je areto hnân omanenâ, waleji ae ca ûcû ka tavat he ka an, ke hake tavat bihut thibi, ke e ame ham minya ka anyin bunyen? 27Me e ame ha kodra, ka habe, Adre mâdrâ sabath hobi kâu at, ke adre ca mâdrâ bi at hobi kâu sabath: 28me me tuhan sabath minya bi Nokon at.

Currently Selected:

Mareko 2: IAAI

Highlight

Copy