Mareko 12

1KE e ame hwân he ka fuc kodra a deny ta je ûhöûcû. Haba ke at ame ta hnyei vine, me the haginy igigilo, me hiny thop hnân hlec vine, me otilâ tap tue, me hna but ka tavat belök, me he but ka hnyi ke hnyei. 2Ke haba hnyi ûen e ame kunâ ke athnyaba ka tavat belök, me me he ka kap wan hnyei vine ûnyi ge tavat belök. 3Me ödrin e kât e, me kot, me obâ ke ba ûnyi a hom. 4Me e ame kunâ hmetu ke athnyaba kodra; me adre me aat dö e hnyi ban, me ti okongoâ. 5Ke e ame kunâ ke at bi, ke adre me hlingâ e: me keihen miny ae se hia; adre osöâ keihen, me hlingâ keihen. 6Ke tiga e bi unyin nokon a oûnykûminy, me e ame kunâ minya but kodra hnyi obiny, haingen, Adre me he ka ogânâ nokuk. 7Ke haba tavat belök eling, me adre me ûhaköuâ, ka habe, Wale but ang mâtrân; ai öbun, ate me he ka hlingâ me me tang omjehetin biju anyin ta je ûnyi. 8Me adre me kât e me hlingâ, me khûâ but ka hnyi hoton hnyei vine. 9Anyin a wale, ieû ame he ka mâdrâ tuhan hnyei vine? e ame he ka o me ohia tavat belök, me ham hnyei vine ka keihen. 10Öbun e ca munyi aû hna sihnalimen, ka habe,

Haba veto ame degec ge tavat bi uma,

Me adre hia but ânyâ eling me hnân kopiny bahebet:

11A mâdrâ e hnen Than,

Kʼ ate me wâ me lâiâ?

12Me adre me heleû deny he ka kât e; ke adre me outen tavat ae se hia; anyin ae khanʼ ödra hnen hna ûhöûcû gadra: me adre me hna but e me he but.

13Ke adre me kunâ kâu keihen at Faresaio, me hnyat Herodiane he ka töuhneweny e ge ta je ifucin. 14Ke ödrin e o but, me haingödrin kâu, ka habe, At ûne lö, e khanʼ ohmun dut a u at ae hnathu, ke u me ca outen at: anyin a u me ca ûnykûme hnyimakan at, ke u at ame nâ hnatho gethen deny Khong; hawa, e ûcû he ka fat kö Kaisara, hawa, hna ju? 15Ohmun e he ka ham, ohmun e ca he ka ham, hawa? Ke e ame wâhmakhmeto anyidrin iyawö, me e ame ha ködrin, ka habe, Ieû gabun öbun e cubic nya? Hö jem denari mʼ inye wâ thö. 16Me ödrin e ham. Ke e ame ha ködrin, ka habe, Hnyimakö ia ang, ke hna sihnalimen hnyin? Haingödrin kâu, ka habe, Kaisara. 17Haingö Iesu ködrin, ka habe, Ham dö kö Kaisara ta je ûnyi anyi Kaisara, ke ka Khong ta je ûnyi anyin Khong. Me ödrin e lâiâ e gan hmâ. 18Me ame o but kâu ta je Sadukaio, wale tavat adre me ha, ka habe, e ba möt hmetu ûnyi hnyi hna mok; ke ödrin e hnö e, ka habe, 19At ûne lö, haba Mose ame sihnalimen köta, ka habe, A ne mokcu ke liamekeiny me ke at, kʼ ame mok degec âiân, ke ba bi nokon, me hamen liamekeiny mē he ka hom âiân he ka bi mâtrân liamekeiny mē. 20E hu je liamekeiny a seven: me ame faipoipo thö atö, me ame mokcu, ke ba mâtrân; 21ame ka hom dö e at a loiny, kʼ ame mok minya ju, ke ba mâtrân; ke helâe minya ge at a kuniny: 22ke ba mâtrânidrin hnyat a seven. Ke hwabodrin hia thö ame mok minya ju momo. 23Ame he ka öiö ia gadrin hnyi möt hmetu? anyin a hom hia hnen hnyat a seven me öiödrin. 24Ke haba Iesu ame ha ködrin ka habe, Hawa, öbun e ca monu can ang anyin a öbun e ca wâ hna sihnalimen me man maniny Khong? 25Anyin a ödra ka he ka möt hmetu thö, me adre me ca he ka hu öiödra, me ûham ta momo; ke adre me he ka helâ me ta je angela hnyi drany. 26Ke haba ge tavat adre mokcu, me hnödra hna he ka möt hmetu, hawa, öbun e ca munyi aû bi hnyi tusi anyi Mose, waleji hnyi hna ha hnyi uö ae ûdedö, ame ha kâu hnen Khong, ka habe, Inya ang Khongu Aberahama, me Khongu Isaaka, me Khongu Jekob? 27Haba e, me ca Khongon tavat adre mokcu, ke so bi tavat ae möt: e gan hmâ anyibun monu.

28Ke ame o but ke at sihnalimen, wale at ame long anyidrin ûhnenamö, ke a wâhmakhmetoâ hnen hna thu soâ ködrin, me e ame hnö e, ka habe, Ewa hnanyibu a bân hnyi ta je hnanyibu? 29Iesu ame thu, ka habe, Walang at a bân, ka habe, Isaraela lö, long ju, Haba Than a Khonguta, e thibi Than a khaca: 30ke hamâm he ka hnyok ka Than a Khongom ge hnyekom ae bekhöt, me hanom ae bekhöt, me oûnykûmâm ae bekhöt, me tang hwegiâm ae bekhöt. 31Walang loiny, ka habe, Hamâm he ka betenge ge at ame laba hakekenyi u helâ me u bi. E ba hnanyibu ae gan hon li hnanyibu e. 32Me ame ha kâu hnen at sihnalimen, ka habe, Awe, at ûne lö, e so hnâm hna ha, a e khaca thibi; ke ba ju ke at, ke hake e: 33ke haba he ka hnyok kâu ge hnyekon ae bekhöt, me oûnykûmânen ae bekhöt, me tang hwege ae bekhöt, me he ka betenge ge at ame laba hakekenyâ, helâ me e bi, awe, e ûnyi hnathu e hon ta je hut adre hudo bekhötâ, me ta je hut hia. 34Ke a wâ Iesu ae wisa hnen hna thu, me e ame ha kâu, ka habe, U ca ûsâkâûö me dökhu dokhon Khong. Ke ba hmetu at ae hwege he ka hnö e. 35Ke Iesu ame ûne hnyin uma kap me ha, ka habe, Ieû ge hnyat sihnalimen ödrin e ha, ka habe, haba Keriso, me Nöku Davita? 36Ke ame ha Davita ûnyi ge Hanu Kap, ka habe,

Haingen Than ka Tuhok, ka habe,

Laba ju hnyi ke keihök a metök,

Ke ne o but oge me wia je iwahnaihmiony möu, me hnân taben li hnyeûcam.

37Haba Davita ame hawâ e me Than; ke ame he ka kâmâu ka nokon bi? Me haba tavat ae se hia adre me long kâu me adre me senyin.

38Ke e ame ha kodra hnyi hnen hna ûne, ka habe, Ö ʼbun âu ge hnyat sihnalimen, hnyat a wedra he ka he me je ûkhaû ae beû, kʼ adre me he ka nom ju kodra hnyi ta je hna ûcû, 39ke wedra ta je tap ae nua hnyi ta je sunago, ke ta je tap ae beönua hnyi ta je bijeû: 40a hnyat adre me utâ je uma umen je safac, ke hic beû hmâ hnân iyawâ; ame he ka hu ka hnyat eling hnaûhango ae ti gan.

41Ke e ame laba cicö tangen mone, kʼ ame wâ hna khûâ mone ka hnyi tang hnen tavat ae se hia: ke se hia tavat tren omjeû adre me khûâ gânâ. 42Ke ame o but ke safac ae theduoc, me e ame khûâ li mone ae ûhnyûkong, a kodane. 43Me e ame hawâ laten me ha ködrin, ka habe, E hnathu inya oge me ha köbun, ae gan hmâ hna khûâ mone hnen safac ang ae theduoc hudrin hia tavat adre me khûâ ka hnyi tangen mone: 44anyin a ödra hia adre me khûö ûnyi hnyi unöngöt gadra; ke haba momo, me e ame khûâ ûnyi hnyi anyin theduoc ta je ûnyi hia ae hu gan, wale ûnyi hnân tuö anyin möt.

Currently Selected:

Mareko 12: IAAI

Highlight

Copy