Mareko 1

1WALANG hwâniny ûthumetu ae so anyi Iesu Keriso, a Nokon Khong.

2Helâ me hna sihnalimen ga Isaia perofeta, ka habe,

Wâ bi, inya oge me kunâ anyik ûthumetu hnyi hnyimâkâm,

At ame he ka ânyâwia dem gethen;

3Ifucin at ame hongot hnyi hnyebuba, ka habe,

Penapena ju gethen deny Than,

Owisa thö deny ta je gethen;

4Ame o but Ioane, at ame bapataiso hnyi hnyebuba me khetâ hna bapataisoiny ietra mʼ adre me thang degecâ but ta je hulö. 5Me ame he but kâu hnyei Juda hia, ke at Jerusalema hia; me e ame bapataisoi ödra hnyi wagewe Joridano, kʼ adre me ve omanenâ anyidra ta je monu. 6Ke leûnen kamela khaûö Ioane, ke e ame ka weikâ hnyin ge wen unen meno, ke haba an jeû, me hamon me haneiny hnyot. 7Ke e ame khetâ, me ha, ka habe, Ame he jem ke at a biliny ae man huk, e ca ûcû bi nya ka nom me thang hna hûkâlâ tangen li hnyeûcan. 8Inya oge me bapataisoi Öbun ge köiö; ke e ame he ka bapataisoi öbun ge Hanu Kap.

9Ke haba hnyi je bong eling ame o but Iesu ûheny Nazareta hnyi Galilaia, me ame bapataisoâ e Ioane hnyi Joridano. 10Ke e ame tiga ölö thö ûheny hnyi wagewe, me e ame wâ drany adre me khong ut, me Hanu ame gâ hon e helâ me biny: 11me ame o but hwan hofuc ûnyi hnyi drany, ka habe, U thibi Nokuk a oûnykûmik, inya oge me senyin köu.

12Haba Hanu ame ie kunâ e ka hnyi hnyebuba. 13Ke e ame laba hnyi hnyebuba fâte je bong, ame cubec e hnen Satana; ke tha e mē omeno ae hiny; ke haba ta je angela adre me bi athnyabainy. 14Ke hwaban hna cö Ioane, Iesu ame o hnyi Galelaia, ame khetâ ûthumetu ae so anyin Khong, ka habe, 15A hwâdâ but ûen, ke hakekeny jut dokhu dokhon Khong: ietra ju öbun, me kap ûthumetu ae so.

16Ke e ame he hnyi baten köiöiny Galilaia, me ō Simona, me Anederea liamekeiny me Simona, ödru me thong ert eû hnyi köiö: anyin a ödru li at thut. 17Haingö Iesu ame ha ködru, ka habe, He hotuk me oge me he ka wiʼ öbu me hnân thelo at. 18Me ödru me ie hna but ûtödrutang ert me he hoton. 19Ke e ame tiga he me e ame ō Iakobo nöku Zebedaio me Ioane a liamekeiny mē, ödru me laba hon hu me ena je ert. 20Me e ame ie hauʼ ödru minya: ke ödru me hna but kamödru a Zebedaio me je lathnyaba hon hu, me he hoton. 21Ke ödrin e he thö Kaperenauma ai; me e ame ie didro ka hnyi sunago hnyi sabath me ûne. 22Me adre me lâiâ hnen hna ûne: anyin a e ame nʼ ödra helâ me at ae tren man, ke ca helâ me hnyat sihnalimen. 23E eling hnyi umödra sunago ke at ae hu hanu ae kong; ke e ame hongot, ka habe, 24Iesu at Nazereta lö, ieû gam kohmun? hawa, u je o he ka ohiʼ ohmun? inya oge me wâhmakhmeto u, a u At ae Kap anyin Khong. 25Haba Iesu ame thawâ e me ha, ka habe, Ca mede bi, ke didrut ûhem hnyi hnyekon. 26Ke haba hanu ae kong ame osesebilâ e, me kuku hwege me didrut ûheny hnyi hnyekon. 27Ke ödra hia adre me lâiâ, me ûhne-namököuâ, ka habe, Ieû ong? hna ûne ae teb ûnyi! anyin a e ame muso ta je hanu ae kong hnen man, me ödrin e long kâu. 28Me ame ie lung igigilo ka hnyi je ke keihen hia hnyei Galilaia.

29Ke adre me didrut ûhedra hnyi sunago, me ödrin e ie didro, tha ödrin me Ioane me Iakobo ka hnyi uma umo Simona me Anederea. 30Ke haba hinyen öiö Simona ame mokulec mok a kahwa, me adre me ie omanenâ kâu mok anyin momo: 31me e ame he me kât hnyamen momo, me otilâ; me ame ie hia but kahwa, me e ame huliwa ködrin.

32Hnyi sahac, ke ame he but ka dit seûno, me adre me hom but kâu ta je komok hia, me tavat a dilic ödra demoni. 33Me ame ûkhacaköu thö taun hia hnyi hwanuma. 34Ke e ame omelö ta je mok ae ve bongon, me obâ ta je demoni ae se hia; ke e ame ca hna bi ta je demoni he ka fuc, anyin adre me wâhmakhmeto but e.

35Ke haba nyi, ke tiga bec ka o thö seûno, me e ame höihöi thö me didrut, me he ka hnyi dok ae ba aten, me hic eling. 36Me ame he hoton Simona me tavat a tha ödrin mē; 37ke ödrin e wâ but e, me haingödrin kâu, ka habe, Ame elöm u tavat hia. 38Ke haingen ködrin, ka habe, E so otin e he ka hnyi ke je taun ehele, mʼ inya he ka khetâ minya eling; anyin a oge me o but hobi kâu e. 39Me e ame dit ka hnyi umödra je sunago hnyi Galilaia hia, kʼ ame khetâ hofuc me obâ ta je demoni.

40Me ame o but kâu ke lepera, ame khöu kâu me ciboucâ kâu, me ha kâu, ka habe, U je ne wem me khanö u he ka osoi nya. 41Me e ame hnyok kâu, me hinôbeny me kâlâ e, me ha, ka habe, E bewek; u ma so but. 42Me ame ie hia but lepera gan, kʼ ame so but. 43Ke e ame hûna hwegiâ e, me ie kunâ e, me ha kâu, ka habe, 44Wâ eâu u nye ha ka ke at: ke he thö, omanenö u thö ka at bihut, me ham hna hûna hnö Mose hnân haten ködrin, ge hna okalaöti u. 45Ke e ame didrut, me hwân he ka khetâ me olungâ, me omanenâ ûnyi e, me ca khana hmetu Iesu he ka he manen ka hnyi taun, me e ame laba ju hnyije dok ae ba aten: ke adre me ve o kâu ûhedra hnyi je ke keihen hia.

Currently Selected:

Mareko 1: IAAI

Highlight

Copy