Mika 6

1LONG ju öbun walang ang hna ha hnö Iehova, ka habe Todrö, ivino ju hnyi hnyimakan je bucen, me me long ifucâm hnen je hut. 2Long ju öbun je bucen lö, ivino anyi Iehova, me öbun je taben a tethmâiny hmeledrany: anyin ae hu ivino anyi Iehova me lakeiny, ke e ame he ka ûhnei me Isaraela. 3Lakeik lö, ieû o ge ânyâ köu? ke ieû o ge osenyini u hnyin? khûö nya but. 4Anyin oge hum u ûnyi hnyi hnyei Aigupito, me omeli u ûnyi hnyi hnyaba ûthaluo; ke oge kunö Mose me Arona, me Miriama hnyi hnyimakâm. 5Lakeik lö, ûnykûme thö walang ang ge hna elâm gan hnö Baraka than Moaba, ke hnö Balaama nöku Beora hna thu kâu; ûnykûme ju hwân hnyi Sitima ke ne o but huyi Gilegala, me me khanʼ öbun Hwakecin ae wisa anyi Iehova. 6Ieû oge me he ka oâ hnyi hnyimakö Iehova, ke khudrung ka Khong ae beonuâ? hawa, oge me he ka hom kâu je hudiny leû, je nak kau a khaca hunainy? 7Hawa, ame he Iehova ka senyin ge je thauzan mamoe baga, ke je ten thauzan wagewe wakaco? hawa, oge me he ka ham nokuk a bân, me hwaban hnok hna hanyâûâ, a wan unyik, me hwaban hulöiny hanuk bi? 8At lö, e ame hia but omanenâ köu ûnyi ae so ke ie ke ûnyi ame we Iehova gam, ke so bi he ka ânyâ wisa, me hnyokâ ibetengiö, me tha he me Khongom ke hnyok ae hnyikânâ?

9Ifuci Iehova ame hongot hnyi taun, kʼ ame he at ae metâ ka wâ iâm: long ju öbun öso, ke at ame muso e. 10Hawa, e bala bi tang omjeû a hwaban hulo eio hnyin uma umen at ae kong, ke efa ae hâhâ a ûnyi ae kong? 11Hawa, oge me he ka so ke e unyik tulut ae hwali, ke tangen ta je ûnyi hnân tuluto ae thoi bi? 12A unöngötö tavat tren omjeû ge ûokonguny, kʼ ame fuc thoi tavat adre me labâ e, kʼ ame iyawo je bohmödra hnyi je hnyimödra. 13Anyin a wale oge hia but kuc u me takû u ge aat ae gan hmâ; ke oge hia but öba wan gam can ânyâm ta je hulo. 14U me he bi ka han, me u me ca he bi ka sekom; ke ame he ka e bi hnyi wanbâm hna hom ûhnyûkongu u: ke u me he ka sukhöunâ omjeû, kʼ ame ca he bi ka sot hnâm hna sukhöunâ; ke haba ûnyi u me hom, me oge me he bi nya ka hna ka hnyi hele vat. 15U me he ka tä, ke u me ca he bi ka menu: u me he ka ututo je elaio, ke u me ca he ka sûâ wakacoiny; ke wan vine, ke u me ca he ka ic wainainy. 16Ke adre me tuö je hnanyibu anyi Omeri, ke ta je ûnyi j hia a ânyâ ge lap anyi Ahaba, ke öbun e hnu hoton hnödra hna ûhnenamö: waleling me oge me öba wan gam, ke wia tavat adre me labâ e me me hnân jû; ke öbun e he ka hom tilâ hna haikongoâ lakeik.

Currently Selected:

Mika 6: IAAI

Highlight

Copy