Mika 1

1WALANG hofuc ame o ko Mika at Moresa hnyi ûö Jotham, me Ahaza, me Hezekia, a je than Juda, wale e ame wâ ge Samaria me Jerusalema.

2Öbun ta je hnyei hia lö, long ju; hmeledrany lo, ke ta je ûnyi hia hnyin e, tevehlöng ju: ke so ame he Than Iehova ka ohnathoâ ûcûbun, wale Than hnyi umen uma ae kap. 3Anyin a wâ bi, ame he Iehova ka he ûnyi hnyi hnen, me utut, me ututo je dok ae gorany hnyi hmeledrany. 4Me ame he je bucen ka köiö hnyi hmelen, kʼ ame he ka hmouca hnyigöulen je bucen, helâ me wasu hnyi meic, ke helâ me köiö ame hingölö hnyi dok ae hwatapkolu. 5Ame o but ta je ûnyi hia eling can hna hanyâûâ hnö Jekob, ke can je hulo anyin lap anyi Isaraela. Ie hna hanyâûâ hnö Jekob? hawa, ca Samaria bi? ke ie je dok ae gorany ga Juda? hawa, ca Jerusalema bi? 6Anyin a wale oge me he ka wia Samaria me me helâ me hna digic thatûnyi hnyi utkânâ, ke hnân te vine hnyin, ke oge me he ka hagutâ je veto hnyin e ka hnyi hnyigöulen bucen, me omanenâ je taben e. 7Ke adre me he ka thu omomono je idolainy hia thithö, ke adre me he ka thong degecâ ge meic je troban hia, ke oge me he ka öba wan je khongon hia: anyin a e ame ûkhöûnâ e ge troban momo hnyi gethen, kʼ adre me he ka he hmetu kʼ ame troban momo hnyi gethen. 8Can e oge me he ka tenge tot me huku tenge, ke oge me he ka he monu ke ba ûkhaû me he thu; oge me he ka tenge tot helâ me luko, ke tenge thungâu helâ me ta je iaena. 9Anyin a ca hnân eny ta je aat gan: anyin a o but ke ne o but hnyi Juda; kʼ ame o ke ne o but ka hnyi homagouleny ik hnyei a Jerusalema. 10Ca he bi ka ha hnyi Gatha, ke ca tenge bi: oge hia but seset hnyi kânâ hnyi Bethe-le-Afera. 11He thö hnyi hmehma ke ba ûkhaû, at ame laba hnyi Safira: ame ca o but at ame laba hnyi Zaanan; kʼ ame he tenge tot hnyi Beth-ezel ka ohia gabun at ame tethmâ. 12Anyin a haba at ame laba hnyi Maroth, me ame kueny ka halubahingen hnahic: anyin ame utut ûnyi ae kong ûnyi ga Iehova ka hnyi homagouleny Jerusalema. 13At ame laba hnyi Lakisa lö, ca ju kariota ka hnyi meno ame he logot: haba momo e, me hwân hulo ka hluiny Ziona; anyin adre me wâ unyâm je hna hanyâûâ hnen Isaraela. 14Anyin a wale u me he ka ham bwihlany ûhûne kö Moresa-gatha: kʼ ame he je lap anyin Akiziba ka helâ me thoi ka je than Isaraela. 15At ame laba hnyi Maresa lö, oge me he bi nya ka hom köu at ame he ka hum u: kʼ ame he hmanenanginy Isaraela ka o ka hnyi Adulama. 16Ohia but leûnen bâm ke giâ bi; can lakom u me betenge gadrin: ogânâ but dok ae ba leûnen helâ me aeto; anyin adre me he but ka bâ ûhedra unyâm.

Currently Selected:

Mika 1: IAAI

Highlight

Copy