Mataio 9

1KE e ame ölö ka hnyi galu me he nulâ but, ame o thö ka hnyi iny hnyei. 2Ke wâ bi, adre me sam but kâu at ae mat ame mokut hon hnen: ke haba Iesu ame wâ anyidrin labageju me e ame ha ka at ae mat, ka habe, Nöhuk, senyin dö; adre hia but hna degecâ ta je hulö gam. 3Ke wâ bi, keihen hnyat sihnalimen, adre me ha eû hnyi je hnyekudra, ka habe E bi gan dut at ang ka Khong. 4Ke haba Iesu ame wâhmakhmeto je ûnykûmenödrin me e ame ha, ka habe, Ieû gabun öbun e ûnykûme mono eû hnyi je hnyekubun? 5Anyin a ieû ae hâhâ, he ka ha, Adre hia but thang ta je hulö gam; a me ne he ka ha ka habe, Todrö me he thö? 6Ke so bi möbun e he ka wâ ae tren man Nokon at eang hmeledrany he ka thang ta je hulö (me e ame ha ka at ae mat, ka habe) Todrö, hom minya thö hnâm me he thö ka hnyi umâm uma. 7Me e ame todrö me he ka hnyi umen uma. 8Ke ame wâ e hnen tavat ae se hia, me adre me lâiâ me ogânâ Khong, wale at ame ham man a helâe ka at.

9Ke haba Iesu ame he ûheny e, me e ame wâ at ame laba hnyi dok adre bi fat hnyin, Mataio ien: me e ame ha kâu, ka habe, He hotuk. Me e ame todrö me he hoton.

10Ke e ame laba eiö hnyin uma, ke wâ bi, ame he but ta je telona ae se me tavat ae kong he ka tha laba me Iesu me laten. 11Ke haba ta je Faresaio ödrin e wâ, me ödrin e ha ka laten, ka habe, Ieû ge At ûne köbun ame tha han me ta je telona me tavat ae kong? 12Ke a long ut Iesu, me e ame ha ködrin, ka habe, E ca ûnyi hnathu at ae tren bubuny ka tavat ae hwege, ke so bi ka tavat a ödra mok. 13Ke he thʼ öbun ka nâ bongon ang, ka habe, Wek a ibetengiö, ke ca hut bi: anyin oge me ca o he ka hawâ tavat ae wisa ke so bi tavat ae kong.

14Me ame o but kâu latö Ioane, ödrin e ha kâu, ka habe, Ieû ang a ohmun osehia but me ta je Faresaio labö ânyâ ca han, kʼ ame ca hnyi ânyâ ca han lâtâm. 15Ke haba Iesu ame ha ködrin, ka habe, Hawa, e khana lahanen at a tep faipoipo he ka tenge, e ka tiga e unyidrin at a tep faipoipo? ke ame he ka o je bong me adre me he ka hom dö gadrin at a tep faipoipo, me wale ûen ödrin e he ka ânyâ hnyin ca han. 16E ba at ame ûtibetköuâ ecmano ae hât ka hnyi ûkhaû ae bobot ut; anyin a haba ecmano hnân okhötâ ame okongoâ ûkhaû me ame gan hmâ but mou. 17Ke adre me ca he minya ka hingâlâ waina a teb ûnyi ka hnyi je kaia a unen meno a ûnyi but adrem: wâ e nye hmouca but ta je kaia, me hingölö but waina, me kong ut je kaia a unen meno: ke adre me hingâlâ waina a teb ûnyi ka hnyi je unen meno ae hât, me ame tha so hia but.

18E ame tiga ha ta je ûnyi eling ködrin, me wâ bi, ame o but ke at ae tren musi, me khudrung ju kâu, me ha, ka habe, a mokcu nokuk hlu walang ang: ke mē aiö u he ka ip hnyamâm hon, me me mödrut. 19Haba Iesu ame todrö me he hoton, me laten minya. 20Me wâ bi, ke momo ame ka hingölö dra hnyi twelv ta je huna ame he hnyi hotu Jesu me kâlâ obiny ûkhaûen: 21anyin a e ame ha eû hnyi hnyekon, ka habe, Oge ne he thibi ka kâlâ ûkhaûen, me oge me he ka möt. 22Haba Iesu ame hwio thö me wâ momo, me ha, ka habe, Nokuk lö, senyin dö, u je mödrut hnen ânyâm labageju. Ke ame mödrut momo hnyi ûen eling. 23Ke ame o but Iesu ka hnyi uma umen at musi, me wâ hnyat ödrin e tûö köwi, me tavat ae se adre me mede, 24me e ame ha ködrin, ka habe, Vese but öbun: a ca mok bi hlu, e ame mokut. Me adre me hluma e. 25Ke a hia but obâ tavat a ödra se hia, me e ame didro me kât hnyamen; me ame todrö hlu. 26Ke ame lung igigilo hnyi hnyei hia eling ûnyi e.

27Ke haba Iesu ame he ûheny e, me ame he hoton li at ae wadröu, ödru me hongot, ka habe, Nöku Davita lö, betenge gahmu. 28Ke e ame didro ka hnyi uma, me ame he but kâu li wadröu: ke haba Iesu ame ha ködru, ka habe, Hawa, öbu me ûnykûme me e khanö nya he ka ânyâ e? Ke ödru me ha kâu, ka habe, E, Than. 29Me e ame kâlâ li emaködru, me ha, ka habe, Ame he ka e bi köbu helâ me hnöbu hna labageju. 30Me ame bwela but li emaködru. Ke haba Iesu ame hûna hwegiâ ködru, ka habe, Wâ eâu, e nye khana thö ke at. 31Ke ödru me didrut me ha olungâ e hnyi hnyei hia eling.

32Ke ödru me tiga didrut, wâ bi adre me hom kâu ke at ae hum a delec demoni. 33Ke a hia but obâ demoni me ame fuc dö hum: haba tavat ae se hia adre me lâiâ me ha, ka habe, Adre me ca wâ balua ehac helâe hnyi Isaraela. 34Ke haingen ta je Faresaio, ka habe, E ame obâ ta je demoni ûnyi ge tuhan ta je demoni.

35Ke haba Iesu ame vheno ta je taun me ta je hnyaba hia, ame ûne hnyi umödra ta je sunago, me khetâ ûthumetuiny dökhu ae so, me osoâ ta je mok hia, me ta je sēnyin hia. 36Ke e ame wâ tavat ae se hia, me e ame betenge gadra, anyin a ödra sēnyin dut, adre me ve se but, helâ me ta je mamoe e ba at ame tuö. 37Me e ame ha ka laten, ka habe, E gan hmâ widrany, ke wakhalet thibi tavat huliwan. 38Anyin a wale he thʼ öbun ka khöû ka Thaniny widrany me me he ka kunâ tavat huliwa ka hnyi anyin widrany.

Currently Selected:

Mataio 9: IAAI

Highlight

Copy