Mataio 4

1KE haba Hanu ame hum Iesu ka hnyi hnyebuba, e me he diabolo he ka cubec e. 2Kʼ ame ca han hnyi fâte je lany ke fâte je lit, ke hwaban dö e, me ame mekihnânem. 3Me ame o but kâu at ame ûcûbic, me ha, ka habe, U je ne Nokon Khong, ha thö, me me areto but je veto ang. 4Me e ame thu me ha, ka habe, Adre hia but sihnalimen, ka habe, Ame ca he ka möt at ge areto thibi, ke hnen bi ta je hofuc hia ame o but ûnyi hnyi hnyimen Khong. 5Haba diabolo ame hom e ka hnyi taun ae kap, me ip e hon ban uma kap, 6ke ha kâu, ka habe, U je ne Nokon Khong, utut: anyin adre sihnalimen, ka habe,

E ame he ka hûna anyin ta je angela hnân hobi köu:

Kʼ adre me he ka kap tilö u ge je hnyamödra,

Wâ e nye thö thö hnyeûcam hnyi veto.

7Haba Iesu ame ha kâu, ka habe, Adre hia but sihnalimen minya, ka habe, U me ca he ka cubec Than a Khongom. 8Ke haba diabolo ame hom hmetu e ka hnyi bucen ae beû hmâ, me omanenâ kâû ta je dökhu hia eang hmeledrany, ke ta je hmanenanginy; 9me e ame ha kâu, ka habe, Oge me he ka ham köu ta je ûnyi e, u je ne he bi ka nom me khudrung ju könya. 10Ke haba Iesu ame ha kâu, ka habe, Satana lö, kec dö: anyin adre hia but sihnalimen, ka habe, U ma he ka khudrung ka Than a Khongom, me bi athnyabainy thibi. 11Me haba diabolo ame hna but e; ke wâ bi, ame o thö ta je angela me bi athnyabainy.

12Ke haba hnyi ûen e ame long a gʼ adre hia but cö Ioane, me e ame he but Galilaia ai; 13ke e ame hna but Nazareta, me he ka laba hnyi Kaperenauma, hnyi hobat köiö, hnyi hnyigoulen Zebulona me Nafatali: 14me me hwâdâ hna ha ga Isaia perofeta, ka habe,

15Hnyei Zebulona me Nafatali,

Cicö köiö, hoton Joridano,

Galilaia iny ke je hnyei,

16Haba tavat adre me laba hnyi menekholom

Adre me wâ melam ae gan,

Ke haba tavat adre me laba hnyi ke keihen hnyei a hmenon mok,

Ame o but melam kodra.

17Hwân hnyi ûen e, Iesu ame hwân he ka khetâ me ha, ka habe, Ietra ju öbun; anyin ae hakekeny jut dokhon drany.

18Ke e ame vheno hobat köiö Galilaia, ke e ame wâ li liamekeiny, jia Simona ke ien Peteru, me Anederea a keiny, ödru me thong ert eû hnyi köiö; anyin a ödru li at thut. 19Ke e ame ha ködru, ka habe, He hotuk, me oge me he ka wiʼ öbu me hnân thelo at. 20Me ödru me ie hna but je ert me he hoton. 21Ke e ame he ûheny e, me e ame wâ ke li liamekeiny, jia Iakobo nöku Zebedaio, me Ioane a keiny, ödru me tha laba me Zebedaio a kamö-dru hon hu, ödrin e ena ûtödrin je ert; ke e ame haʼ ödru. 22Me ödru me ie hna but hu me kamödru, me he hoton.

23Ke Iesu ame vheno Galilaia hia thithö, ame ûne hnyin umödrin je sunago, me khetâ ûthumetu a soiny dökhu, me ohia ta je mok hia thithö, me ta je sēnyin hia hnyi hnyei. 24Ke e ame lung igigilo Suria hia thithö: me adre me hom but kâu tavat ae mok hia thithö, wale ame takû ödra ge je ve mok me vec, tavat a delec demoni, me ing, me mat, me e ame omeli ödra. 25Haba tavat ae se hia adre me he hoton e, ûhedra Galilaia me Dekapoli me Jerusalema me Juda me ke keihen hoton Joridano.

Currently Selected:

Mataio 4: IAAI

Highlight

Copy