Mataio 24

1HABA Iesu ame didrut ûheny hnyi uma kap; me ame o but laten he ka omanenâ kâu je ke keihen hna op uma kap. 2Haba Iesu ame ha ködrin, ka habe, Hawa, öbun e wâ but ta je ûnyi hia eang? e hnathu inya oge me ba köbun, ka habe, Ame ca he bi ke veto ka mokut hon ke veto, ke adre me he ka thö degecâ hia.

3E ame tiga laba hon bucen Elaio, me ame o duöng kâu laten, me ha, ka habe, omanenâ thö kohmun ame he ka o kehö ta je ûnyi eî ke ieû haten ge hnâm hna he ka o hmetu, me ûnyi minya a obiny hmeledrany? 4Ke haba Iesu ame thu ködrin, ka habe, Wâ eâu, wâ e nye omonu öbun dut ke at. 5Anyin ödra se hia adre me he ka o hnyi iök me ha, ka habe, Inya ang Keriso; me omonoâ tavat ae se hia. 6Ke öbun e he ka long ge ta je vat, me hoon ta je vat: wâ eâu, öbun nye he ka ot, anyin ame he bi ka o ta je ûnyi e, ke tiga hia bi obiny. 7Anyin ame he ka tot ke hnyei ka ke hnyei, me ke dökhu ha ke dökhu; ke ame he ka hu je hmiâ, me hwiöi hnyi ke je dok. 8Ke haba ta je ûnyi eling, me wale hwân ta je vec. 9Me adre me he ka hnʼ öbun dut ka tavat ûöveci, ke adre me he ka hlingʼ öbun: ke adre me he ka huköti öbun ta je hnyei hia thithö can iök. 10Me ame he ka thö thö tavat ae se hia, me ûalecuödraköu ödra, me bi iwahnaihmiony. 11Ke ame he ka o ta je perofeta thoi ae se hia me omonoâ tavat ae se hia. 12Ke can hnödra hna osehia hulö, ame he ka katebu ibetengiö anyin tavat ae se hia. 13Ke haba at ame he ka tethmâ ke ne o but obiny, me e ame he ka möt. 14Ke adre me he ka khetâ ûthumetuiny dökhu ang hnyi hmeledrany hia hnân ohnatho ka ta je hnyei; me ame he ka o but obiny.

15Awe, öbun ka wâ ûnyi ae ikiki at ame okongo, ame tot hnyi dok ae kap, waleji a ha Daniela perofeta, (wâhmakhmeto ju hnen at ame aû), 16haba hnyi ûen e, e so ame he tavat adre me laba hnyi Juda ka kec ka hnyi bucen: 17ke haba at hnyi hon uma, e so e me ca utut he ka hok ûnyi ûnyi hnyi hnyin umen uma: 18ke haba at a belök, e so e me ca hmetu bi he ka hom anyin ûkhaû. 19Ke ekölö ge tavat a ödra erkin, me tavat adre me ûasin hnyi je bong eling. 20Ke hic ju öbun, mʼ öbun e ca he ka kec hnyi ûen megic, ke sabath: 21anyin ame he ka o vec ae gan hmâ e ba helâe ehac hnyi hwân hmeledrany ke ne o but walang ang, kʼ ame ca he bi ka helâe hmetu. 22Ke adre ne ca owakhaletâ ta je bong, me ba at ame he ka möt: ke so bi adre me he ka owakhaletâ ta je bong e ge tavat adre ûca. 23Ke a ne ha köbun ke at, ka habe, Wâ bi, Keriso but ang, ke, Wale bi e; ca kap öbun. 24Anyin ame he ka o je Keriso thoi, me je perofeta thoi, me adre me he ka omanenâ ta je haten ae gan, me ta je ûnyi hnân lâiâ, mʼ adre me he ka omono tavat adre me ûca a ne ca pason. 25Wâ bi, oge hia but ha bânâ köbun. 26Anyin a wale, ödra ka he ka ha köbun, ka habe, Wâ bi, e but hnyi hnyebuba, ca he thʼ öbun: ke Wâ bi, e but hnyi je hnyeûle eiö, ca kap öbun. 27Anyin a haba hucuce ame o thö ûheny jimeyö, kʼ ame umumelam jio; kʼ ame he ka helâe, e ka o hmetu Nokon at. 28Haba hnen ta je komok, me wale dok ame ûkhacaköu ta je aeto hnyin.

29Ke hwaban vec hnyi ûen eling, ame he ka ie menekholom but seûno, ke ame ca he hmetu ka melam tehi, ke ame he ka kolu but ta je okhû, ke adre me he ka jijing ta je man hnyi drany: 30me ame he ka manen hnyi drany haten Nokon at: ke ame he ka ûtengiö ta je tribu hia eang hmeledrany, ke adre me he ka wâ Nokon at ame o hon ta je ûlâiny drany, tha e me man me hmanenang ae gan hmâ. 31Ke e ame he ka kunâ anyin ta je angela me ifucin khoto ame mea, me adre me he ka ûkhacaköuâ thö hnen ta je hna ûca ûnyi hnyi je ang a vak, hwân hnyi ke can drany ke ne o but ka hnyi ke can.

32Ke nâ thʼ öbun ûhöûcû me imeta: e tiga but je anginy ke hlau je lan, me khanʼ öbun ae hakekeny jut honivakeny; 33ke helâe minya öbun, öbun ka wâ thö ta je ûnyi hia thithö e, khanʼ öbun dö ae hakekeny jut, ke e but ang hnyi hwanuma. 34E hnathu inya oge me ha köbun a gʼ ame ca he ka ie hia dö eang, me ame he ka hwâdâ ta je ûnyi hia e. 35Ame he ka hia drany me hmeledrany, kʼ ame ca he bi ka hia hok ta je hofuc. 36Ke haba bong me awa eling, me ba at ae khana, ke ca khana minya bi ta je angela ethö hnyi drany, ke Nokon, ke hake Kamen thibi. 37Ame he ka helâ me je bong bongu Noa ioiny Nokon at. 38Anyin a hnyi ûen ae tiga ca o thö uoû, adre me labö han me ic, me faipoipo, me ûham ta momo, ke ne o but hnyi bong Noa ame didro ka hnyi hnyin hu, 39ke ca khanʼ ödra bi ke ne o but ame o thö uoû, me ame tha ohiʼ ödra hia but; ke ame he ka helâe, e ka o hmetu Nokon at. 40Hnyi ûen eling ame belök li at a lo; adre me he ka hom khaca, me hnen biju khaca: 41lo li momo ame he ka tha hnyi khenyi hwit; adre me he ka hom khaca, kʼ ame he ka hnen biju khaca. 42Anyin a wale, hmâkâ thö: anyin ae ca khanʼ öbun ûen ame he ka o hnyin Tuhö-bun. 43Ke wâhmakhmeto ju öbun ûnyi ang, a ga ne wâ at ae tren uma hna hmak hnyi lit ame he ka o hnyin at ae venöu, me ame ne hia but hmâkâ, me ca hna bi kodra he ka kia umen uma. 44Anyin a wale laba penapena thʼ öbun: anyin a hnyi ûen öbun e ca ûnykûme bi ame he ka o but Nokon at. 45Ewa athnyaba ae hnathu me metâ, wale hnen tuhan hna otilâ he ka muso hnyaban, he ka khenâ jeû ködrin hnyi je hing ûen cici? 46Hnen hnahic athnyaba eling, e ka o tuhan ka wâ a gʼ ame ânyâ helâe. 47E hnathu inya oge me ha köbun, e ame he ka otilâ e he ka muso anyin ta je ûnyi hia. 48Ke a ne ha athnyaba ae kong eû hnyi hnyekon, ka habe, E tiga bec Tuhok; 49me hwân he ka kot je athnyaba a lahanen, me he ka han me ic unyin tavat adre ic me monu; 50me ame he ka o tuhan athnyaba eling hnyi bong e ame ca ûnykûme, me hnyi ûen e ame ca wâhmakhmeto hnyin, 51me ame he ka subâ luâ e, me ha jekhon unyin tavat thoi hnyok; ame he ka tenge eling me ûgiö ganyon.

Currently Selected:

Mataio 24: IAAI

Highlight

Copy