Mataio 10

1KE e ame hawâ laten a twelv, me e ame ham ködrin musi hon ta je hanu ae kong, he ka obʼ ödra, ke he ka osoâ ta je mok hia, me ta je sēnyin hia.

2Ke walang ien ta je aposetolo a twelv, ka habe, A bö Simona, ke ien minya Peteru, ke Anederea liamekeiny mē, ke Iakobo nöku Zebedaio, ke Ioane liamekeiny mē; 3ke Filipo, ke Batolomaio, ke Toma, ke Mataio a telona, ke Iakobo nöku Alefaio, ke Thadaio, 4ke Simona at Kanana, ke Juda Isakariota, at ame alecuâ e. 5Wale hnyat a twelv a kunʼ ödrin Iesu me hûna ködrin, ka habe,

Ca he öbun hnyi gethen deny Aten ta je hnyei, ke ca dit bi ka hnyi ke taun anyin at Samaria: 6ke so bi, he thʼ öbun ka ta je mamoe a hia hanen lap anyi Isaraela. 7Ke haba hnyi ûhebun, khetâ thö me ha, ka habe, E hakekeny jut dokhon drany. 8Omelö thö ta je mok, ke omelö hmetu thö tavat adre me mokcu, ke okhabalavâ but ta je lepera, ke obâ but ta je demoni: öbun e hia but kap baûâ but. 9Ca hok gol, me sileva, me bras hnyi tangöbun je tangen mone; 10me ong tang hobi kâu he ka he, me ûsa lo ûkot, me je tangen hnyeûca, me uci: anyin ae ûcû at huliwa he ka kap jeû, 11Haba ta je taun me ta je hnyaba öbun e he ka o ka hnyin, elelâm dö at ae ûcû hwakecin; ke laba ju e ke ne o but öbun e he ûheny e. 12Ke öbun ka didro ka hnyi ke uma, italofa ju mödra. 13Ke a ne so uma eling, e so e ame ta but hon, hnobun hna ha hnahicâ e: ke a ne ca so bi, e so he ka hmetu köbun hnobun hna ha hnahicâ. 14Ke kaba at ame ca köp öbun, kʼ ame ca long hobun ta je hofuc, awe, öbun ka didrut ûnyi hnyin uma eling ame ne taun, jijingâ but kânâiny je hnyeûcabun. 15E hnathu, inya oge me ha köbun, ka habe, Ame he ka hâhâ ka hnyei Sodoma me Gomora hnyi bong owisa hon taun eling.

16Wâ bi, inya oge me kunʼ öbun helâ me ta je mamoe hnyi wanben ta je luko: anyin a wale metâ but öbun helâ me ta je on, me menyik helâ me ta je biny. 17Ke wâ eâu tavat: anyin adre me he ka hnʼ öbun dut ka tavat ûhnei, ke adre me he ka kuc öbun hnyi umödra ta je sunago; 18eke, adre me he ka lili öbun ka hnyi hnyimakan tavat musi me ta je than can inya, hnân ohnathoâ ködrin me Aten ta je hnyei. 19Ke ödrin ka he ka hnʼ öbun dut, ca ûnykûme bi, ka habe, adre me he ka kâmâu hna ha, ke ieû: anyin adre me he ka ham köbun ûnyi hnân he ka ha hnyi ûen eling. 20Anyin a ca öbun hnyat öbun e ka ha, ke so bi Hanon Kamöbun at ame fuc eû hnyi je hnyekubun. 21Ame he keiny ka hna liamekeiny mē ka mok, ke helâe minya kamen ka nokon: kʼ ame he lakon ka tot ka kamödrin me hinyödrin, mʼ adre me he ka hlingʼ ödru. 22Ke ame he tavat hia thithö ka hûkötö köbun can iök: ke haba at ame he ka hokhnyok ke ne o but hnyi obiny, me ame he ka möt. 23Ke ödra ka oveci öbun hnyi ke taun, kec dö ka hnyi ke taun: anyin ae hnathu inya oge me ha köbun, ka habe, Öbun e ca he ka vheno hia ta je taun hnyi Isaraela, ke ne o but ame o thö Nokon at.

24E ca beönua at adre nâ hon at ûne, ke ca beönua athnyabainy hon tuhan. 25E so ka at adre nâ ame ne tha ûcû me at ame nâ e, ke e ka tha ûcû hlu me tuhan. Adre ne hia but hawâ at ae tren hnyaba, ka habe, Belezebuba, hawa, adre me ca he minya ka hawâ ien aten hnyaban! 26Anyin a wale, ca ot bi gadra: anyin ae ba ûnyi adre me ikhâlâ ame ca he ka manen; ke ba minya ûnyi ae iyong adre me ca he ka wâ. 27Haba ûnyi oge me ha köbun hnyi menekholom, ha thʼ öbun hnyi melam: ke haba hnobun hna long ge je hnyikönyöbun, khetâ thö hon ban je uma. 28Ke ca ot bi ge tavat adre me hlingâ unyin, ke ca khanʼ ödra bi he ka hlingâ hanu: ke so he ka outen at ae khana he ka ohnaûhangoâ unyin me hanu hnyi gena. 29Hawa, adre ca ûco li wahelö hwaban asari? ke ba at gadru ame he ka kolu ka hnyi hon kânâ, e ka ca musi bi Kamöbun: 30ke adre hia but aû hia je leûnen böbun. 31Anyin a wale, ca he öbun ka ot, anyin a öbun beönua hon ta je wahelö ae se hia. 32Anyin a wale, haba at ame he ka haiö nya hnyi hnyimakan tavat, me oge me he bi nya ka hâiâ e hnyi hnyimakan Kamök ethö hnyi drany. 33Ke haba at ame he ka ivinö nya hnyi hnyimakan tavat, me oge me he bi nya ka ivinoâ e hnyi hnyimakan Kamök ethö hnyi drany.

34Ca ûnykûme bi öbun, ka habe, oge me o but he ka kunâ ûsoköu ka hnyi hmeledrany: oge me ca o but he ka kunâ fao-köu, ke so bi hele vat. 35Anyin oge me o but me me he ka imouköu nokon me; kamen, ke hlu me hinyen, ke ûngon me ûngon: 36ke haba ta je iwahnaihmiony me at, me ame he ka e bi hnyi hnyaban. 37Haba at ame betenge ka kamen me hinyen huk, me ca ûcû könya; ke haba at ame betenge ka nokon baga me nokon hlo huk, me ca ûcû könya. 38Ke haba at ame ca hom bi anyin satauro me he hotuk, me ca ûcû könya. 39Haba at ame wâ anyin möt, me ame he ka ohia e; ke haba at ame ohia anyin möt can inya, me ame he ka wâ e.

40Haba at ame köp öbun, me ame köp nya minya, ke haba at ame köp nya, me ame kap at a kunö nya. 41Haba at ame kap perofeta hnyi ien perofeta, me ame he ka hu kâu hwaban perofeta; ke haba at ame kap at ae so hwakecin hnyi ien at ae so hwakecin, me ame he ka hu hwaban at ae so hwakecin. 42Ke haba at ame he ka habelen at ae ûhnyûkong eang ge utköiö ae katebu thibi, hnyi ien at ûling, e hnatho inya oge me ha köbun, ka habe, ame ca he ka hia hwaban hobi kâu.

Currently Selected:

Mataio 10: IAAI

Highlight

Copy