Luka 7

1KE e ame umo hwan ta je hofuc hnyi hnyekönyen tavat, me e ame didro ka hnyi Kaperenauma.

2Ke a mok athnyaba a oûnykûminy keneturio, kʼ ame he but ka mokcu. 3Ke e ame long hwakeci Iesu, me e ame kunâ wahingatiny at Juda kâu he ka sumâtâ e, me me he but he ka omelö athnyabainy. 4Ke ödrin e o but kö Iesu, me sumâtâ ûjengö e, ka habe, E ûcû at eling mʼ u me he ka ânyâ ûnyi eang kâu: 5anyin a e ame betenge ge ita hnyei, ke a hia but otilâ umöhmun sunago. 6Haba Iesu ame tha he mödrin. Ke e hakekeny jut ka hnyi uma, me haba keneturio ame kunâ kâu je lahanen he ka ha kâu, ka habe, Than lö, mē todru: anyin a iny ca ûcû bi, mʼ u me he ka didro ka hnyi umök uma: 7wale mʼ oge me ûnykûme a iny ca ûcû bi he ka he but köu: ke so u me he ka ha thibi hofuc, me ame he ka mödrut athnyabaik. 8Anyin a inya ang at ame long musi, ke hu gak je soja: ke oge me ha ka ke at, He thö, me e ame he; ke ka ke at, Aiö u, me e ame o könya; me ka athnyabaik, Ânyâ thö e, me e ame mâdrâ. 9A long ut Iesu ta je ûnyi e, me e ame lâiâ, me hwio me ha ka tavat ae se hia adre me he hoton, ka habe, Oge me ca wâ bi hnyi Isaraela labageju ae gan helâe. 10Ke haba hnyat adre kunâ me ödrin e hmetu ka hnyi uma, me wâ athnyaba a ga möt dö.

11Ke hwaban dö e, e ame o ka hnyi taun Naina ien; ke ame tha he mē laten me tavat ae se hia hmonyin. 12Ke e ame hakekenyâ homagouleny taun, me wâ bi, adre me vadren dut at a mokcu, nokon hinyen a khaca thibi, ka safac ut momo: ke tha e me tavat ae se hia ûnyi hnyi taun. 13Ke haba Than ame wâ momo, me e ame betenge gan, me ha kâu, ka habe, Ca tenge. 14Ke e ame he hakekeny me kâlâ tap; me ame todru tavat adre me sam. Ke e ame ha, ka habe, Hidröu lö, inya oge me ha köu, ka habe, Todrö. 15Me ame laba thö at a mokcu me hwân he ka fuc. Me e ame ham e ka hinyen. 16Me ame o kodra hia ot ae gan hmâ: ke adre me ogânâ Khong, me ha, ka habe, A o but ang unyita perofeta ae gan hmâ: ke, Khong ame senâ lakeiny. 17Me ame lung hnyi Juda me je ke keihen hia igigilo ûnyi eling gan.

18Ke haba je latö Ioane ödrin e omanenâ kâu ta je ûnyi eling. 19Me haba Ioane ame hawâ ke li at hnyi laten me kunʼ ödru ka Than, he ka ha, ka habe, U at ame he ka o, ke hawa, ohmun e he ka lubahingen khaca? 20Ame o but li at kâu, me ödru me ha, ka habe, A kunʼ ohmu köu Ioane Bapataiso he ka hnei u, ka habe, U but e at ame he ka o, ke hawa ohmun e be ka lubahingen khaca? 21Haba hnyi awa eling e ame omelö tavat ae se hia ame taku ödra hnen mok, me mok ae cap, me ta je hanu ae kong; ke e ame obwela ta je wadröu ae se hia. 22Ke e ame thu ködru, ka habe, He thʼ öbu ka thumetu Ioane hnöbu hna wâ me long; a ga bwela but ta je wadröu, kʼ ame he thö ta je mat, ke khabalaû but ta je lepera, kʼ ame long dö ta je wejiji, ke a möt hmetu thö tavat adre mokcu, kʼ adre me khetâ but ûthumetu ae so ka ta je theduoc. 23Hnahic hnen at ame ca he ka thö thö gak.

24Ame he but li ûthumetu anyi Ioane, me e ame hwân he ka ha ka tavat ae se hia hwakeci Ioane, ka habe, Öbun e he but ka hnyi hnyebuba he ka wâ ieû? hawa, hlowe ame bwebwelâ ang? 25Ke öbun e he but he ka wâ ieû? at ame khavâ ûkhaû ae menyik? Wâ bi, ödrin dö hnyi uma umen je than tavat adre me khavâ ûkhaû ae so, kʼ adre kap sot. 26Öbun e he but he ka wâ ieû? perofeta? Eke, oge me ha köbun, e at ae beönua hon perofeta. 27E at eji adre sihnalimen, ka habe,

Wâ bi, inya oge me kunâ anyik ûthumetu hnyi hnyimâkâm,

At ame he ka penapena dem gethen hnyi hnyimâkâm.

28Inya oge me ha köbun, ka habe, E ba at a hnokoâ ge omomo ae beönua hu Ioane: ke so bi haba at ae ûhnyûkong gadra hnyi dokhu dokhon Khong, me beönua hon e. 29Ke haba tavat hia, me ta je telona, adre me long, me haisoâ Khong, kʼ adre hia but baptaisoi ödra hnen hna bapataiso anyi Ioane. 30Ke haba ta je Faresaio me tavat ûnö hnanyibu, me adre me ka iet degecâ je ûnykûmenen Khong, kʼ adre me ca bapataisoi ödra ge anyin bapataiso. 31Oge me he bi nya ka oûcoâ me ieû tavat hnyi dö ang, kʼ ödra tha ûcû me ieû? 32Ödra ûcû me ta je wanakat adre me laba hnyi hna ûcû omjeû, kʼ adre me ûhnenamö, ka habe, Ohmun e tûö kowi köbun, kʼ öbun e ca bibiâ thö; ohmun e tenge, kʼ öbun e ca sang betenge thö. 33Anyin a o but Ioane Bapataiso kʼ ame ca han areto, kʼ ame ca ic waina, me haingöbun, ka habe, E hu demoni gan. 34Kʼ ame o but Nokon at ame han me ic, ke haingöbun, ka habe, Wâ bi at ae hutö me hwen hmiâ waina, hanen ta je telona me tavat ae kong! 35Anyin adre me haiwisa metâ hnen je lakon bi.

36Ke haba ke Faresaio ame hawâ e he ka tha han mē. Me e ame didro ka hnyi uma umen Faresaio, me laba ju ka han. 37Ke wâ bi ke momo aten taun, momo ae kong; ke e khana but a Iesu ame laba ka han hnyi uma umen Faresaio, me e ame hom kaia alabasa tangen muro, 38kʼ ame tot hoton hnyi li can me tenge, me hwân he ka okhubetâ li can ge deköien li emakan, me kot ge leûnen ban, me cem li can, me hû ge muro. 39Ke a wâ but Faresaio at a hawâ e, me e ame ha eû hnyi hnyekon, ka habe, Haba at ang, a ne perofeta, me e khana but bongon momo ang me hwakecin at ame kâlâ e, anyin a e momo ae kong. 40Ke haba Iesu ame thu me ha kâu, ka habe, Simona lo, e hu ke hofuc gak he ka ha köu. Ke haingen ame ha, ka habe, At ûne lö, ha thö. 41E hu li at ödru me hok gufa ûnyi ge at ame mē ham mone: haba khaca gadru ame hok gufa wale faiv haded ta je denari, ke haba khaca ame hok fifte. 42Ke ba hnân bi hwaban me e ame hna bâû ödru. Ia ke at gadru ame he ka hnyok gânâ kâu? 43Haba Simona ame thu, ka habe, Inya oge me ûnykûme, ame ne at la adre hna gânâ kâu. Me e ame ha kâu, ka habe, E wisa hnâm hna ûnykûme. 44Ke e ame hwio thö ka momo me ha kö Simona, ka habe, U je wâ but momo ang? oge dit ka hnyi umâm uma, ke u je ca bi utköiö hobi kâu li cak: ke a hia but momo okhubetâ li cak ge deköien, me kot ge leûnen ban. 45Haba u, u je ca ûcimhnyimak mönya: ke haba momo, hwânji hnyi ûen o ge didro kââng, e ame ca menâ he ka cem li cak. 46U je ca hû bök ge wakaco: ke a hia but momo hû li cak ge muro. 47Waleling me inye ha köu, ka habe, Adre hia but hna degecâ anyin ta je hulö ae se hia; anyin ae gan hmâ ibetengiö anyin momo: ke e ka ûhnyûkong hna ohia ge ke at, me ka ûhnyûkong anyin ibetengiö. 48Ke e ame ha ka momo, ka habe, Adre hia but ohia ânyâm ta je hulö. 49Ke haba tavat adre me tha laba mē, me adre me hwân ka ha eû hnyi je hnyekudra, ka habe, Ehö at ang ame ohia ta je hulö? 50Ke e ame ha ka momo, ka habe, U je mödrut ge ânyâm labageju; he thö me hnahic.

Currently Selected:

Luka 7: IAAI

Highlight

Copy