Luka 24

1KE hnyi bong a bâniny seven, hnyi haolany, me ödrin e he but ka hnyi erkemok, kʼ ödrin e hom ta je ûnyi ae bo so, wale ödrin e penapena. 2Ke ödrin e wâ veto a gʼ adre hia but hagutâ ûnyi hnyi hnyimen erkemok. 3Me ödrin e didro, ke ödrin e ca wâ bi unyin Than Iesu. 4Ke ödrin e tiga loloâ, wâ bi, li at ödru me tot unyidrin, kʼ ödre khavâ je ûkhaû ae hadröngoc: 5me ödrin e ot, me hnyimaködrin hnyikânâi, ke ödru me ha ködrin, ka habe, Ieû gabun öbun e elâm at ae möt unyin tavat adre mokcu? 6Ca e hmetu ang, ke a möt hmetu thö: ûnykûme thʼ öbun hofuc waleji a ha köbun ke tiga e hnyi Galilaia, 7ame ha a gʼ adre me he ka hna Nokon at ka hnyi je hnyamen tavat ae kong, me osatauroâ, kʼ ame he ka möt hmetu hnyi bong a kuniny. 8Me ödrin e ûnykûme hwan hofuc, 9me he hmetu ûnyi hnyi erkemok, me thumeto hnyat a twelv ge ta je ûnyi eling, me je lahanödrin hia. 10Haba iödrin me Maria Magadalena, me Joana, me Maria hinyö Iakobo: ke haba keihen omomo unyidrin, me ödrin e thumeto ta je aposetolo ge ta je ûnyi e. 11Ke haba hofuc hwan omomo, me helâ me hofuc baû ködrin; mʼ ödrin e ca kap bi. 12Ke haba Peteru ame todrö me wadring ka hnyi erkemok; me e ame nom me selâdrâ, me wâ a je mano lino thiju ame mokut; me e ame he hmetu hnyaban ai me lâiâ hna mâdrâ.

13Ke wâ bi hnyi bong eling lo li at gadrin ödru me he ka hnyi ke taun Emao ien, e ûsâkâûö me Jerusalema helâke me siksti je setadia. 14Ke ödru me ûhnena-mö tilâ ta je ûnyi hia a o. 15Ke ödru me tiga ûhnenamö me ihut, haba Iesu ame hakekeny me tha he mödru. 16Ke adre kât li emaködru me ödru me ca he ka wâhmakhmeto e. 17Ke e ame ha ködru, ka habe, Ie je ûnyi e öbu me ûhnenamö tilâ? Ke ödru me todru me hmak. 18Haba ke at gadru Kaleopa ien, ame thu kân, ka habe, U me ne hake atkanyua biju la e hnyi Jerusalema, ae ca khanö u ta je ûnyi a o hnyi je bong eang? 19Ke e ame ha ködru ka habe, Ie ta je ûnyi? Haingödru ödru me ha kâu, ka habe, Ga Iesu at Nazareta wale perofeta ae man hnyi huliwa me hofuc, hnyi hnyimakan Khong me tavat hia thithö: 20wale hnen je taben tavat bihut, me tavat adre me musi ohmun adre me hna e me me mok, ke adre me osatauroâ e. 21Ke ohmun e gejon a e bi at ame he ka omelö at Isaraela. Ke haba khaca minya, walang bong a kuniny hwaban hna ânyâ ta je ûnyi eling. 22Ke wale minya, haba watamomo a je lahanöhmun ödrin e outhmoki ohmun ge imwidrin hnyi erkemok hnyi haolany; 23ke ödrin e ca wâ bi unyin, ke ödrin e o but me ha, a gʼ ame manen dut ködrin li angela, li at ödru me ha, ka habe, A möt hmetu thö e. 24Ke a mwi ke je lahanöhmun hnyi erkemok, me wâ helâji me hnen watamomo hna ha: ke ödrin e ca wâ bi e. 25Me e ame ha ködru, ka habe, Öbu li monu, me bec li hnyekubu he ka kap hia je hna ha hnen ta je perofeta! 26Hawa, ca hamen Keriso he ka kap ta je vec eling, me he ka dit ka hnyi anyin hmanenang? 27Ke e ame hwân ga Mose me ta je perofeta hia, he ka omanenâ ködru ta je hna sihnalimen hia gan. 28Ke ödrin e hakekeny ka hnyi taun, ödru me he ka hnyin: ke haba e, me helâke ame he ka he balua. 29Me ödru me thawâ e, ka habe, Laba ju unyihmu: anyin a sahac ut, ke ame he but ka hia bong. Me e ame didro he ka tha laba mödru. 30Ke e ame tha laba mödru he ka han, me e ame hom areto, me oleâ, me thuthu me ham ködru. 31Me adre me khong ut li emaködru, ke ödru me wâhmakhmeto e; me e ame ie hia but gadru. 32Ke ödru me ûhaköu, ka habe, A ca kahwa bi li oûnykûmitu, waleji hnyi hnen hna ûhnenamö mötu eû hnyi gethen, me hnen hna omanenâ kötu je hna sihnalimen? 33Ke ödru me todrö hnyi awa eling me hmetu Jerusalema ai, me wâ hnyat a eleven ödrin e ûkhacaköu, me tavat unyidrin, 34ke haingödrin, ka habe, E hnathu a möt hmetu thö Than, ke a manen dut kö Simona. 35Ke ödru minya ödru me omanenâ ta je ûnyi eû hnyi gethen, me hnen hna manen ködru hnyi hnen hna thuthu areto.

36Ke ödrin e tiga ûhnenamö ta je ûnyi e, me e ame tot hnyi wanbödrin, me ha ködrin, ka habe, Hnahic köbun. 37Ke ödrin e öbubuny, me ot, ke ödrin e ûnykûme a hanu ödrin e wâ. 38Me e ame ha ködrin, ka habe, Ieû gabun öbun e hlohlo? ke ieû ame kû gan lolo eû hnyi je hnyekubun? 39Wâ bi li hnyamok me li cak, a inya ang: mâdrö nya ju, me wâ; anyin ae ba hanu ae hu utioiny me je jö helâ me hnobun hna ö nya. 40Ke a hia but ha e, e ame omanenâ ködrin li hnyamen, me li can. 41Ke ödrin e tiga ca kap bi, anyin a ödrin e senyin me lâiâ, me e ame ha ködrin, ka habe, E hu ö ʼbun jeû eang? 42Me ödrin e ham kâu ong hanen wâ adre le. 43Ke e ame hom me han hnyi hnyimaködrin.

44Me e ame ha ködrin, ka habe, Walang je hofuc oge me ha köbun, waleji e me tiga inya ang unyibun, ae ûcû he ka owhâdâ ta je ûnyi hia adre sihnalimen hnyi hnanyibu anyi Mose, me ta je perofeta, me ta je salamo gak. 45Me e ame khong ut je hnyekudrin, me ödrin e he ka wâhmakhmeto hna sihnalimen; 46ke e ame ha ködrin, ka habe, Adre hia but sihnalimen helâng, a gʼ ame he Keriso ka vec, me möt hmetu ûheny hnyi hna mok hnyi bong a kuniny; 47me he ka khetâ, hnyi ta je hnyei hia hwân hnyi Jerusalema, ietra, mo he ka thang degecâ ta je hulö ûnyi ge ien. 48Ke öbun bi hnyat ohnathoâ ta je ûnyi e. 49Ke wâ bi, inya oge me he ka kunâ köbun hna ha bânâ ga Cica: ke so öbun e he ka mē laba hnyi taun ke ne o but öbun e he ka hu man ûnyi ethö. 50Ke e ame hum ödrin cicö Bethania: ke e ame hai li hnyamen me hahnahici ödrin. 51Ke e ame tiga hahnahici ödrin, me e ame ie ûsâkâûö but mödrin, me adre me kap dö e hnyi drany ai. 52Ke ödrin e khudrung ju kâu, me he hmetu Jerusalema ai me senyin ae gan hmâ: 53ke ödrin bala bi hnyin uma kap, kʼ ödrin e haisoâ Khong.

Currently Selected:

Luka 24: IAAI

Highlight

Copy