Luka 23
23
1ME ame todrö tavat hia ae se, me lelö thö kö Pilato. 2Ke adre me hwân he ka bi fuco e, ka habe, Ohmun e wâ but at ang ame omono ita hnyei, kʼ ame thawâ he ka fat kö Kaisara, kʼ ame ha, a e thibi Keriso a ke than bi. 3Haba Pilato ame hnö e, ka habe, Hawa, u Tuhan at Juda? E ame thu, ka habe, U me ha e. 4Haba Pilato ame ha ka taben tavat bihut me tavat ae se, ka habe, E ba monu anyin at ang oge me wâ. 5Ke adre me ha hwegiâ, ka habe, E ame obwebwelâ tavat, kʼ ame ûne hnyi Juda hia thithö hwân hnyi Galilaia ke ne o but ka hnyi dok ang. 6Ke a löng ut Pilato, me e ame hnei, ka habe, Hawa, at Galilaia at ang? 7E ame wâhmakhmeto a e ke kei Heroda, me e ame kunâ e kö Heroda, anyin a e hnyi Jerusalema hnyi je bong eling.
8Haba Heroda ame ō Iesu, me e ame senyin gan hmâ: anyin ae kueny jut weny he ka bewâ e, anyin a e ame löng ta je ûnyi gan; ke e ame ûnykûme he ka wâ ke ûöman e ame he ka ânyâ. 9Ke e ame hnö e hnyi ta je hofuc ae se hia; ke e ame ca thu kâu. 10Ke ame ûtitilen je taben tavat bihut, ke tavat sihnalimen, me bi fuco hwegiâ e. 11Ke haba Heroda me anyin je soja adre me hmiödra e, me hluma e, me okhavâ e ge ûkhaû ae hmanenang, me kunâ hmetu e kö Pilato. 12Me ame ûsoköu hmetu Heroda me Pilato hnyi bong eling: anyin a ödru imouköu ehac.
13Haba Pilato ame ûkhacaköuâ je taben tavat bihut, me hnyat musi, me tavat bi, 14me ha ködrin, ka habe, Öbun e hom könya at ang helâke ame omonoâ tavat: ke wâ bi, oge hia but hnö wia e hnyi hnyimaköbun, me ba monu oge me wâ ge at ang hnyi ta je ûnyi öbun e bi fuco gan, 15ke haba khaca, e ba minya hna wâ hnö Heroda: anyin a hia but kunâ hmetu e köta; ke wâ bi, e ba ûnyi a ânyâ me me ûcû he ka mok. 16Anyin a wale, oge me he ka osoâ e, me thang ut. 18Ke ödra hia adre me tha hongot, ka habe, Hom do at ang, ke hnö Barabasa but köhmun: 19wale at adre me khûâ ka hnyi uma ceat, can ûhûgûnö dokhu hnyi taun, me can ûhlingâ at. 20Ke haba Pilato ame fuc hmetu ködra, anyin ae beweny he ka hnö Iesu but; 21ke adre me fuc hwege, ka habe, Osatauroâ thö, osatauroâ thö e. 22Me e ame okun ha kodra, ka habe, Anyin a ieû monu e ame ânyâ? e ba can oge me wâ gan, me me he ka mok: anyin a wale oge me he ka osoâ e me hna but. 23Ke adre me tha ha hwegiâ ge ifucidra ae gan hmâ, adre me sumâtâ me me he ka osatauroâ e. Me ame ton dut ifucidra ae gan. 24Ke haba Pilato ame ha muâ a gʼ adre me he ka ânyâ hoton wedra. 25Me e ame thang ut at adre ca can ûhûgûnö dokhu, ke ûhlingâ at, a at a wedra; ke e ame ham Iesu ka hnyi wedra.
26Adre me lelö e, ke adre me köt Simona, at Kurene, ame he ûheny hnyi hna belök, me adre me ip hon e satauro, me me vadren hotu Iesu.
27Haba tavat ae se hia adre me he hoton, me omomo adre me tenge thungaû me tenge gan. 28Ke haba Iesu ame hwio thö, me ha kodra, ka habe, Omomo Jerusalema lö, ca tengiö nya bi, ke tengiʼ öbun bi me lakubun. 29Anyin a wâ bi ame he ka o but ang ta je bong adre me he ka ha hnyin, ka habe, Hnahic hnen toûnyi, me tangen hnöku ame ca hnokoâ, me li bai adre me ca ijem. 30Me adre me he ka hwân he ka ha ka je bucen, ka habe, Kolu takû öhmun ju; me ka ta je hut, Tubi öhmun ju. 31Anyin adre ne ânyâ ta je ûnyi ang hnyi ûö ae hât, ieû adre me he ka ânyâ hnyi ûö ae meleca? 32Ke e hu minya eling ke li at ae kong adre me tha lelö me he ka hlingâ.
33Ke adre me o but ka hnyi ke ong dok, Ibokomok ien, adre me osatauroâ thö e eling, me li at ae kong, ke at hnyi ke keihen metâ, me ke at hnyi ke keihen ma 34Haba Iesu ame ha, ka habe, Cica lö, hnʼ ödra but; anyin ae ca khanʼ ödra hnödra hna mâdrâ. Ke adre me khenâ anyin je ûkhaû me ugleköbâ. 35Ke ame utitilen dö tavat me wâ. Ke haba tavat musi adre me hiâ e, me ha, ka habe, A hia but omelö keihen; ke a ne e Keriso a oûnykûminy Khong, e so e ame he ka omelö e bi. 36Me ame hluma e minya hnen tavat vat, adre me he but kâu, me habelen e ge vinega, 37me ha, ka habe, A ne u Tuhan at Juda, omeli u thö, 38Ke e hu tusi adre sihnalimen hon ka habe, WALANG TUHAN AT JUDA.
39Ke haba ke at hnyin li at ae kong adre uhno ame haikongoâ e, ka habe, Hawa u ca Keriso? omeli u thö, möhmun. 40Me ame thu hnen ke at me thawâ, ka habe, U ca ot bi ge Khong, ke u je tha hnaûhango thö me? 41Ke e wisa hnaûhango a otu, anyin adre bi hwaban kötu e me ûcû me hnötu hna mâdrâ: ke haba at ang, me ba bi monu gan. 42Me e ame ha kö Iesu, ka habe, Ö u na ûnykûmi nya, u ka o hnyi dokhom dokhu. 43Ke e ame ha kâu, ka habe, E hnathu inya oge me ha kâu, a hnyi bong ang u me he ka tha e mönya hnyi Paradaiso.
44Me ame lit hia but hnyei hwân hnyi jebigö ke ne o but hnyi jebigo sahac, 45ke ba but melaminy seûno: ke ame khekhe lo but imano singiny dok ae kap. 46Ke haba Iesu ame hongot hwege me ha, ka habe, Cica lö, inya oge me hna but hanuk ka hnyi li hnyamâm: ke a hia but ha hofuc e, e ame mokcu. 47Ke a wâ but keneturio hna mâdrâ, me e ame haisoâ Khong, me ha, ka habe, E hnathu wale at ae wisa. 48Ke haba tavat hia adre me ûkhacaköu he ka wâ ûnyi e, kʼ adre me wâ ta je ûnyi adre me ânyâ, me adre me khaû je ûlaidra me he hmetu but. 49Ke haba lahanen, me adre me tot sâkâû, me watamomo a hnyat ödrin e he hoton ûheny Galilaia, ke adre me wâ ta je ûnyi eling.
50Ke wâ bi, wale ke at Josefa ien, at ûhnenamö, ke at ae so me wisa, 51(kʼ ame ca munyi ogâ anyidra si ûhnenamö me hnödra hna ânyâ), a at Arimathia, taun anyin at Juda, ke e at ame halubahingen dokhu dokhon Khong: 52haba at eling ame he kö Pilato me sumâtâ unyi Iesu. 53Ke e ame hom but hnyikânâi, me lan ge mano lino, me ip hnyi kic adre thö hnân erkemok, ke tiga ba komok adre ip hnyin. 54Ke haba bong e, me Penapena, anyin ae hakekeny jut sabath. 55Ke haba watamomo hnyat he hoton ûheny Galilaia, me ödrin e wâ erkemok, me hwakecin hna ip hnyin. 56Ke ödrin e hmetuhmetu me penapena ta je ûnyi ae bo so me je muro.
Ke ödrin e menâ ju hnyi sabath helâ me hnanyibu.
Currently Selected:
Luka 23: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
