Luka 1
1
1ANYIN a haba tavat ae se adre me hwân he ka sihnalimen gaga me omanenâ ta je ûnyi ame hwâdâ köta, 2helâ me hnödra hna ham köta, waleji ate me wâ, kʼ otin e bi athnyabainy hofuc ûnyi hnyi can, 3anyin a wale, oge me ûnykûme bi nya he ka sihnalimen gaga köu taböny than Theofila, anyin oge hia but wâ gaga ke wisa ta je ûnyi ûnyi hnyi can; 4mʼ u me he ka wâ thö hnathuiny ta je hofuc adre me nâ köu.
5Haba hnyi je bong bongu Heroda a than Juda, me wale ke at bihut Zakaria ien, ûnyi hnyi dö anyi Abia: haba ien âiân me Elisabeth, a mâtrâni Arona. 6Ke ödru li at ae wisa hnyi hnyimakan Khong, kʼ ödru me vheno ta je hnanyibu ke ta je hna otilâ hnen Than, ke ba monu gadru. 7Ke ba nökudru anyin ae toûnyi Elisabeth, ke ödre li hingat ut.
8Ke e ame tiga vheno hanymen at bihut hnyi hnyimakan Khong hnyi hna khene hanymen kâu, 9me hamen he ka dit ka hnyi Uma kap umen Than he ka le uto ae bo so, hoton hwakecin at bihut. 10Ke hnyi awa adre me le uto ae bo so, ame laba eû tavat hia ae se adre me hic. 11Ke wale ame manen dut kâu angela anyin Than, ame tot hnyi ke keihen a metân taben le uto ae bo so hnyin. 12Ke a wâ but Zakaria, me e ame hmak, ke ame o but kâu ot. 13Ke haingen angela ame ha kâu, ka habe, Zakaria lö, ca ot: anyin adre me löng hijâm hic, me ame he âiâm Elisabeth ka hnokoâ nokom, ke u me he ka hwenyi ien Ioane. 14Ke u me he ka senyin me hobâ; kʼ ame he tavat ae se hia ka senyin hnyi hna hnokoâ e. 15Anyin a e ame he ka gan hnyi hnyimakan Than, e ame ca he ka ijem waina me grâg; ke e ame he ka unöngöt ge Hanu Kap ûnyi hnyi hnyekon hinyen. 16Ke se hia lakon Isaraela e ame he ka ohmeto ka Than a Khongudrin. 17Ke e ame he ka bân hnyi hnyimakan hnyi hanu me man mani Elia, he ka ohmeto hnyekon ta je kamen ka lakudra, me tavat adre hwen höcö ka hnyi metâ anyin tavat ae wisa; me me he ka ânyâwia tavat adre penapena hobi kâu Than. 18Ke haba Zakaria ame ha ka angela, ka habe, Ame he ka kâmâu ka khanö nya e î anyin oge hingat ut ang, ke someca but ang öiök. 19Haba angela ame thu kâu, ka habe, Inya ang Gaberiela at ame tot hnyi hnyimakan Khong; a khunö nya he ka ha köu, me omanenâ köu ûthumetu eang ae so. 20Ke wâ bi, u me he ka hum, ame ca he ka khanö u fuc ke ne o but hnyi bong adre me he ka ânyâ hnyin ta je ûnyi e, anyin a u je ca kap hok hofuc, wale ame he ka hwâdâ hnyi ûen e. 21Ke haba tavat adre me halubahing Zakaria kʼ adre lâiâ anyin ae bec hnyin uma kap. 22Ke e ame didrut me ca khana but fuc kodra: me adre me wâ ae hu ûnyi a manen kâu hnyin uma kap: ke e ame labö hmâhmâ kodra ke hum bala bi. 23Ke ame um dö je bonginy anyin huliwa, me e ame he but ka hnyi hnyaban.
24Hwaban ta je bong e, ame erkin dut Elisabeth a âiân; me e ame oiyongâ e bi hnyi faiv ta tehi me ha, ka habe, 25A mâdrâ helâe könya Than hnyi ta je bong e ame ō nya hnyin, he ka degec anyik hmehma hnyi hnyimakan tavat.
26Ke haba hnyi tehi a siksiny, haba Khong ame kunâ angela Gaberiela ka hnyi taun hnyi Galilaia Nazareta ien, 27ka ke hing hlu hanen lap anyi Davita, a ûköcö me ke at Josefa ien; haba ien hlu eling me Maria. 28Haba angela ame didro kâu me ha, ka habe, E, u at adre betenge gan lö, e but unyâm Than. 29Ke haba hlu ame hmak ge hofuc eling, me ûnykûme ieû bongon iouny eling. 30Ke haingen angela ame ha kâu, ka habe, Maria lö, ca ot: anyin a Khong ame betenge gam. 31Ke wâ bi, u me he ka erkin, me hnokoâ da, me u me he ka hwenyi ien Iesu. 32E ame he ka gan, ke adre me he ka hwenyi ien e Nokon At ae Beönua: ke ame he Than a Khong ka ham kâu theron anyi Davita a kamen: 33ke e ame he ka muso lap anyi Jekob nyiele balua; ke ame he ka ba obiny dokhon dokhu. 34Haba Maria ame ha, ka habe, Ame he ka kâmâu ûnyi e, anyin a iny tiga ca wâ bi baga? 35Ke haba angela ame thu me ha kâu, ka habe, Ame he ka o köu Hanu Kap, me ame he ka tungi u hnen man maniny Beönua: anyin a wale adre me he ka hwenyi ien at adre me he ka hnokoâ, me kap; a Nokon Khong. 36Ke wâ bi, haba liamekeiny möu a Elisabeth e erkin dut, ka someca but: ke siksiny ju ang je tehiny, waleji adre me ha me toûnyi. 37Anyin ae ba hofuc ûnyi ge Khong ame he ka ba maniny. 38Ke haba Maria ame ha, ka habe, Wâ bi, iny hlu a athnyabainy Than; e so e hwâdâ bi könya hoton hnâm hna ha. Haba angela ame hna but e.
39Hnyi je bong eling Marie ame tot me he mweimwei ka hnyi ke keihen hnyei ae hu bucen, ka hnyi ke taun hnyi Juda; 40me didro ka hnyi uma umo Zakaria, me iouny me Elisabeth. 41Ke a long ut Elisabeth ibifuci Maria, me ame uthmâhmâ mendreng eû hnyi hnyekon; ke unöngöt dö Elisabeth ge Hanu Kap; 42me e ame hwân ka fuc hwege, ka habe, Hnâm hnahic hon omomo, ke e hnahic ut wan hnyekom. 43Ûnyi ua könya ang, a gʼ ame o but könya hinyen Tuhok? 44Anyin a wâ bi, ame tiga o but ka hnyi li hnyikönyök ibifucâm, me ame uthmâhmâ thö mendreng eû hnyi hnyekuk ge senyin. 45Hnahic hnen momo ame labageju; anyin ame he ka hwâdâ ta je ûnyi hia thithö adre ha kâu ûnyi ge Than. 46Ke haingö Maria, ka habe,
Haba hnyekuk ame ogânâ Than,
47Kʼ ame hobâ hanuk ka Khong At a omeli nya.
48Anyin a e ame wâ athnyabainy a hlu, walönya at hnyikânâi:
Anyin a wâ bi, hwân walang ang ame he ta je dö hia ka hao nya me iny hnahic.
49Anyin a haba at ae man ame hia but ânyâ könya ta je ûnyi ae gan hmâ;
Ke e kap ien.
50E ame omanenâ anyin ibetengiö ka ke dö me ke dö,
A hnyat adre me outen e.
51E ame omanenâ tang hwege ge hnyamen;
Kʼ ame oveseâ but tavat hnyi biganiny hnyekudra.
52E ame hagutâ je than ûnyi hnyi hon anyidra ta je theron,
Me ogöranyâ tavat a ödra hnyikânâ.
53E ame osekunâ tavat a ödra mekihnâ nem ge ta je ûnyi ae so,
Kʼ ame kunâ wia tavat tren omjeû ke ba ûnyi.
54E ame hom hadruâ athnyabainy a Isaraela,
Kʼ ame ûnykûme ibetengiö,
55(Helâji me hnen hna ha ka lakamöta)
Kö Aberahama me je mâtrâniny nyiele balua.
56Ke Maria ame tha laba mē ame ne kun ta tehi, me e ame hmetu but ka hnyi hnyaban.
57Ke a hwâdâ ûen ame he Elisabeth ka hnokoâ; ke e ame hnokoâ da. 58Ke a long ut tavat adre me laba hakekenyâ me lap a je liamekeiny mē a gʼ ame betenge gan Than; me adre me tha senyin mē. 59Ame o but bong a eitiny, me adre me he but ka peritomonâ wanakat; ke ödrin e behwenyi ien e me Zakaria hoton ien kamen. 60Ke haba hinyen ame thu, ka habe, Ca e, he so bi Ioane ien. 61Me haingödra adre me ha ka momo, ka habe, E ba liamekeiny möu ae hu ien eling. 62Me adre me bi hat ka kamen, ka habe, iö ia e ame weny he ka wenyö? 63Ke e ame sumâtâ taben sihnalimen, kʼ ame sihnalimen, ka habe, Ien Ioane. Haba ödra hia adre me lâiâ. 64Me ame ie ok ut hnyimen me bohmen, me e ame fuc me ogânâ Khong. 65Me ame o but ot kodra hia tavat adre me laba igigilo: ke ame lung tot ta je ûnyi eling ka hnyi je dok hia ae hu bucen hnyi hnyei Juda. 66Ke haba tavat hia thithö adre me long, me adre me ip hmâ hnyi je hnyekudra, haingödra, ka habe, Ame he ka ieû ge da eang? Anyin a e but unyin hnyamen Than.
67Ke a unöngöt dö Zakaria a kamen ge Hanu Kap, me e ame perofeta, ka habe,
68E so adre me haisoâ Than Khongu Isaraela;
Anyin a e ame senâ me bi hwaban möt hobi kâu lakeiny,
69Kʼ ame otilâ thö faoiny ûhomeli hobi köta
Hnyi lap anyi Davita a athnyabainy:
70(Helâji me hnen hna ha a deny anyin je perofeta ae kap hwân hnyi can hmeledrany),
71Ame he ka omeli ota ûnyi hnyi je iwahnaihmiony möta, ke ûnyi hnyi hnyamödra hia adre me hûköti ota;
72He ka ânyâ betenge ka lakamöta,
Me ûnykûme anyin ûhihinyköu ae kap;
73Waleji hofuc e ame khemanyin kö Aberahama a kamöta,
74A gʼ adre me he ka omeli ota ûnyi hnyi hnyamen ta je iwahnaihmiony möta,
Mʼ ate me he ka bi athnyabainy ke ba ot,
75Hnyi hwakecin ae kap me wisa hnyi hnyimakan hnyi bonguta ta je bong bia thithö.
76Eke, ke haba u, da, me adre me he ka haiö u me perofeta anyi Beönua:
Anyin a u me he ka bân hnyi hnyimakan Than he ka ânyâwia deny ta je gethen.
77He ka o wâhmakhmetoâ lakeiny ge ûhomeli
Wale he ka thang anyidra ta je hulö,
78Ûnyi hnyi ibetengiö ae menyik anyin Khonguta.
Anyin a wale ame he haolany ka senʼ ota,
79He ka omelamâ tavat adre me laba hnyi lit me hmenon mok;
He ka su ta je cata ka hnyi gethen ae hnahic.
80Kʼ ame gan dut wanakat, me hwege tot hanon, me e ame laba hnyi je dok ae ba aten ke ne o but hnyi bong hnân omanenâ e ka at Isaraela.
Currently Selected:
Luka 1: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
