Ioane 20

1HNYI bong a bân hnyi seven ame he but Maria Magadalena hnyi hnyomakatu kong ka hnyi erkemok, kʼ ame wâ veto adre me hom but ûnyi hnyi hnyimen erkemok. 2Me e ame wadring me he kö Simona Peteru, me ke aten wale ame betenge gan Iesu, me ha ködru, ka habe, Adre hia but hom Than ûnyi hnyi hnyin erkemok, ke ca khanʼ ohmun dok ödrin e ip e hnyin. 3Haba Peteru me aten eling ödru me didrut me he ka hnyi erkemok. 4Ke ödru me tha wadring, me ame khaletâ Peteru hnen at eling, me bân ka o hnyi erkemok; 5me e ame nom me selâtâ, kʼ ame wâ je mano lino ame mokut; kʼ ame ca didro. 6Ke ame o but Simona Peteru a he hoton, kʼ ame didro ka hnyi erkemok; me e ame wâ je mano lino ame mokut, 7me ecmano minya waleji adre me lan kâu ban, ame ca tha mokut me je mano lino, ame ka hake mokut adre vhec. 8Me ame didro minya ke aten waleji a bân ka o hnyi erkemok, me e ame munyi wâ me labagejon. 9Anyin a ödrin e tiga ca wâ ûnykûme bala hna sihnalimen, ka habe, E ûcû kâu he ka möt hmetu ûheny hnyi hna mok. 10Haba li laten ödru me hmetu but ka hnyi hnyabadru.

11Ke haba Maria ame tot eû hnyi erkemok ame tenge: ke ame tiga tenge me nom but me selâtâ erkemok; 12me e ame wâ li angela ödre khaû hau, ödru me laba ke at hnyi hnen ban, ke ke at hnyi hnen li can, wale dok a mokut hnyin unyi Iesu. 13Ke ödru me ha kâu, ka habe, Ke momo lö, ieû u me tenge gan? E ame ha ködru, ka habe, Anyin adre hia but hom Tuhok, ke ca khanö nya dok adre ip e hnyin. 14A hia but ha e, me e ame hwio thö me ö Iesu ame tot, ke ca khana bi me Iesu ling. 15Iesu ame ha kân ka habe, Ke momo lö, ieû u me tenge gan ia u me elâm? E ame ûnykûme ame ne at ame tuö utkânâ, me e ame ha kâu, ka habe, Than lö, u je ne hom e, mē ha thö könya dok u je ip e hnyin, me inye he ka hom e. 16Iesu ame ha kâu, ka habe. Maria. E ame hwio thö me ha kâu, a hwen Heberu, ka habe, Raboni; walang bongon, At ûne. 17Iesu ame ha kâu, ka habe, Ca kalö nya bi; anyin a iny tiga ca ölö ka Kamen: ke he thö ka je liamekeiny mönya, me ha ködrin, ka habe, Inya oge me he ka ölô ka Kamök a Kamöbun, ke Khonguk a Khongubun minya. 18Haba Maria Magadalena ame he but me thumeto laten, ka habe, Oge wâ ju Than; me e ame ha ta je ûnyi e ame ha kâu.

19Hnyi sahacin bong eling, wale bong a bân hnyi seven, ke adre hlöng ut je hwanuma hnyi dok a laba hnyin laten, anyin a ödrin outen at Juda, me ame o thö Iesu me tot hnyi wanben, me ha ködrin, ka habe, Hnahic köbun. 20Ke a hia but ha e, e ame omanenâ ködrin li hnyamen me vhaken. Haba laten ödrin e senyin ödrin e wâ Than. 21Me Iesu ame ha hmetu ködrin, ka habe, Hnahic köbun: inya oge me kunʼ öbun helâ me Kamen ame kunö nya. 22Ke a hia but ha e, e ame menâ ködrin, me ha, ka habe. Kap ju Hanu Kap: 23haba ta je hulö anyin tavat öbun e hna, me adre me thang gadra; ke haba hnobun hna ca thang, me ame ka hnen ju. 24Ke haba Toma ke at hnyi twelv, Didumo ke ien, ame ca tha e mödrin hnyi ûen a o hnyin Iesu. 25Ke ame ha kân laten, ka habe, Ohmun e hia but wâ Than Ke e ame ha ködrin, ka habe, Oge ne ca mē wʼâ thö deny fao hnyi li hnyamen, me inâ banyök ka hnyi hwaden li fao, me inâ hnyamok ka hnyi vhaken, me oge me ca he bi nya ka labageju.

26Ke hwaban je bong a eit, e hmetu thö laten hnyin uma, ke Toma unyidrin. Adre hia but hlöng je hwanuma, me ame o Iesu me tot hnyi wanbödrin, me ha, ka habe, Hnahic köbun. 27Ke e ame ha kö Toma, ka habe, Hö jem banyâm me wâ bi ang li hnyamok; ke hö jem hnyamâm, me inâ ju ka hnyi vhakök: me ca lolo bi, ke labageju ju. 28Haba Toma ame thu kâu, ka habe, Tuhok me Khonguk. 29Iesu ame ha kâu, ka habe, U me labageju anyin a u je ō nya: hnahic hnen tavat adre me labageju, kʼ adre me ca munyi wâ.

30E se hia ta je haten ame ânyâ Iesu hnyi hnyimakan laten, kʼ adre me ca sihnalimen hnyi tusi eang: 31ke adre hia but sihnalimen ta je ûnyi e me öbun e he bi ka labagejon a Nokon Khong Iesu Keriso: ke ûnyi ge hnobun hna labageju me ame he ka ha möt köbun ûnyi hnyi ien bi.

Currently Selected:

Ioane 20: IAAI

Highlight

Copy