Ioane 18

1AHIA but Iesu ha ta je hofuc e, me e ame he hanyâûâ wagewe Kederon tha e me laten, eling ke ong utkânâ, me e ame o ka hnyin me laten. 2Ke e khanö Juda dok eling, at ame alecuâ e: anyin ame labö o eling Iesu me laten. 3Ke haba Juda a hia but kap je soja me tavat tue ûnyi ge je taben tavat bihut me ta je Faresaio, adre me o eling me ta je lamepa me ta je okûnû me ta je ûnyi hnân vat. 4Ke e khanö Iesu ta je ûnyi hia ame he ka o kâu, e ame he but, me ha kodra, ka habe, Ia öbun e elâm? 5Adre me thu kâu, ka habe, Iesu at Nazareta. Iesu ame ha kodra, ka habe, Inya ang. Ke haba Juda at ame alecuâ e, ame tha tot mödra. 6Ke a hia but ha kodra, ka habe, Inya ang, me adre me kec nulötudra me ta ju eû hnyi kânâ. 7Me e ame hnei ödra hmetu, ka habe, Ia öbun e elâm? Ke adre me ha, ka habe, Iesu at Nazareta. 8Iesu ame thu, ka habe, Oge hia but ha köbun, ka habe, Inya ang: öbun e ne elöm nya, hna but tavat ang, mʼ adre me he but: 9me me hwâdâ hofuc e ame ha, ka habe, E ca hia ke at gadra u je ham könya. 10Ke hu hele vat anyi Simona Peteru, me e ame oc dö, me köt athnyabainy taben tavat bihut, me ame subâ but hnyikonyen a metâ. Maliko ien athnyaba. 11Haba Iesu ame ha kö Peteru, ka habe, Inâ hmetu ju hele vat ka hnyi umen: hawa, oge me ca he ka ijem kaia a ham könya Cica?

12Me adre me köt Iesu me ca thö e hnen ta je soja me taben vat, me je taben tavat tue at Juda, 13me lelo thö e a bân kö Ana; anyin a e ûngû Kaiafa taben tavat bihut hnyi huna eling. 14Ke Kaiafa at ame ha ka at Juda, ka habe, E ûnyi hnathu he ka mok at a khaca hnân hwaban hnyei.

15Haba Simona Peteru ame he hotu Iesu, me ke aten minya. Ke ame wâhmakhmetoâ aten eling hnen taben tavat bihut, me e ame dit minya me Iesu ka hnyi hnyeuleny uma umen taben tavat bihut; 16ke haba Peteru ame tot eû hnyi hwanuma. Ke ame dit hmetu but aten eling, waleji ame wâhmakhmeto hnen taben tavat bihut me ha ka momo at ame tuö hwanuma he ka hum Peteru ka hnyin uma. 17Me ame ha momo, at ame tuö hwanuma kö Peteru, ka habe, Hawa, u hanen laten at ang? Haingen, ka habe, Ca munyi inya. 18Ke ame ûtitilen eling lathnyaba me tavat tue, kʼ adre me hû ke meic alep, anyin a ödra megic, me adre me hlök: kʼ ame tha tot Peteru mödrin, ame munyi hlök.

19Haba taben tavat bihut ame hnei Iesu ge laten, me hnen minya hna ûne. 20Haba Iesu ame thu kâu, ka habe, Oge hia but ha manenâ ka hmeledrany; oge me labö ûne hnyin je sunago, me hnyin uma kap, wale ame labö ûkhacaköu hnyin at Juda; ke ba hofuc oge me ha duöngâ. 21Ieû gam u me hnei nya? hnei ödra bi tavat adre me long hnok hna ha ködra: wâ bi e khanʼ ödra but hnok hna ha. 22Ke a hia but ha e, me ame khaû e hnen ke at tue, at ame tot hakekenyâ, haingen, ka habe, U me thu helâe kâ taben tavat bihut? 23Haingö Iesu, ka habe, A ne kong hnok hna ha, omanenâ thö monu: ke a ne so, ieû gam u me kuc nya? 24Ke haba Ana ame ca e me kunâ kö Kaiafa taben tavat bihut.

25Ke haba Simona Peteru ame tot, kʼ ame hlök. Me adre me ha kau, ka habe, U ke aten minya? E ame ivinö me ha, ka habe, Ca inya. 26Ke ame ha ke at hanen athnyabainy taben tavat bihut, a liamekeiny me at eji a subâ Peteru hnyikonyen, ka habe, Oge me ca ō u mē hnyi ong utkânâ? 27Haba Peteru ame ivinö hmetu: ke ame ie kokok dö khoto.

28Ke ödrin e lili Iesu thö ûheny unyi Kaiafa ka hnyi uma umen than: ka hnyomakatu but; ke adre me ca hnyi dit ka hnyi uma umen than, wâ adre nye bo kong he ka hnyi an paseka. 29Haba Pilato ame didrut ködra, me ha, ka habe, Ieû monu anyin at ang öbun e he ka ha? 30Me adre me thu kâu, ka habe, A ne ba monu anyin at ang, ohmun e ca he ka hna köu. 31Haingö Pilato ame ha kodra, ka habe, Hom dʼöbun me hnö helâ me anyibun hnanyibu. Haingen kâu at Juda, ka habe, E ca ûcû köhmun he ka hlingâ at: 32me me hwâdâ hofuc ho Iesu a ha, ame omanenâ bongon imekiny bi.

33Anyin a wale Pilato ame dit hmetu thö ka hnyi uma umen than, me hawo Iesu, me ha kâu, ka habe, Hawa u Tuhan at Juda? 34Iesu ame thu, ka habe, u me ha e ka ûnyi gam, ke hawa, e hu at a haiö nya köu. 35Pilato ame thu, ka habe, Iny at Juda? Hnen aten em hnyei me je taben tavat bihut hna hnö u könya: ieû u je mâdrâ? 36Iesu ame thu, ka habe, Ca ûnyi eang hmeledrany dökhuk dokhu: a ne ûnyi eang hmeledrany dökhuk dokhu, ame ne he lathnyabaik ka vat, mʼ adre me ca he ka hnö nya ka at Juda: ke walang ang ca ûnyi ang dökhuk dokhu. 37Me Pilato ame ha kâu, ka habe, Hawa gam, u than? Iesu ame ha, ka habe, U me ha e, a iny than. Adre hnöku nya hobi kâu e, ke oge o but eang hmeledrany hobi kâu e, me inye he ka ohnathoâ hnathu. Haba ta je aten hnathu hia, adre me long ifucik. 38Pilato ame ha kâu, ka habe, Ieû hnathu?

A hia but ha e, e ame dit hmetu but ka at Juda me ha ködra, ka habe, Oge me ca wâ thö ke monu gan. 39Ke hwakecibun, oge me thang köbun ke at hnyi paseka: hawa, e webun oge me he ka thang ut köbun Tuhan at Juda? 40Ödra adre me ha hwegiâ hmetu, ka habe, Ca e bi, ke so bi Barabasa. Ke haba Barabasa, me at venöu.

Currently Selected:

Ioane 18: IAAI

Highlight

Copy