Ioane 14

1CA hlohlo je hnyekubun: öbun e labageju ka Khong, labageju minya ju könya. 2E se hia ta je hnyeule hnyi uma umo Cica; a ne ba mʼ oge hia but ha köbun; anyin oge me he but he ka ânyâwia hnobun. 3Ke oge ne he but ka ânyâwia ke dok hobi köbun, oge me he ka o hmetu, me oge me he ka köp öbun könya; me haba dok oge me laba hnyin, mʼ öbun e he ka laba hnyin minya. 4Ke haba dok oge me he ka hnyin, e khanʼ öbun deny. 5Haingö Toma, kâu, ka habe, Taböny Than, e ca khanʼ ohmun dok u me he ka hnyin; ke ohmun a kâmâu ka khânʼ ohmun deny? 6Iesu ame ha kâu, ka habe, Inya ang gethen, me hnathu, me möt: e ba at ame he ka he kö Cica, e ka ca mē bân ka o könya. 7Öbun e ne wâhmakhmetu nya, mʼ öbun e wâhmakhmetu Cica minya: ke hwân dö ang öbun e wâhmakhmetoâ e, me öbun e hia but wâ e. 8Haingö Filipo kâu, ka habe, Taböny Than, omanenâ thö kohmun Kamen, me me soju köhmun. 9Iesu ame ha kâu, ka habe, E kuek ut unyibun, ke ca khanö u bala inya Filipo? haba at ame ö nya, me e ame wâ minya Kamen; ke a hawa, u me ha, ka habe, Omanenâ thö köhmun Kamen? 10Hawa, u me ca ûnykûme bi a inya eû hnyi hnyin Kamen, ke Kamen eû hnyi hnyik? haba ta je hofuc wale oge me ha köbun, me o ge me ca ha thiju a ka ûnyi gak: ke haba Kamen at ame laba eû hnyik e ame ânyâ anyin ta je huliwa. 11Labageju nya ju a inya eû hnyi hnyin Kamen, ke Kamen eû hnyi hnyik: a ne ca kap e, labageju nya ju can ta je huliwa. 12E hnathu, e hnathu, inya oge me ha köbun, Haba at ame labageju könya, me e ame he ka ânyâ minya ta je huliwa oge mâdrâ; ke ame he ka ânyâ ta je huliwa ae gan hon e; anyin a inya oge me he ka Kamen. 13Ke haba ta je ûnyi hia thithö öbun e he ka sumâtâ hnyi iök, me oge me he ka ânyâ me me he ka ogânâ Kamen hnen Nokon. 14Öbun e ne he ka sumâtâ ke ûnyi hnyi iök, oge me he bi nya ka ânyâ. 15Öbun e ne hnyok könya, öbun e he ka vheno anyik ta je hnanyibu. 16Ke oge me he ka khöû ka Kamen, me me he ka ham köbun ke Ûhadruo, me me he ka tha e m bun nyiele balua, 17wale Hanu ûnyi gan hnathu: ae ca khana bi hmeledrany he ka kap e; anyin adre me ca wâ e, kʼ adre me ca wâhmakhmetoâ e: ke öbun e wâkmakhmetoâ e; anyin a e ame laba unyibun, kʼ ame he ka laba eû hnyi je hnyekubun. 18Oge me ca he ka hnʼ öbun helâ me je nakahme; ke oge me he ka o köbun. 19E okhulit biju ûen me ame ca he hmeledrany ka ö nya; ke öbun e he ka ö nya: anyin a oge me möt, me öbun e he minya ka möt. 20Öbun e he ka wâ hnyi bong eling a inya eû hnyi hnyi Cica, ke öbun eû hnyi hnyik, ke inya eû hnyi hnyibun. 21Haba at ae hu gan anyik je hnanyibu, kʼ ame vheno e, me wale bi e at ame hnyok könya: haba at ame hnyok könya, me ame he Cica ka hnyok kâu, ke oge me he bi nya ka hnyok kâu, ke oge me he minya ka omanenö nya kâu. 22Me ame ha kâu Juda (ca Isakariota) ka habe, Than lö, Ama kâmâu a u me he ka omanenö u köhmun bi ke ca ka hnyi hmeledrany minya? 23Iesu ame thu kâu, ka habe, A ne ke at ame hnyok könya, e ame he ka vheno hok hofuc: ke ame he Cica ka hnyok kâu, ke ohmu me he ka o kâu me tha laba mē. 24Haba at ame ca hnyok könya, me e ame ca vheno bi hok hofuc: ke haba hofuc öbun e long, me ca ûnyi bi gak, ke ûnyi bi ge Kamen at a kunö nya.

25Oge hia but ha ta je ûnyi e köbun, kʼ oge me tiga tha laba möbun. 26Ke haba Ûhadruo, wale Hanu Kap ame he Kamen ka kunâ hnyi iök, me e ame he ka nʼ öbun ge ta je ûnyi hia, me oûnykûmi öbun ge ta je ûnyi hia oge hia but ha köbun. 27Oge me ip hnahic unyibun; oge me ham köbun anyik hnahic: oge me ca ham köbun helâ me hna ham hnen hmeledrany. Ca hlohlo je hnyekubun, ke ca ot bi. 28Öbun e hia but long hnok hna ha köbun, ka habe, Oge me, he but, ke oge me he ka hmetu köbun. Öbun e ne hnyok könya, öbun e he ka senyin anyin oge me he ka Kamen: anyin ae gan hmâ Kamen huk. 29Ke oge me ha köbun walang ang, ke tiga ca hwâdâ, me öbun e he ka labageju e ka hwâdâ thö. 30Oge me ca he hmetu ka ose hia fuc köbun, anyin ame he jem tuhan eang hmeledrany: 31ke ba anyin ûnyi ûnyi gak: ke so bi me me wâ thö hmeledrany a inya oge me hnyok ka Kamen, ke oge me mâdrâ helâ me hnen Kamen hna hûna könya. Todrö, otin e he thö eang.

Currently Selected:

Ioane 14: IAAI

Highlight

Copy