Hosea 2

1HA thö ka je liamekeiny möbun, ka habe, Ami; me ka je lahanibun, ka habe, Ruama.

2Ivino thö me hinyöbun, ivino thö; anyin a ca öiök ut e, ke ca âiân dut inya: ke so e ame degec anyin bi ûnyi monu ûnyi hnyi hnyimakan, me hnen hna venöu hnyi wanben li basin; 3wâ oge nye uny jut anyin je ûkhaû, me hna but e, helâ me hnyi bong e ame o hnyin, me wia e me me helâ me hnyebuba, me ip e helâ me hnyei ae hwahwacit, me hlingâ e ge beic; 4eke, oge me ca he ka betenge ge je lakon; anyin a ödrin je lakon gethen. 5Anyin a hiny-ödrin ame bi ûnyi monu: momo a hnöku ödrin ame ânyâ ûnyi hnân hmehma; anyin a haingen, ka habe, Oge me he ka hnu hoton lawek, tavat adre me ha ök, me belik köiö, me leûnen mamoe,, me lino, me wakaco, me belik. 6Anyin a wale, wâ bi, oge me he ka thelöng dem gethen ge je iwadekong, me hak veto, me me ca he ka wâ deny je gethen. 7Ke e ame he ka hnu hoton laweny, ke e ame ca he ka khaletʼ ödrin; ke e ame he ka elom ödrin, ke ame ca he bi ka wâ: me e ame he ka ha, ka habe, Oge me he ka hmetu ka öiök a bân; anyin ae so könya ehac, ke kong walang ang. 8Anyin ae ca khana bi momo a oge me ham kâu hwit, me waina, me wakaco, me osehia kâu sileva, me gol, wale ödrin e bi Baala kâu. 9Anyin a wale oge me he hmetu ka hûgûnâ anyik hwit hnyi ûen e, me anyik waina hnyi ûen e, me hûgûnâ anyik leûnen mamoe, me anyik lino a hnân okhâûâ hnen he thu. 10Ke walang ang oge me he ka omanenâ hwakecin ae ikiki hnyi hnyimakan laweny, ke ba at ame he ka hûgûnâ e ûnyi hnyi hnyamok. 11Ke oge me he ka bi obiny anyin senyin hia, je bijeû, me je tehi a tebûnyi, me je sabath, me anyin je ûkhacaköu hia adre thu. 12Ke oge me he ka ohia anyin je vine, me imeta, wale e ame ha gan, ka habe, Wale hwabök a ham könya lawek: ke oge me he ka wia me me hnyot bi, ke ame he je menoiny hnyot ka han. 13Ke oge me he ka bi hwaban kâu je bong bonginy je Baala, wale e ame leû uto ae bo so hnyin ködrin; ke e ame theibâ e ge je theibeny hnyikonyen me je ohmanenanginy, me hnu hoton je laweny, kʼ ame hnying nya bi, haingö Iehova. 14Anyin a wale, wâ bi oge me he ka lelö e me hom e hnyebuba ai, me ita hofuc kâu. 15Ke oge me he ka ham kâu iny je hnyei vine ûheny e, me hnyigöulen bucen Akora hnân gethen deny gejon: ke e ame he ka thu hmetu eling helâ me ehac ke tiga hlu, ke helâji me ehac hnyi ûheny hnyi hnyei Aigupito. 16Ke haingö Iehova, ka habe, Hnyi bong eling u me he ka hawo nya, me Ishi; ke u me ca he hmetu ka hawo nya, me Baali. 17Ke oge me he ka hom but ien je Baala ûnyi hnyi hnyimen, ke adre me ca he hmetu ka ûnykûmi ödrin hoton je iödrin. 18Ke hnyi ûen eling oge me he ka ânyâ ûhihinyköu hobi ködrin me je menoiny hnyot, me je meno ame gâ ethö, me je meno ame iyawâ kânâ: ke oge me he ka thu cafana me hele vat, me vat ûnyi hnyi hnyei, ke oge me he ka omokulic ödrin hnyi sot. 19Ke oge me he ka hum u me öiök nyiele balua; eke, oge me he ka hum u me öiök hnyi wisa, me hna owisa, me hnyok ae so, me betenge. 20Oge me he ka hum u könya hnyi hnathu: ke ame he ka khanö u Iehova. 21Haingö Iehova, ka habe, Hnyi bong eling oge me he ka thu hmetu, oge me he ka thu hmetu ka je drany, ke drany ame he ka thu hmetu ka hnyi hmeledrany; 22ke ame he hmeledrany ka thu hmetu ka hwit, me waina me wakaco; ke ödrin e he ka thu kö Jezerela. 23Ke oge me he ka tâ e hobi könya bi hnyi kânâ; ke oge me he ka betenge gan waleji adre ca betenge gan; ke oge me he ka ha kodra a ca lakeik, ka habe, Lakeik u; ke adre me he ka ha, ka habe, Khonguk.

Currently Selected:

Hosea 2: IAAI

Highlight

Copy