Hosea 12

1EFERAIMA ame an ang, me wadring hoton ang hwei: e ame osehia thoi me öba wan hnyi je bong; ke ödrin e ûhi-hinyköu me at Asuria, me hok wakaco Aigupito ai. 2Ke hu ivino anyi Iehova me Juda, ke e ame he ka bi hwaban kö Jekob hoton deny je gethen; e ame he ka bi hwaban kâu hoton hnen hna ânyâ. 3E ame kât ohmâiny can liamekeiny më hnyi hnyok; ke e ame ûjöng ka Khong hnyi anyin hmai: 4eke, e ame ûjöng ka angela, me hwege bi: e ame tenge me khöû kâu: e ame wâ e hnyi Beth-ela, ke e ame ûhnenamö möhmun eling; 5wale Iehova Tuhan sabaoth; Iehova, wale hnân ûnykûme e. 6Anyin a wale hmetu ju ka Khongom: tuö ju ibetengiö me hna owisa, ke halubahingen bala Khongom.

7E at ame ûcû omjeû, e hnyi hnyamen tulut iyawo; e ame weny he ka seda. 8Ke haingö Eferaima, ka habe, E hnathu, iny tren dut omjeû, oge wâ but tang omjehek: adre me ca he ka wâ hnyikonguk, wale a hulo bi hnyi anyik ta je huliwa hia. 9Ke inya Iehova Khongom ûnyi hnyi hnyei Aigupito; oge me he hmetu bi ka olabö u hnyi je uma mano, helâji me hnyi je bonginy bijeû ae ûnyi hnathu. 10Oge hia but fuc minya ka je perofeta, me osehia je hna omanenâ; me ha je ûhoûcû a deny je perofeta 11E kong ut Gileada? e hnathu ödra ûnyi baû; adre me hudo je bolok hnyi Gilegala: eke, haba anyidra je taben hut me helâ me je! vetaûnyi hnyi je deny utetebelökiny ta! hnyei. 12Ke haba Jekob ame kec ka hnyi utkânâ hnyi Aram, kʼ ame huliwa Isaraela hnân he ka bi hwaban momo, kʼ ame tuö mamoe hwaban âiân. 13Ke haba Iehova ame hum Isaraela ûheny Aigupito a deny perofeta, me tuö e a deny perofeta. 14Ke a hia but Eferaima ti okûâ hmonyin; anyin a wale ame he ka hnen bi ju dren hon, kʼ ame he Tuhan ka ohmeto kâu hnen hna ûhaikonguny.

Currently Selected:

Hosea 12: IAAI

Highlight

Copy