Hagai 1
1
1HNYI huna a loi Dariu than, hnyi tehi a siksiny, hnyi bong a bâniny tehi, ame o but hofuc ho Iehova a deny Hagai perofeta kö Zerubabela nöku Sealetiela, gavenainy Juda, me kö Josua nöku Jozadaka, at bihut ae beönua, ame ha ka habe, 2Walang hna ha hnö Iehova tuhan sabaoth, ka habe, Haingen tavat ang, ka habe, E tiga ca o bi ûen, wale ûen he ka op uma umo Iehova. 3Me ame o but hofuc ho Iehova a deny Hagai perofeta ame ha, ka habe, 4Hawa, e ûen labâ umöbun je uma adre tubi eeöiny, ke hnyot bi uma kap ang? 5Ke walang ang, walang hna ha hnö Iehova tuhan sabaoth, ka habe, Ûnykûme ju debun je gethen. 6Öbun e hia but ti belök, ke ûhnyûkong bi hna hom; öbun e han, ke ca sekubun bi; öbun e ic, ke beic bala bi; öbun e khaû, ke ba at ame mage bi; ke haba at ame huliwa ge hwaban, me ame hom hwaban he ka hitangen hnyi tang ae moku. 7Walang hna ha hnö Iehova tuhan sabaoth, ka habe, Ûnykûme ju debun je gethen. 8Ölo thö hon bucen me hok uto, me hötilö uma; ke oge me he ka senyinâ e, ke adre me he bi ka oganö nya, haingö Iehova. 9Öbun e gejon ûnyi ae gan, ke wâ bi, e ûhnyûkong; ke öbun e hom e ka hnyi hnyaba, me oge me tûâ e. Geû? haingö Iehova tuhan sabaoth. Can umök uma ae hnyot dö, ke öbun bi, öbun e ve wadring ka hnyi umöbun je uma. 10Anyin a wale, can gabun adre me thawâ drany me me ba dân hau, ke adre me thawâ kânâ me me ba jeûiny. 11Ke oge me oi seûno ka hnyi kânâ, me ka je bucen, me ka hnyi hwit, me ka hnyi waina, me ka hnyi wakaco, me ka hnyi jeûiny kânâ, me ka at, me ka meno, me ka hnyi ta je huliwa hia hnen hnyam.
12Me haba Zerubabela nöku Sealetiela, me Josua nöku Jozadaka, at bihut ae beö-nua, me je kolon hia hnyi hnyei, me adre me long hoton hofuc ho Iehova Khongudrin, me hofuc ho Hagai perofeta, hoton hna kunâ ga Iehova Khongudrin; ke ame ootö Iehova hnen tavat. 13Me haba Hagai, me ûthumetu anyi Iehova hnyi hofuc ho Iehova, me e ame ha, ka habe, Tha inya but möbun haingö Iehova. 14Me haba Iehova ame bwebwelâ hnyeku Zerubabela nöku Sealetiela gavenainy Juda, ke hnyeku Josua nöku Jozadaka at bihut ae beönua, ke je hnyekon tavat hia hnyi hnyei; me adre me o, me ânyâ huliwa hnyi uma umo Iehova tuhan sabaoth, Khongudrin, 15hnyi bong a twente foainy tehi a siks, hnyi huna a loi Dariu than.
Currently Selected:
Hagai 1: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
