Ezekiela 40
40
1HNYI huna a twente faiviny bâ a ohmun, hnyi hnyimakan huna, hnyi bong a teniny tehi, hnyi huna a foininy hwaban hna kot taun, hnyi bong a ka e, ame e bi huk hnyamö Iehova, ke e ame hum nya kâ e. 2Hnyi je hna omanenâ ûnyi ge Khong e ame hum nya ka hnyi hnyei Isaraela, me ip nya hon bucen ae beû göranyai, ke haba hnyi hon e e hu helâke bongon ke taun hnyi hwaiöu. 3Ke e ame hum nya kâ e, ke wâ bi eling at, haba unyin me helâ me bras, ke e hnyi hnyamen tö lino, me hlowe tulut; ke e ame tot hnyi homagöule. 4Ke ame ha könya at, ka habe, Nokon at lö, wâ thö ge li emâkâm, ke long dö ge li hnyikönyâm, ke wâhmakhmetoâ thö ta je ûnyi hia wale oge me he ka omanenâ köu; anyin adre hum u kââng mʼ oge me he ka omanenâ köu ta je ûnyi e: omanenâ thö ka lap anyi Isaraela ta je ûnyi hia thithö u me he ka wâ.
5Ke wâ bi, hna up hak veto hoton uma igigilo, ke e bi hnyi hnyamen at hlowe tulut a siks je kubit ibeûen, a je kubit me hnyam: ke e ame tuluto ûlauen uma, khaca hlowe; ke khaca hlowe ibeûen göranyai. 6Me e ame o but hnyi homagöule e deiö, me ölö hnyi wacûatiny; ke e ame tuluto baten homagöule khaca hlowe ûlauen; ke habe ke baten me khaca hlowe ûlauen. 7Ke haba hnyenle me khaca hlowe ibeûen, ke khaca hlowe ûlauen, ke haba dok hnyi wanben je hnyeule, me faiv kubit; ke haba baten homagöule hnyi baten poretikoiny homagöule eiö hnyin, me khaca hlowe. 8E ame tuluto poretikoiny homagöule eiö hnyin, a khaca hlowe. 9Ke e ame tuluto poretikoiny homagöule a eit kubit; ke je hmolominy ûsa lo li kubit; ke haba poretikoiny homagöule, me eiö hnyin, cico uma. 10Ke haba je hnyeule hnyi homagöule e deiö, me kun hnyi ke keihen, ke kun hnyi ke keihen; a khaca tulut hia: ke khaca tulutiny je hmolom hnyi li ke keihen a lo. 11Ke e ame tuluto ûlauen homagöule ten je kubit; ke haba ibeûen homagöule me thötin je kubit; 12ke haba hnyigöulen cicö je hnyeule, me khaca kubit, ke khaca kubit hnyigöulen hnyi ke keihen; ke haba ta je hnyeule, me ûsa siks je kubit hnyi ke keihen, ke siks je kubit hnyi ke keihen. 13Ke e ame tuluto homagöule hwân hnyi hon ke hnyeule ka hnyi hon khaca, ke haba ûlauen me twente faiv je kubit; ke hwanuma cicö ke hwanuma. 14Ke e ame ânyâ minya je hmolom a sikste je kubit; ke haba hnyeule me ame o ke ne o but hmolom, ke homagöule e igigilo. 15Ke hwân hnyi hnyimakan homagöule adre me dit hnyin, ke ne o but hnyi hnyimakan poretikoiny homagöule eiö, me fifte je kubit. 16Ke e hu je mamalama adre me hlöng hnyi je hnyeule, ke e hnyi je hmolominy eiö hnyi homagöule igigilö, ke helâe ka hnyi je poretiko: ke bu je mamalama igigilo eiö: ke ve hu je pama hnyi je hmolom.
17Ke e ame hum nya ka hnyi hnyeule eû, ke wâ bi wale je hnyeule me je hna bi dek veto adre me ânyâ hobi kâu hnyeule igigilo: thote je hnyeule hon hna bi dek veto. 18Ke haba hna bi dek veto hnyi ke keihen homagöule helâ me ibeûen je homagöule, wale hna bi dek veto eû. 19Ke e ame tuluto ûlauen hwân hnyi hnyimakan homagöule eû ke ne o but hnyi hnimakan hnyeule eiö me hoton, wan haded je kubit, hnyi ke keihen e deiö, me hwadro. 20Ke haba homagöule eû ame hnyimakan ka hnyi hwadro; ke e ame tuluto ibeûen e, me ûlauen e. 21Ke haba je hnyeuleiny, me kun hnyi ke keihen ke kun hnyi ke keihen: ke haba je hmolominy me je poretikoiny helâ me tulutiny homagöule a bân; fifte kubit ibeûen e, ke twente faiv kubit ûlauen. 22Ke haba je mamalamainy, me je poretikoiny, me je pamainy, helâ me tulutiny homagöule ame hnyimakan deiö; ke adre me ölö ka hnyin hnyi wacûat a seven je utwacûat; ke e hnyi hnyimakodra je poretikoiny. 23Ke haba, homagöuleiny hnyeule eû, cicö ke homagöule, ka hnyi hwadro me deiö; ke e ame tuluto hwân hnyi ke homagoule ke ne o but hnyi ke homagöule wan haded kubit. 24Ke e ame hum nya ka hnyi hwaiöu, ke wâ bi ke homagöule ka hnyi hwaiöu: ke e ame tututo je hmolominy, me je poretikoiny hoton je tulut eling. 25Ke e hu je mamalama hnyin, me hnyi je poretikoiny igigilo, helâ me je mamalama eling: haba ibeûen fifte kubit, ke twente faiv kubit ûlauen. 26Ke seven je utwacûat hnân ölö, ke e cici ta je ûnyi e je poretiko; ke e hu je pama khaca hnyi ke keihen, ke khaca hnyi ke keihen hnyi ta je hmolominy. 27Ke e hu homagöuleiny hnyeule eiö hnyi hwaiöu: ke e ame tuluto hwân hnyi ke homagöule ke ne o but ka hnyi ke homagöule ka hnyi hwaiöu, wan haded je kubit.
28Me e ame hum nya ka hnyi hnyeule eiö a deny homagöule ka hnyi hwaiöu: ke e ame tuluto homagöule ka hnyi hwaiöu hoton je tulut eling; 29ke haba je hnyeuleiny, me je hmolominy, me je poretikoiny, hoton ta je tulut eling: ke e hu je mamalama hnyin e, me hnyi je poretiko igigilo: fifte kubit ibeûen, ke twente faiv kubit ûlauen. 30Ke e hu je poretiko igigilo, haba ibeûen me twente faiv kubit, ke ûlauen faiv kubit. 31Ke ame hnyimakan ka hnyeule eû ta je poretiko; ke e je pama hnyi je hmolominy: ke eit je utwacûat hnân ölö. 32Ke e ame hum nya ka hnyi hnyeule eiö e deiö: ke e ame tuluto homagöule hoton je tulut e; 33ke haba je hnyeuleiny, me je hmolominy, me je poretikoiny, me helâ me je tulut eling: ke wale je mamalama hnyin e, me hnyi je poretikoiny igigilo: haba ibeûen e, me fifte kubit, ke twente faiv kubet ûlauen. 34Ke haba je poretikoiny, me cicö hnyeule eû; ke e hu je pama hnyi je hmolominy hnyi lo li ke keihen: ke eit je utwacûat hnân ölö. 35Ke e ame hum nya ka hnyi homagöule ka hnyi hwadro: ke e ame tuluto e hoton je tulut eling; 36wale je hnyeuleiny, me je hmolominy, me je poretikoiny; ke e hu je mamalamainy igigilo: haba ibeûen e, me fifte kubit, ke twente faiv kubit ûlauen. 37Ke haba je hmolominy, me cicö hnyeule eû; ke e hu je pama hnyi je hmolominy hnyi lo li ke keihen: ke eit je utwacûat hnân ölö.
38Ke e hu hnyeule me hwanumen hnyi baten je hmolominy hnyi je homagöule; kʼ adre me hneû je hudiny leû eling. 39Ke haba hnyi poretikoiny homagöule, me hu lo li laulau hnyi lo li ke keihen, hnân hlingâ e ta je hudiny leû me hudiny hulo me hudiny monu. 40Ke haba hnyi ke keihen eû, me gethen ame he ha hnyi homagöule hnyi hwadro, wale li laulau; ke e hnyi ke keihen, hanen poretikoiny homagöule, ke wale lo li laulau. 41Vak ta laulau hnyi ke keihen, ke vak ta laulau hnyi ke keihen, hnyi homagöule; a cit je laulau hnân hlingâ je hut hnyin. 42Ke e hu vak ta laulau hobi kâu hudiny leû a je veto adre sö, ûsa khaca kubit ke haf ibeûen, ke ûsa khaca kubit me haf ûlauen, ke khaca kubit ibeûen göranyai: waleji adre me labö ip hnyin ta je omjehen hlingâ hudiny leû me hut. 43Ke ta je ûnyi hnân uhni, a khaca hnyam ûlauen adre me ohmâ eû igigilo: ke e hnyi hon je laulau utioiny je hut. 44Ke e hnyi hoton homagöule eiö je hnyeule anyin tavat khumöng hnyi hnyeule eiö, wale hnyi homagöule ka hnyi hwadro; kʼ ame hnyimakan ka hnyi hwaiöu, khaca hnyi homagöule e deiö ame hnyimakan ka hnyi hwadro. 45Ke e ame ha könya, ka habe, Haba hnyeule ang ame hnyimakan ka hnyi hwaiöu, ke hobi kâu tavat bihut, a tavat adre me tuö hanymen hnyi uma kap. 46Ke haba hnyeule ame hnyimakan ka hnyi hwadro, me hobi kâu tavat bihut, tavat adre me tuö huliwa hnyi taben hut: ödra je laku Zadoka, a ke je laku Levi, tavat adre hakekenyi Iehova me huliwa kâu. 47Ke e ame tuluto hnyeule, ke wan haded je kubit ibeûen, ke wan haded kubit ûlauen; ke ûcû vak ta ke keihen; ke e taben hut hnyi hnyimakan uma.
48Me e ame hum nya ka hnyi poretikoiny uma, me tuluto je hmolominy poretiko hia, faiv kubit hnyi ke keihen, ke faiv kubit hnyi ke keihen; ke haba ûlauen homagöule, me kun ta kubit hnyi ke keihen, ke kun ta kubit hnyi ke keihen. 49Haba ibeûen poretiko me twente je kubit, ke haba ûlauen me eleven kubit: wale hnyi wacuât adre ölö kâ e: ke e hu je utkhetep hnyi le hmolom, khaca hnyi ke keihen, ke khaca hnyi ke keihen.
Currently Selected:
Ezekiela 40: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
