Daniela 6

1KE ame so kö Dariu he ka otilâ hon dökhu tavat musi ae gan a wan haded ke twente, mʼ adre me he ka laba hnyi dökhu hia; 2ke hudrin hia ta hnyat musi a kun ae beönua, ke Daniela khaca unyidrin; me me he tavat musi ae gan he ka ha gaga ködrin je bongon, me me ca kong bi ta je ûnyi anyin than. 3Ke adre me oûnyihnathu Daniela hon ke li at musi ae beönua ke tavat musi ae gan, anyin a e unyin hanon ae ti so; ke ûnykûmenen than he ka otilâ e hon dökhu hia. 4Ke haba ke li at musi ae beönua ke tavat musi ae gan, me adre me elâm can ga Daniela ûnyi hnyi dokhu; ke ca khanʼ ödra he ka wâ ke can ke hulo: anyin a e hnathu, ke ba monu ke kongon adre me wâ gan. 5Me ame ha hnen tavat eling, ka habe, Ötin e ca he bi ka wâ can ga Daniela, ke so bi otin e he ka me wâ can ge hnanyibu anyin Khongon. 6Me haba ke li at musi ae beönua ke tavat musi ae gan, ödrin e ukhacaköu ka than me ha kâu, ka habe, Dariu a than lö, e so u möt nyiele balua. 7Öhmun e hia but tha ûhnenamö a öhmun tavat musi hia ae beönua hnyi dokhu, ke je gavena, ke je musi ae gan, ke tavat ûhnenamö, ke je taben, hnân he ka otilâ hnanyibu anyin than, me ohmâ hna nyibon, ki habe, Haba at ame he ka sumâtâ ke ûnyi unyin ke khong me ke at ke ne o but hnyi je bong a thote, ke so bi köu thibi than, me adre me he ka khûâ ka hnyi op liona. 8Ke walang ang, than lö, u ma otilâ thö hna nyibon, me sihnalimen tusi, mʼ adre me ca he ka wia bi, hoton bongon hnanyibu anyin at Madai me Peresi, waleji adre me ca he ka wia. 9Anyin a wale, haba Dariu than ame set ien hnyi hna sihnalimen me hna nyibon. 10Ke e khanö Daniela but a gʼ adre set ut tusi, me e ame didro ka hnyi umen uma; (ke adre khong je mamalaminy hnyeuleny cico Jerusalema;) ke e ame ibi okun cibouca hnyi je bong, me hic, me ole hnyi hnyimakan Khongon, helâ me hnen bi hna labö khenenâ. 11Ke haba hnyat eling, adre me ûkhacaköu me ö Daniela ame sumat me khöû hnyi hnyimakan Khongon. 12Me adre me he me ha ka than ge hnanyibu anyin than; Hawa, u je ca set iâm hnyi hnanyibu, a haba at ame he ka sumat ûnyi ge ke khong me at, ke ne o but hnyi je bong a thote, ke so bi köu thibi than, me adre me he ka khûâ e ka hnyi op liona? Ke haba than ame thu me ha, ka habe. E hnathu ûnyi e, helâ me hnanyibu anyin at Madai me Peresi, wale adre me ca he ka wia. 13Me adre me thu me ha ka than, ka habe, Haba Daniela hanen je bâ anyin at Juda, me e ame ca outö u, than, me hnanyibu u je set iâm hnyin, ke e ame ibi okun sumâtâ ta je ûnyi hnyi je bong. 14Ke a long ut than hofuc eling, me e ame vec gan hmâ, me ip hmâ hnyi hnyekon he ka omeli Daniela: ke e ame huliwa ke ne o but ame didrut seûno he ka omelo e. 15Haba tavat eling adre me ûkhacaköu ka than me ha ka than, ka habe, Khanö u thö, than lö, a haba hnanyibu anyin at Madai me Peresi, mʼ adre me ca he ka wia hna nyibon me hnanyibu wale a otilâ than. 16Ke than ame hûna me adre me lili Daniela, me khûâ e ka hnyi op liona. Ke haingen than kö Daniela, ka habe, Haba Khongom, wale u je bi athnyabainy hnyi je bong, me e ame he ka omeli u. 17Ke adre me hom veto me hlöng hnyimen thop; ke haba than ame bi haten e ge anyin ûnyi hnân ohmâ haten, ke je hna ohmâ haten anyin je taben unyin; mʼ adre me ca wia bi ga Daniela ke ûnyi a khaca. 18Me ame he than ka hnyi umen uma, kʼ ame ca han hnyi lit; kʼ adre me ca hom ta je ûnyikhumöng ka hnyi hnyimakan: ke e ame ca mokut. 19Ke haba than ame vesâ hnyi hnyomakatu, me he logot ka hnyi op liona. 20Ke e ame o but ka hnyi thop kö Daniela, me e ame hongot tenge goranyai: ke haingen than kö Daniela, ka habe, Daniela lö, athnyabainy Khong ae möt, hawa, e khana Khongom, wale at u je bi athnyabainy hnyi je bong he ka omeli u ûnyi ge je liona? 21Me Daniela ame thu ka than, ka habe, Than lö, e so u möt nyiele balua. 22Haba Khonguk ame kunâ anyin angela, me obuhlumo hnyimen je liona, mʼ adre me ca okongu nya: anyin adre me wâ ae ba hnyikonguk hnyi hnyimakan: ke haba khaca, than lö, e ba monu oge me ânyâ hnyi hnyimâkâm. 23Me haba than ame senyin gan hmâ, me ûkhûnöng he ka öû Daniela ûnyi hnyi thop. Me adre me öû Daniela ûnyi hnyi thop, ke ba aat adre me wâ gan, anyin a e ame labageju ka Khongon. 24Ke than ame hûna he ka hom tavat waleji adre me kliûö Daniela, me adre me khûʼ ödrin bi ka hnyi op liona, ödrin, ke lakudrin, ke laöiödrin; ke e hu maniny je liona hudrin, me me hmetru je jeiödrin hia, kʼ ödrin tiga ca kâlâ kânâ eû hnyi hnyin thop.

25Ke haba Dariu than ame sihnalimen ka tavat hiâ, ke ta je hnyei, ke je ve hwen hnyei, a tavat adre me labâ hmeledrany hia, ka habe, E so öbun e hnahic hmonyin. 26Inya oge me otilâ hnanyibu, ka habe, haba hnyi ta je ke keihen hia dökhuk dokhu, me hamen tavat he ka ot me öbubuny hnyi hnyimakan Khongu Daniela: anyin a e Khong ae möt, kʼ ame tethmâ nyiele balua, ke adre me ca he bi ka ohia dokhon dokhu, ke hamen bi he ka musi ke ne o but hnyi obiny: 27e ame omelo, ke hûgûnâ, kʼ ame ânyâ je haten ke je ûnyi hnân lâiâ ethö hnyi drany, ke eang hmelen; at ame omeli Daniela ûnyi ge maniny je liona. 28Ke so eling Daniela hnyi ûen musi anyi Dariu, me ûen musi anyi Koreso at Peresi.

Currently Selected:

Daniela 6: IAAI

Highlight

Copy