Daniela 12
12
1KE haba hnyi ûen eling ame he Mikaela ka tot, wale than ae gan at ame tot singiny aten em hnyei: ke ame he ka hu ûen vec, e ba helâe hwân hnyi hna hwenyi ien, me hnyei, ke ne o but hnyi ûen eling: ke hnyi ûen eling adre me he ka omelo aten em hnyei, ödra hia adre me wâ hna sihnalimidra hnyi tusi. 2Ke se hia tavat adre me mokut eû hnyi kânâ adre me he ka hmak hmetu, keihen ka hnyi möt nyiele balua, ke keihen ka hnyi hmehma me ikikiâ nyiele balua. 3Ke haba tavat ae metâ, me adre me he ka umumelam helâ me melaminy drany; ke haba tavat adre me wia tavat ae se hia hnyi hwakecin ae wisa, me ödra helâ me ta je okhû nyiele balua. 4Ke haba u Daniela lö, ikhâlâ ju je hofuc, me ohmâ ju haten tusi, ke ne o but hnyi ûen obiny: kʼ ame he tavat ae se ka wadring ehele, me ame he metâ ka gan tot.
5Ke inya Daniela oge me wâ, ke wâ bi, ke li at ödru me tot, ke at hnyi baten wagewe, ke ke at hnyi ke baten wagewe. 6Ke haingen ke at ka at ame khavâ lino, at ame laba hon köien wagawe, ka habe, Ke ne o but kehö obiny ta je ûnyi eling hnân lâiâ? 7Ke oge me long at ame khavâ lino, at ame laba hon köien wagawe, me ame ogöranyâ hnyamen a metân me hnyamen a meny ka hnyi drany, me khemanyin gan at ae möt nyiele balua a gʼ ame he ka hobi kâu ûen, me lo li ûen, me ûen me haf: ke e ka hia but oveseâ maniny hnyei ae kap, awe, ame he ka hwâdâ ta je ûnyi hia eling. 8Ke oge me löng, ke oge me ca wâ ûnykûme: me oge me ha, ka habe, Tuhok lö, ieû obiny ta je ûnyi eî 9Ke haingen, ka habe, Daniela lö, he thö; anyin adre hia but ikhâlâ me ohmâ haten ta je ûnyi e ke ne o but hnyi ûen obiny. 10Ame he tavat ae se hia ka obosoi ödra, me ohawʼ ödra, me ânyâwi ödra; ke ame he tavat ae kong ka ânyâ hwakacin ae kong bala; ke ame ca he ke at ae kong he ka wâ ûnykûme: ke so bi, ame he tavat ae metâ ka wâ ûnykûme. 11Ke hwân hnyi ûen adre me he ka ohia hnyin hudiny leû adre hudo hnyi je bong hia, ke ne o but adre me otilâ ûnyi ae ikiki at ame öba wan, me wan thauzan tu haded ke nainte je bong. 12Hnahic hnen at ame lubahingen ke ne o but hnyi je bong a wan thauzan ke theri haded ke thote faiv. 13Ke he thö u ke ne o but obiny: anyin a u me he ka menâ, me tot hnyi jekhom, e ka um dö je bong.
Currently Selected:
Daniela 12: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
