Amosa 9

1OGE me wâ Than ame tot hnyi taben hut: ke haingen, ka habe, Kot dö je ban, me me jijing dö je hwanuma: me thu omomonu ödrin hon je bödra hia; ke oge me he ka hlingâ at a biliny gadra ge hele vat: e ba at a khaca gadra ame he ka kec, ke ba ke at gadra ame he ka mot. 2Eja ke ne adre ne hiny kânâ ke ne o but hnyi hedis, ame he hnyamok ka lili ödra ûheny e; eja ke ne adre ne ölö hnyi drany ai oge me he ka hum ödra ûheny e. 3Eja ke ne adre ne lubaduöng ethö hon Karemela, oge me he ka elâm me lili ödrin ûheny e; eja ke ne ödrin e ne oiyongi ödra ge li emakök eû hnyi hmelen köiö, oge me he ka kunâ on he ka ûlû ödra eling, 4eja ke ne adre ne bâ ge je iwahnaihmiony mödra, oge me he ka kunâ hele vat he ka hlingʼ ödra eling: ke oge me he ka wâ hmʼ ödra, mʼ adre me kong ut, ke ca so bi. 5Anyin a haba Than Iehova tuhan sabaoth, wale thibi e at ame kâlâ hnyei, me ame köiö but, ke amo he tavat hia adre me labâ e ka tenge; ke e ame he ka khibi hia helâ me Wagewe; kʼ ame he ka dit hmetu helâ me Wageweiny Aigupito; 6e thibi at ame op je hnyeuleny ethö hnyi drany, kʼ ame bi taben hnyeuleny hnyi hmeledrany: at ame hawâ köien köiö ae gan me hingâlâ ka hnyi hon kânâ, Iehova ien. 7Lakon Isaraela lö, hawa öbun ûcû me at Aithiop könya? haingo Iehova. Hawa, oge me ca su at Isaraela ûhedra hnyi hnyei Aigupito, ke at Filisti ûhedra hnyi Kafetori, ke at Suria ûhedra hnyi Kira? 8Wâ bi, e bi li emakan Than Iehova hon dokhu ao kong, ke oge me he ka ohia e ûnyi hnyi hon kânâ; ke so bi oge me ca he ka ti ohia hia lap anyi Jekob, haingo Iehova. 9Anyin a wâ bi oge me he ka hûna, ke oge me he ka cubec lap anyi Isaraela unyin je hnyei, helâ me hna degec tiren hwit hnyi taben ûcûbic, ke so bi ame ca he ka kolu ke wan ae ûhnyûkong hnyikânâi. 10Kʼ ame he tavat ae kong hnyi ik hnyei ka mok ge hele vat, wale tavat adre me ha, ka habe, Ame ca he ka hakekeny köta, me khaû ota hnen ûnyi ae kong.

11Hnyi bong eling oge me he bi ka hai uma menâ umo Davita a ta, me okhötâ hmetu je dok ae hmouca hnyin; ke oge me he ka otilâ je ke keihen a amam but, me op hmeto e helâ me hnyi je bong ehac; 12mʼ adre me he ka hu je kolon ge at Edoma, ke ta je hnyei hia wale adre me ip hudra iök, haingo Iehova, at ame ânyâ e. 13Ke haingo Iehova, ka habe, Wâ bi ame he ka o je bong, me ame he at ame trohnen ka khaû at ame subö hwit, ke ame he at ame utoto wan vine ka khaû at ame cekön; ke ame he je bucen ka khukhula ge waina ae hnebwia, kʼ ame he je hut hia ka lup. 14Me oge me he ka ohmeto lakeik a at Isaraela waleji adre me hom bâ, me adre me he bi ka otilâ hmeto ta je taun waleji ae ba wan, me labâ hmetu; ke adre me he ka tā ta je hnyei vine me ic wainainy; ke adre me he ka belökâ ta hnyei me an jeûiny. 15Ke oge me he ka te ödra hnyi idra bi, ke adre me ca he hmetu ka khöbi ödra hnyi idra waleji oge ham kodra, haingo Iehova a Khongom.

Currently Selected:

Amosa 9: IAAI

Highlight

Copy