Amosa 1
1
1WALANG hofuc ho Amosa, wale at ame tha e me tavat tuö omeno hnyi Tekoa, ke walang wâhnen ge at Isaraela hnyi je bong bongu Uzia than Juda, me hnyi je bong bongu Jeroboama nöku Joasa than Isaraela, lo li huna ke tiga hia bi hwioi.
2Ke haingen, ka habe, Ame he Iehova ka kuku hwege hnyi Ziona, me fuc ûnyi hnyi Jerusalema; kʼ ame he bi ka tenge je hnyaban tavat tuö mamoe, kʼ ame he ka meleca ban Karemela.
3Walang hna ha hnö Iehova, ka habe, Can kun ta monuiny Damaseko, eke, can vak, me oge me ca he ka ohavâ hwaban e; anyin adre hia but kokot at Gileada hnen je ûnyi hnân huje hwit a fao: 4ke oge me he ka kunâ meic ka hnyi lap anyi Hazaela, kʼ ame he bi ka an hnyi uma ae hmanenang umo Ben-adada. 5Ke oge me he ka thu venyâiny Damaseko, me suba degecâ tavat adre me laba hnyi hnyigöulen bucen Aven, me at ame hom uciny musi ûnyi hnyi lap anyi Edena: kʼ ame he ka hom bâ at Suria, Kira ai, haingo Iehova.
6Walang hna ha hnö Iehova, ka habe, Can kun ta monuiny Gaza, eke, can vak, me oge me ca he ka ohavâ hwaban; anyin adre me hom bâ hnyei hia, mʼ adre me hnʼ ödra ka at Edoma: 7ke oge me he ka kunâ meic ka hnyi hna up haginy Gaza, kʼ ame he ka thong degecâ je uma umen than hnyin. 8Ke oge me he ka subâ degecâ aten Asedoda, me at ame hok uciny musi hnyi Asekelona; ke oge me he ka wia hnyamok ûcon Ekerona, me ame he ka hia je kolon hnyi Filisiti, haingen Than Iehova.
9Walang hna ha hnö Iehova, ka habe, Can kun ta monuiny Turo, eke, can vak, me oge me ca he ka ohavâ hwaban e; anyin adre me hna tavat hia ka at Edoma, ke adre me ca ûnykûme ûhihinyköu liamekeiny: 10ke oge me he ka kunâ meic ka hnyi hna up haginy Turo, kʼ ame he ka thong degecâ je uma umen than hnyin e.
11Walang hna ha hnö Iehova, ka habe, Can kun ta monuiny Edoma, eke, can vak, me oge me ca he ka ohavâ hwaban e; anyin a e ame hnu liamekeiny më ge hele vat, me degec ibetengiö, ke ame labö kia but anyin hmonyin, ke e ame tuö anyin wathethot nyiele balua. 12Ke oge me he ka kunâ meic ka hnyi Temana, ke ame he ka thong degecâ je uma umen than hnyi Boyera.
13Walang hna ha hnö Iehova, ka habe, Can kun ta monuiny lakon Amona, eke, can vak, me oge me ca he ka ohavâ hwaban e; anyin adre hia but kave je erkin hnyi Gileada, mʼ adre me he ka ogânâ idra: 14ke oge me he ka hû meic hnyi hna up haginy Raba, ke e ame he ka thong degecâ je uma umen than hnyin e, me kuku hwege hnyi bonginy vat, me weneû hnyi bonginy hou: 15ke ame he ka bâ tuhödra, e me anyin je taben, haingo Iehova.
Currently Selected:
Amosa 1: IAAI
Highlight
Share
Copy
Want to have your highlights saved across all your devices? Sign up or sign in
maintained by the British and Foreign Bible Society
