Ta je huliwa 7

1ME ame ha at bihut ae nua, ka habe, Hawa e hnathu bi ta je ûnyi e? 2Me e ame ha, ka habe,

Hnyat me lakeiny me lakamök lö, long ju. Haba Khong ae hmanenang ame manen dut kö Aberahama a kamöta, waleji ke tiga e bi hnyi Mesopotamia, ke tiga ca laba bi hnyi Karan, 3me ha kâu, ka habe, Hna but em hnyei, me je liamekeiny möu, ke he thö ka hnyi hnyei oge me he ka omanenâ köu. 4Me e ame he but ûnyi hnyi hnyei iny at Kaledaia, me laba hnyi Karan: ke hwaban dö mok a kamen, Khong ame hom e ka hnyi hnyei ang öbun e labâ walang ang: 5ke e ame ca ham kâu ke hwajekhon hnyin, e ba hmonyin ke ong dok helâ me hwadeny hnyeûcan: ke e ame ha bânâ he ka ham kâu me hnân iny, me hnân iny je mâtrâniny hwaban, waleji ke tiga ba nokon. 6Ke haba Khong ame ha helâng ka habe, ame he je mâtrâniny ka laba kanyua hnyi ke hnyei bi, ke adre me ha ka hwenbʼ ödra, me okongoâ hnyi foa haded je huna. 7Haingen minya Khong, ka habe, Oge me he ka bi hwaban ka hnyei adre me he ka huliwa kâu, ke hwaban e adre me he ka he but me bi atök hnyi hnyei ang. 8Ke e ame ham kâu ûhihinyköu, wale peretom: me e ame hnöku Isaaka me peritomonâ e hnyi bong a eitiny; ke haba Isaaka ame hnöku Jekob; ke Jekob ame hnokoâ je pateriaka a twelv. 9Ke haba je pateriaka ödrin e ûcû Josefa hnyi Aigupito can ödrin e hunyinyâ: ke e bi unyin Khong, 10kʼ ame omelö e ûnyi hnyi anyin ta je vec hia, me ham kâu ibetengiö me metâ hnyi hnyi-makö Farao than Aigupito; ke e ame otilâ e me me musi hnyi Aigupito me hnyaban hia. 11Ke ame o but hmiâ me vec ae gan hmâ nnyi Aigupito hia me Kanana: me ba jeû an lakamöta. 12Ka long ut Jekob a ga hu hwit hnyi Aigupito, me e ame kunâ lakamöta, ûhedrin a bân ling. 13Ke ame manen dut Josefa ka je liamekeiny mē hnyi ûhedrin a loiny; kʼ adre omanenâ je liamekeiny me Josefa kö Farao. 14Haba Josefa ame ûkhûnöng he ka hawâ kamen a Jekob, me anyin lap hia, ödrin sevente faiv tavat. 15Me ame he Jekob Aigupito ai; ke e ame mokcu me je lakamöta; 16ke adre me sam ödrin Sekema ai, mʼ adre me ip ödrin hnyi erkemok waleji a ûcû silevai Aberahama unyin laku Hamora hnyi Sekema. 17Ke hakekeny jut ûen adre me ha bânâ, waleji a ha Khong kö Aberahama, me ame osehia me si but tavat hnyi Aigupito, 18ke ne o but ame o ke than Aigupito, at ae ca khana Josefa. 19Wale at bihihwakecin ka je lakamöta, kʼ ame okongoâ lakamöta, kʼ ame kunʼ ödra he ka dedegec lakudra je mendring, mʼ adre me ca möt bi. 20Wale ûen adre me hnöku Mose hnyin, e wanakat ae hmanenang; ke adre hat e hnyi uma umen kamen kun ta tehi: 21ke adre me mē degecâ e, me ame hom dö e hnen hlu nöku Farao, me hat e me me nokon bi. 22Ke adre me nö Mose hnyi ta je metâ hia anyin at Aigupito; kʼ ame metâ but hnyi hofuc a hwan, me anyin ta je huliwa. 23Ke hakekeny fâte but ta je hunainy, me ame kû thö weny eû hnyi hnyekon he ka senâ je liamekeiny mē, a lakon Isaraela. 24Ke e ame wâ ke at adre me okongoâ, me e ame hadruâ, me bi hien at adre me okongoâ, me kot moko at Aigupito: 25anyin a e ame ûnykûme a gʼ ame he je liamekeiny ka wâ ûnykûme a gʼ ame he Khong ka omeli ödra ûnyi ge hnyamen bi; ke adre me ca wâ ûnykûme. 26Nyi e ame o ka li at ödru me ûkûc, me e ame thawʼ ödru me me soju, haingen, ka habe, Ke lin lö, öbu liamekeiny, ieû gabu, öbu me ûokongu öbu köu. 27Ke haba at, wale ame okongoâ hanen, e ame hagutâ e me ha, ka habe, Ia otilö u he ka musi me owisa kohmun? 28Hawa, e wem he ka hlingö nya, helâ et me hnâm hna hlingâ at Aigupito? 29Me ame kec ut Mose can hofuc eling, me laba atkanyua hnyi hnyei Midiana, waleji e ame hnokoâ hnyin lakon li baga. 30Ke hwaban je huna a fâte, ame manen dut kâu hnyi hnyebubainy bucen Sinai angela hnyi bâhlân meic hnyi ong ûö. 31Ka a wâ but Mose, me e ame lâiâ hnen hna wâ: ke e ame tiga he hakekeny he ka wâ, me ame o but hofuc hwan Than, 32ame ha, ka habe, Inya ang Khongon lakâmâm, wale a Khongu Aberahama, me Isaaka, me Jekob. Haba Mose ame öbubuny me ot ka wâ. 33Haba Than ame ha kâu, ka habe, Thang ut tangen li hnyeûcam, anyin ae kap utkânâ e u me tot hnyin. 34Inya oge hia but wâhmakhmetoâ hna okongoâ lakeik hnyi Aigupito, ke oge long ut anyidra mâng, ke oge me o but ang he ka höi ödra: ke walang ang aiö u, oge me he ka kunö u Aigupito ai. 35Wale Mose at ame hmiʼ ödra me ha kâu, ka habe, Ia otilö u he ka musi me owisa? wale Khong ame kunâ hnân at musi me at ûhomeli ge hnyamen angela wale a manen kâu hnyi ong ûö. 36Haba at eling ame hum ödra but, hwaban hnen hna omanenâ ta je ûöman me haten hnyi hnyei Aigupito, me hnyi Köiö ae dra, me hnyebuba hnyi fâte je huna. 37Wale Mose at ame ha ka lakon Isaraela, ka habe, Ame he Khong ka oâ hobi köbun a liamekeiny möbun ke perofeta helâ me inya. 38Waleji at ae hnyi ûkhacakâu hnyi hnyebuba tha e me angela at ame fuc kâu hnyi bucen Sinai, me tha e me lakamöta: at ame kap hofucin möt he ka ham köta: 39waleji a höcö long kâu hnen lakamöta, ke adre me hna degecâ e, ke ame hmetu je hnyekudra Aigupito ai, 40adre me ba kö Arona, ka habe, Ânyâ thö ke je khonguta he ka he hnyi hnyimaköta: anyin a haba Mose e, at a hum öta ûnyi hnyi hnyei Aigupito, e ca khanʼ öta ûnyi a o kâu. 41Me adre me ânyâ nokon kau hnyi ûen eling, me bi hut ka hnatheat, me senyin ka hnyi huliwa hnen je hnyamödra. 42Haba Khong ame hwio thö me hnʼ ödra but he ka bi athnyabainy ta je ûnyi hnyi drany; helâ me hna sihnalimen hnyi tusi anyin je perofeta, ka habe,

Hawa, öbun e hudo könya ta je meno adre me hlingâ me ta je hut

Hnyi hnyebuba hnyi je huna a fâte, lap anyi Isaraela?

43Ke öbun e hom minya uma menâ uma Moloka,

Ke okhûiny khongubun a Refana,

A je hnatheat öbun e ânyâ he ka khudrung ködrin:

Awe, oge me he bi nya ka hum öbun ka hnyi Babulona.

44E hu uma menâ a uma ohnatho unyin lakamöta hnyi hnyebuba, helâji me hna hûna kö Mose ame ha, ka habe, hamen he ka ânyâ hoton tulut e ame wâ. 45Ke haba lakamöta unyi Josua, me adre me hom ûnyi eling hnyi ûen adre me kap hnyei iny Aten ta je hnyei, waleji hnen Khong hna obâ hnyi hnyimakan lakamöta, ke ne o but hnyi ta je bong bongu Davita; 46wale at a wâ ibetengiö ûnyi ge Khong, kʼ ame sumâtâ he ka wâ uma umen Khongu Jekob. 47Ke haba Solomona ame otilâ uma umen Khong. 48Ke so bi ame ca laba Beönua hnyi je uma adre me ânyâ ge hnyam; helâ me hna ha hnen perofeta, ka habe,

49Haba drany, me anyik theron,

Haba hmeledrany, me taben li cak:

Ke haingen Than, ka habe, Ie uma öbun e he ka otilâ hobi könya?

Ke ewa bi dok oge ma menâ hnyin?

50Hawa, a ca op ta je ûnyi e ge hnyamok?

51Öbun hnyat ae hwege je nyibun, kʼ adre ca peritomonâ je hnyekubun me je hnyikönyöbun, öbun e labö tot metâ ûcon Hanu Kap: helâji me lakamöbun, me helâ minya ju e öbun. 52Ewa perofeta a ca ovecâ hnen lakamöbun? ke ödrin e hlingâ minya tavat a hodra ka omanenâ a gʼ ame he ka o At ae Wisa; wale öbun e alecuâ me hlingâ walang ang; 53öbun tavat öbun e kap hnanyibu a hûna hnen je angela, kʼ öbun e ca vheno bi.

54Adre me long ta je hofuc e, me ame hmönyidra gan hmâ, me adre me hoc nyu kâu. 55Ke e a unöngötö ge Hanu Kap, kʼ ame wâ hmâ drany, me wâ hmanenanginy Khong, me Iesu ame tot hnyi ke keihen a metân Khong, 56me haingen, ka habe, Wâ bi, inya oge me wâ drany adre khong, me Nokon at ame tot hnyi ke keihen a metân Khong. 57Me adre me fuc hwege goranyai, me hlöng je hnyikönyödra, me tha utut kâu; 58me adre me hagutâ e ka hnyi hoton hnyei, me lûâ ge veto: ke haba hnyat ödrin e bifuco e adre me khûâ je khaûödrin hnyi li can hidröu, Saulo ien. 59Ke adre me lûö Setefano, kʼ ame tiga hic me ha, ka habe, Than Iesu lö, kap ju hanuk. 60Ke e ame cibouca, me fuc hwege goranyai, ka habe, Than lö, ca bi hwaban kodra monu eang. Ke a hia but ha e, e ame mokut ut.

Currently Selected:

Ta je huliwa 7: IAAI

Highlight

Copy