Ta je huliwa 4

1KE ödru me tiga fuc ka tavat, me ame o but ködru tavat bihut, me taben uma kap, me je Sadukaio, 2adre me kong hnyekudra anyin ödru me nâ tavat, me khetâ möt hmetu ûnyi hnyi mok hnyi iö Iesu. 3Me adre me kot ödru me ip ödru hnyi uma ceat ke ne o but nyi: anyin a sahac ut. 4Ke ame labageju but tavat ae se hia adre me long hofuc; ke haba ûseiny obaga, me helâ me faiv thauzan.

5Ke nyi, ame ûkhacaköu thö hnyi Jerusalema tavat musi kodra, me wahingat, me hnyat sihnalimen; 6me Ana at bihut ae nua, me Kaiafa, me Ioane, me Alesanedo, me je liamekeiny me at bihut ae nua. 7Me adre me otilʼ ödru hnyi wanben, me hnö, ka habe, Hnen ie man, ke hnen iö ia öbu me ânyâ ta je ûnyi e? 8Haba Peteru ame fuc kodra, ae unöngötö ge Hanu Kap, me ha, ka habe, Öbun tavat muso hnyei me wahingat lö, 9öbun e ne hnei ohmu hnyi bong ang ge huliwa ae so öhme ânyâ ka at ae mat, ka habe, adre kâmâu hna omelö e; 10wâhmakhmeto ju öbun hia, me tavat Isaraela hia, a hnen iö Iesu Keriso at Nazareta waleji obune osatauroâ, ke Khong ame omelö hmetu thö e ûheny hnyi hna mok, haba ûnyi thibi gan, me ame tot at ang hnyi hnyimaköbun adre osoâ. 11E thibi veto öbun e degec öbun hnyat bi uma, adre hia but ânyâ hnân vetoiny ban kopiny. 12Ke ba ûhomeli ge ke at bi: anyin ae ba ke ien eang hmeledrany adre ham ka at, ae khana he ka omeli öta.

13Ke ödrin e wâ ihwegiö Peteru me Ioane, ke ödrin e wâhmakhmeto a ödru li at ae ca khanʼ ödru tusi, ke adre ca nâ, me ödrin e lâiâ; ke ödrin e wâhmakhmeto a ûnyi ödru ga Iesu. 14Ke ödrin e wâ at adre osoâ ame tha tot mʼ ödru, ke ba hofuc gadrin hnân thu. 15Ke ödrin e hia but kunʼ ödru hnyou ai ûnyi hnyi ûkhacaköu, me ödrin e ûhnenamö ju, 16haingödrin ka habe, Ieû ate me he ka ânyâ ka li at e? anyin a manen dut ka tavat hia adre me laba hnyi Jerusalema a Ödru me hia but ânyâ hing ûöman; ke ca khanʼ öta he ka ivinoâ e. 17Ke so bi me me ca lung igigiloâ bi ka aten hnyei, e so ate me he ka hûna wia ködru, he ka ca fuc hmetu bi ka ke at hnyi ien e. 18Me ödrin e hawʼ ödru me hûna ködru, ka habe, Ca ha hmetu bi me ûne hnyi iö Iesu. 19Ke haba Peteru me Ioane ödru me thu ködrin, ka habe, Ûnykûme ju öbun ame ne wisa hnyi hnyimakan Khong he ka ling öbun, ame ne he ka long Khong: 20anyin ae ca khanʼ ohmu he ka ca ha ta je ûnyi ohmu me wâ me long. 21Ke ödrin e hia but thawâ ooti ödru, me ödrin e hnʼ ödru but, anyin a ödrin e ca wâ deny he ka bi hwaban ködru ge tavat; anyin a tavat hia adre me ogânâ Khong can ta je ûnyi a ânyâ. 22Anyin ae nua hon fâte ta je hunainy at ödre ânyâ kâu ûöman e me omelö.

23Ke adre hia but hnʼ ödru, me ödru me he but ka lahanödru, me thumetu ödrin ge ta je ûnyi hia a ha ködru tavat bihut ae nua me wahingat. 24Ke ödrin e hia but long, me ödrin e ha ka Khong hnyi hnyok a khaca ke hwege ifucidrin, ka habe, Tabony Than lö, u thibi at a op drany me hmeledrany, me köiö, me ta je ûnyi hnyin: 25u je fuc a deny Hanu Kap me hnyimen kamöhmun Davita a atâm, ka habe,

Anyin a ieû ame imonumonunyköu Aten ke je Hnyei,

Me ta je hnyei adre me ûnykûme ta je ûnyi ae ba troban?

26Haba je thaniny hmeledrany, me adre me tet metâ,

Ke ame ûkhacaköu thö je taben,

Ûcon Than me Hnen hna Hû:

27E hnathu adre hia but ûkhacaköu hnyi taun ang Heroda me Ponetio Pilate me Aten ke je hnyei me at Isaraela, je ûcon Atâm ae kap a Iesu at u je hû, 28ke so bi he ka ânyâ thibi ta je unyi adre ip hmâ adrem ge hnyamâm me ânyâm musi he ka mâdrâ. 29Ke walang ang, Than, ö u wâ ju anyidra ta je hna ootâ: me ham dö ka lathnyabaem he ka hwege ha hwâm hofuc, 30ke u je lau hnyamâm he ka osoâ; mʼ adre me he ka ânyâ ta je ûöman me ta je haten hnyi ien Atâm ae kap a Iesu. 31Ke ödrin e um dö hic, me ame jijing uma ödrin e laba hnyin; me ödrin e unöngöt hia thö ge Hanu Kap, me ödrin e ha hofuc hwan Khong hnen hwege.

32Ke haba ûseiny tavat adre me labageju, adre me tha hnyok me tha ûnykûme: kʼ ame ca ha bi ke at gadra, a ga ka anyin bi ûnyi eling e ame hu; ke ka tha anyidra thibi. 33Haba je aposetolo ödrin e ohnathoâ ge man ae gan hmâ möt hmetu thö a Than Iesu; ke e but hnyi hudrin hia ibetengiö baû ae gan hmâ. 34Ke ba ke at gadre ae ba ta ûnyi: anyin a haba tavat a ödra tren hnyei me je uma, me adre me ûco e me hom hwaban ta je ûnyi adre ûco, 35me ip ju e hnyi je hnyeûcan ta je aposetolo: me adre me ve khenâ oûco ka ta je theduoc.

36Haba Josefa, adre wenyö Banaba hnen je aposetolo, (walang bongon Nokon kaukahwa,) e at Levi, ke aten hnyei Kupero, 37e hu iny utkânâ, ame ûco, me hom hwaban me ip e hnyi je hnyeûcan ta je aposetolo.

Currently Selected:

Ta je huliwa 4: IAAI

Highlight

Copy