Ta je huliwa 11

1KE a long ut je aposetolo me je liamekeiny hnyi Juda a ga hia but minya Aten ke je hnyei kap hofuc hwan Khong. 2Ke ame o thö Peteru hnyi Jerusalema, me adre me iwatretra ju mē tavat adre peritomonâ, 3me ha, ka habe, U je he ka tavat adre ca peritomonâ me tha han mʼ ödra. 4Ke haba Peteru ame hwân he ka omanenâ gaga kodra, ka habe, 5Inya bi oge me laba hnyi taun Jopa, oge me hic: me oge me wâ hna omanenâ hnyi hnok hna ta mokut, wale ke tang ame utut helâ me mano ae gan adre me hnahna ûnyi hnyi drany hnyi ta baten a vak; me ame o könya ûnyi eling: 6ke oge hia but wâ hmâ e, inya oge me ûnykûme, me wâ ta je menoiny hmeledrany ae ûsa vak can, me je meno ae hiny, me je meno ame iyâû, me je meno ame gâ ethö. 7Ke oge me long minya ifucin adre me ha könya, ka habe, Peteru lö, todrö, hlingâ but, me an ju. 8Ke haingök, ka habe, Than lö, ca e; anyin ae ba ke ûnyi ae kap me ikiki ame hnyi dit ka hnyi bnyimök. 9Me ame olo thu hnen ifucin ûnyi hnyi drany, ka habe, Haba hna ânyâwia hnen Khong u ma ca ha, me kap. 10Ke adre okun ânyâ e: me adre me aû hmetu hia thö hnyi dranyai. 11Ke wâ bi, ame ie tot hnyi hoton uma ohmun e laba hnyin, hnyat a kun, adre kunʼ ödrin könya ûhedrin Kaisaria. 12Me ame ha könya Hanu he ka tha he mʼ ödrin me ba loloâ me ca wâhmakhmeto. Ke ame tha he mönya ke je liamekeiny eang a ödrin siks; me ohmun e didro ka hnyi uma umen at eling: 13me e ame omanenâ köhmun hnen hna wâ angela hnyi umen uma, wale ame tot me ha kâu, ka habe, Ûkhûnöng dö Jopa ai he ka hawo Simona, ke ien Peteru; 14at ame he ka ha köu ta je hofuc, hnân omeli u me ânyâm lap hia. 15Ke inya oge me tiga hwân he ka fuc, me ame o but ködrin Hanu Kap, helâ me köta ehac hnyi can. 16Me oge me ûnykûme thö hofuc hwan Than ame ha, ka habe, Ioane ame bapataiso ge köiö; ke adre me he ka bapataisoi öbun ge Hanu Kap. 17Anyin a wale haba bwihlany a ham kötin Khong hnyi ûen otin e labageju ka Than Iesu Keriso, ame ne ham minya ködrin, iny ia, me inya he ka thawâ Khong? 18Ke adre bia but long hofuc e, me adre me laba hnyibû me ogânâ Khong me ha, ka kabe, E hnathu Khong ame ham ietra ka Aten ta je hnyei minya, mʼ adre me möt.

19Ke haba tavat adre vese hnyi ûöveci a kû kö Setefano, me adre me he ke ne o but hnyi Foinike, me Kupero, me Anetioka, adre me ha hofuc hwan Khong ka at Juda thibi. 20Ke haba keihen gadra a je at Kupero me Kurene, adre me o but hnyi Anetioka, me ha hofuc minya ka at Heleni, me khetâ ûthumetu ae so anyin Than Iseu. 21Me ame tha e mödra hnyamen Than: ke ödra se hia adre me labageju me hwio ka Than. 22Ke a long ut e hnen hnyikonyen ekalesia hnyi Jerusalema: me adre me kunö Banaba Anetioka ai: 23ke ame o but me wâ ibetengiö baû anyin Khong, me e ame senyin, me khöu kodra hia he ka kece ka Than ge hnyok ae tethmâ: 24anyin a e at ae so, ke unöngöt ge Hanu Kap me labageju: ke se hia tavat adre me bi hanen ka Than. 25Ke e ame he Taraso ai he ka elöm Saulo: 26kʼ ame wâ e me hom e Anetioka ai. Ke tha ödru me ekalesia hnyi khaca huna, kʼ ödru nâ tavat ae se hia; ke adre me ibi hwân hnyi Anetioka ka hwenyi ien laten ka habe, Je Kerisiano.

27Haba hnyi ûen eling ame o but hnyi Anetioka ta je perofeta ûhedrin Jerusalema. 28Ke ame todrö ke at gadrin, Agabo ien, me omanenâ ge Hanu a gʼ ame he ka hu hmiâ ae gan hmâ hnyi hmeledrany hia: wale a hwâdâ thö hnyi ûö Kalaudio. 29Haba laten adre me tha ha he ka kunâ ta je bwihlany ka je liamekeiny adre me laba hnyi Juda, e ûcû me hnödra hna ve khana: 30me adre me ânyâ e, me kunâ ka wahingat a deny Banaba me Saulo.

Currently Selected:

Ta je huliwa 11: IAAI

Highlight

Copy