Madius 8
8
1IS ahes an nedoon aien um asuol, eris ahced yin natimi is ahinag. 2Is apan ehelen natimi lepros is ethi, um atpuse an nuhup o un, um ika, Ak Natimarid, el et merit aiek, na emda aiek par ago adicinadicin nyak. 3Is adan nikman a Iesu, um atcei pan yin, um ika, Ek idim merit ainyak; namu adicinadicin aiek. Is um auroauro aien um adicinadicin va naleprose iran. 4Is ika ehelen a Iesu, Namu jim asuptecnaig ehelen tah aiek; jam atga unyum, um ehvai euc ehele natimi ahlap, um ahlap an nitai tup ahtai ineig is asaig a Moses, nitai asuptecnaig imi ra.
5Is yetpan Kaperneum a Iesu, is apan ehelen a natimi alupas o ilpu eucsupo is ethi, um ugni yin, 6um ika, Ak Natimarid, et emehe naheca unyak va napalse, et asjeuc aien anliin neom, um ohocred alupas. 7Is ika ehelen a Iesu, Ekpu apan ainyak um ago cehcehe yin. 8Is tas a natimi alupas iyehki, um ika, Ak Natimarid, ek eti upene ainyak par ika an apan aiek anliin neom unyak; namu tup asan tas ache aiek, etum umoh a naheca unyak: 9ek aheca ainyak, ja era imyiaiji intas unyak a ilpu eucsupo: ek ika ainyak ehelen et ethi, Apan aiek, et um apan aien; im lep ehelen et eche, Apam aiek, et um apam aien; im lep ehele naheca unyak, Ago nitai ineigki aiek, et um ago aien. 10Is wat atahaijeg a Iesu is um imyiali aien, um ika ehele ilpu atimi apitac yin, Et inivaijec ineig ek asaig ehelemia ainyak mika, kis eti ecetai tah nimyiisjis ninivaijec esjilid ainyak, et idivaig ineig, an pece Isreel asega. 11Ek asaig ehelemia ainyak mika, Erupu ahes an ridjai o un natimi inyi ahinag, im lep an nete o un, um han ateuc ehele Ebraham, im Aisak, im Jekob, an nelcau an nohatag: 12ja uhpu erekhaig pan an naupat ilpu halav an nelcau: erupu aunyauwaig ara eahki, um ataktit eijera. 13Is ika a Iesu ehele natimi alupas iyehki, Atga unyum aiek; uhpu ago vai euc et idivaig nimyiisjis ninivaijec unyum. Is um umoh naheca o un an nuarin-nadiat iyehki.
14Is apan a Iesu anliin neom o Pitrus, is ecet risi ehgan aien, is asjeuc aien va nemehe ihlup. 15Is atcei pan nikman aien, is par edoijaig iran nemehe ihlup: is um atidai aien, um aheca ura.
16Is wat jupura, eris imyiapan ehelen natimi is ahinag ara, eris amen ira ra a ilpu agelo has: is ahlo ilpu agelo aien an tas is ethi, um ago cehcehe ra asega eris emehe ara: 17mika yi ehneijid intas ineig is asaig a Aiseya naprofeta, um ika, “Is leucse nauatialidi uja aien, um iknipagki nemehe iraija.” 18Is wat alum atimi is ahinag a Iesu narahedvaig iran, is ika ehele ra aien, eri apan an taka uarin. 19Is apan ehelen natimi esege is ethi, um ika ehelen, Ak Natimi alupas, ki ahced euc ainyak um apan irai uarin iji eigki asega an han iran aiek. 20Is ika ehelen a Iesu, Et eteuc inhelhel o kuri aleg, im lep nasiom oi man; ja et ti nuarin asjeuc imi Inhal o natimi. 21Is ika ehelen natimi atahaijeg yin is eche, Ak Natimarid, namu ika aiek, ki uhup ainyak um apan um atelmoi etmak. 22Is um ika ehelen a Iesu, Ahced nyak aiek; erumu atelmoi ilpu atimi emesmas a ilpu atimi emesmas.
23Is aridjai an nelcau aien, eris ahced yin a ilpu atimi atahaijeg yin. 24Is um ucjum pam neihio alupas an jop, um auaijai nelcau va epeau: ja is umjeg aien. 25Eris apan ehelen a ilpu atimi atahaijeg yin, um ahugni yin, um ika, Ak Natimarid, namu imyiatamaig caija aiek: intumu emesmas akaija. 26Is ika ehele ra aien, Ak ilpu atimi auatialidi inliinmopomia, eka imtitaig aijaua vanhe? Is atidai aien, um acaiji nimtinjop im injop; is um esjilid neigpa. 27Eris imyiali natimi, um ika, Et echamecha natimi ineigki, et imyiaiji intas o un nimtinjop im injop!
28Is apan aien an taka uarin, um apahai an pece o nupu Cercesa, erus aubillid yin natimi is ero eris amen ira rau a ilpu agelo has, erus ahes arau irai mai ij eris ikni atimi emesmas iran, erus ahnag alupas arau, is ehka va atimi natgavaig an nefalaig iyehki. 29Erus ahlaig arau, um ika, Nai merit aiek vanhe ehelumrau, ak Iesu, Inhal o Atua? na mun ham aiek mika ecri fi ohocred aijama an naopan ineig, ka o’o? 30Eris amen picad is ahinag itac acen, um hag. 31Eris ugni yin a ilpu agelo has, um ika, El et’ ahlo cama aiek, namu ika aiek ecri apan aijama, um ahei picad. 32Is ika ehele ra aien, Apan aijaua. Eris atceijai rau ara, um apan um ahei picad: eris athut emda picad asega an nohmun isas, um ehlelelse an jop, um atpoijej. 33Eris aha a ilpu atimi asgi ra, um apan an nuarin-pece ura, um asuptecnaig nitai iji eigki asega, im lep nitai iji eigki eris ago vai ohwat rahki eris amen ira rau a ilpu agelo has. 34Eris ahes an nuarin-pece iyehki natimi asega, um apan um aubillid Iesu: eris wat ecet yin ara, eris ugni yin ara mika yi atga o un aien, um ude inpece ura.
Currently Selected:
Madius 8: ATY1863
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
historic text maintained by the British and Foreign Bible Society