Madius 24

1Is ahes anliin neom ahlap a Iesu um alau ijo: eris apan ehelen a ilpu atimi atahaijeg yin, um ika ehelen yi adpau aien irai uari-eom an neom ahlap. 2Is um ika ehele ra a Iesu, Eka almoi nitai iji eigki asega aijaua; et inivaijec ineig ek asaig ehelemia ainyak mika, Inyi ti amen inhat inyi ethi irai taka hat, ja uhpu alcapdicraig asega.

3Is wat ateuc aien an nedoon Olivet, eris asjapicnaig pan ehelen a ilpu atimi atahaijeg yin, um echim ahodai yin, um ika, Asuptecnaig ehelema aiek, etpu yetpam nitai iji eigki an nahopan? um asjaaicnaig an napam unyum nevitai, im nehni u nitai iji eigki? 4Is tas a Iesu, um ika ehele ra, Akumu aminjinai caua aijaua va yi jim imyiahnag caua tah natimi. 5Erupu ham natimi inyi ahinag an nidak, um ika, Ek Kristo ainyak; erupu imyiahnag atimi inyi ahinag ara. 6Akupu atahaijeg edoa aijaua im lep intas vai edoa: jam jim imtitaig: etpu idim yetpam nitai iji eigki asega, ja inyi ti fi auroauro um ahni itai. 7Erupu ati nedoa nup uran pece inyi ethi vai nup uran taka pece, im lep nup uran nelcau inyi ethi vai nup uran tak eleau: etpu lep eteuc numlaig has, im inmas, im nomoi irai iji pece inyi ahinag. 8Et idim ahka um eris nitai iji eigki asega. 9Erupu alwei caua ara mika eri abli caua, um atgei caua: erupu lep amcel vai caua a nup urai iji pece asega va nidak. 10Erupu adumoij natimi inyi ahinag an naopan iyehki, erupu efaifa jipe vai ra ara, um amcel jipe vai ra. 11Erupu atidai a ilpu profeta efaifa inyi ahinag, um imyiahnag atimi inyi ahinag. 12Etpu auatialidi inliinmopoi atimi inyi ahinag va nedo has esjilid. 13Aien inyi ti adumoij aien, uhpu imyiatamaig yin. 14Eri upyi hup um asuptecnaig intas-upene ineigki va nelcau o Atua an nobohtan asega, nitai asuptecnaig imi nup urai iji pece asega; ja etpu yetpam nehni o itai. 15Aku wit ecetai “nitai has esjilid ineig” aijaua, “et auahas itai,” is tas vaig a Tanyel naprofeta, naijivaig an nuarin itaup, (etmu aktaktai aien, et esvi itai aien,) 16ara eri amen Jutaia ara an naopan iyehki, erumu aha pan irai lola edoon ara: 17aien inyi amen aien ijinies an neom o un, etmu jim asuol aien um han leucse itai anliin neom: 18aien inyi amen aien uman, etmu jim adumoij pan aien mika yi leucse apelumai o un. 19Kaiheuc vai ra eri opouc ara, im lep ra eri alidai ilpu hal ura ara, ira adiat iji ehki! 20Akumu ugni Atua aijaua mika aki jim aha aijaua an mesese, im lep an nadiat atumop: 21inyi eteuc nohocred esjilid an naopan iyehki, is eti eteuc nohocred et idivaig itu acen um imyihum pam naopan ineig, inyi ti lep eteuc nohocred inyi idivaig iyehki an tak aopan. 22El et ahinag nadiat iji ehki, el et par emesmas natimi asega: ja inyi ti elpat nadiat iji ehki vai ilpu atimi eris ehtai ra. 23El et ika ehelemia tah natimi, Almoi, Iesu mun eigki, ka, Iesu mun naico; jim imyiaiji intas o un. 24Erupu ehcohos pam a ilpu Kristo efaifa im ilpu profeta efaifa, erupu ehvaig niji itai ehka ara, im niji itai imyiali; erupu ika ara eri imyiahnag ilpu atimi ehtai ra; ja inyi ehka. 25Ek mun upyi uhup ainyak um asuptecnaig ehelemia. 26Eru wit ika ehelemia ara, Et idim amen aien an namasacen; jim apan aijaua: ka, Et idim amen aien anliin neom; jim imyiaiji intas ura. 27Et idivaig nauwainapit et ahes an ridjai o un, um ememina an nete o un; etpu idim ucco napam o Inhal o natimi. 28Erupu asjapicnaig inmeijcop an nuarin ineig inyi amen iran natimi mas.

29Et wit ti pan itac nohocred ira adiat iji ehki etpu aupat nagesega, um eti alahala vai inmohoc, um etjo inmoijeuv an nohatag, etpu ahcatina nemda an nohatag: 30ja uhpu ecetai nitai asjaaicnaig vai Inhal o natimi an nohatag: erupu aunyauwaig nup urai iji pece asega, erupu ecet Inhal o natimi ara inhamvaig an nepeig an nohatag an nemda o un im natimi alupas o un. 31Etpu abrai ilpu agelo o un aien, mika eri ahlai intoho esjilid ara, um asjapicnaig ilpu atimi ehtai ra o un irai iji uarin asega, ahes an nahaijin nohatag um yetpan an nahaijin. 32Akumu atahaijeg intas ecsipece aijaua va nateg; Et wat ehcodaig, um elegelege nerin, eka ika aijaua, Et mun ubutpotet u inlidija: 33et idim ucco, aku wit almoi nitai iji eigki asega aijaua, akumu ato aijaua, nikavaig, et mun ubutpotet nelcau o Atua, an neucse neom. 34Et inivaijec ineig ek asaig ehelemia ainyak mika, Inyi upyi hup um ahni nitai iji eigki, ja erupu emesmas natimi an naopan ineig. 35Etpu yetpan an tid iran nohatag im nobohtan, ja inyi ti yetpan an tid iran intas unyak.

36Ja et eti ato nadiat iyehki im inuarin-nadiat iyehki tah natimi, ka tah ilpu agelo an nohatag, jai Etmak ache. 37Is idivaig nedo an numoh o Noa, etpu idim ucco an naopan iyehki inyi ham a Inhal o natimi. 38An naopan iyehki is wat pam eti ahgarero nobohtan eris hag ara um umwig, um atmehgan um asanlai, um uhum pan naopan iyehki is apan a Noa an nelcau, 39eris eti ato ara um uhum pan naopan iyehki is ahgarero nobohtan um leucse ra; etpu idim ucco napam o Inhal o natimi. 40Erupu amen natimi inyi ero umarau; uhpu atipagki inyi ethi, jam ude inyi ethi. 41Erupu amen intakata inyi ero um irara flaur an neom irara; uhpu atipagki inyi ethi, um ude inyi ethi.

42Akumu aminjinai caua aijaua; eka eti ato aijaua nuarin-nadiat ineig etpu yetpam a Natimarid unyimia. 43Ja eka ato aijaua, nikavaig, el is ato a natimi alupas an tah neom nuarin-nepeig ineig etpu han natimi ehneg itai, el is aiji aien, va yi jim ataijhan neom o un aien. 44Va nedo ineigki akumu yecrei caua aijaua: etpu yetpam a Inhal o natimi an nuarin-nadiat ineig aki eti aktaktai aijaua. 45Naheca upene um arapakau ineig yek eda, is ati yin a natimi alupas o un mika yi esjilid aien an nimnim o un, par ahtai nitai caig irai iji adiat? 46et mun ahesmoij naheca ineig, et wit ham a natimi alupas o un um ecet yin nagovaig nedo ineigki. 47Et inivaijec ineig ek asaig ehelemia ainyak mika, Etpu ati yin aien mika yi esjilid aien irai iji itai asega o un. 48Ja el et ika a naheca has anliinmopon, Et eti fi auroauro um ham natimi alupas unyak; 49um aredei ilpu etoan aheca, um hag um umwig ehele ilpu atimi umni kava; 50etpu ham natimi alupas o naheca ineig an nadiat ineig inyi ti aktaktai aien, im lep an nuarin-nadiat ineig inyi ti ato aien, 51um ucsamud yin, um ati yin an nimtan imi ilpu atimi efaifa: erupu aunyauwaig ara eahki, um ataktit eijera.

Currently Selected:

Madius 24: ATY1863

Highlight

Copy