Madius 22

1Is lep tas ecsipece ehele ra a Iesu, um ika, 2Nelcau an nohatag et idivaig natimarid is ethi, is auanetha alupas aien an natmehgan o inhalav atamaig o un, 3um abrai ilpu aheca o un mika eri ahlaig ara vai ra eris imyiacaij ra, mika eri apan u inhag an natmehgan ara: ja eris esjum ara napanvaig. 4Is lep abrai ilpu aheca o un is achei aien, um ika, Asaig ehele ra aijaua eris imyiacaij ra mika, Ek mun ago ehni nitai caig unyak ainyak: eh mun atgei kurimatau im siip upene, um lep imyiecrei ehni niji itai asega: akumu apam aijaua u inhag an natmehgan. 5Ja eris esjum ara, um atga ura, is apan is ethi uman, im lep is ethi par ahtai itai: 6eris arop irai ilpu aheca o un nahaiji ra, um abli ra, um atgei ra. 7Is wat ato a natimarid, is atavaitap aien: um abrai ilpu eucsupo o un, mika eri apan ara um auahas ilpu atimi atgei atmas, um atnamud nuarin-pece ura. 8Is ika ehele ilpu aheca o un aien, Ek mun ago ehni nitai caig unyak ainyak, ja et has nedo ura eris imyiacaij ra: 9akumu apan aijaua irai efalaig, um imyiacaij ra asega aki alum ra aijaua, mika eri apam ara u inhag an natmehgan. 10Eris apan a ilpu aheca iji ehki irai efalaig, um asjapicnaig atimi asega eris alum ra ara, ilpu atimi auatatimi im ilpu atimi upene: eris asjapicnaig u inhag an natmehgan ilpu alaig o un is ahinag.

11Is wat apan a natimarid anliin neom par alum ilpu alaig o un, is ecet natimi is ethi aien is ti napelumai uri natmehgan iran aien: 12is um ika ehelen aien, Ak nat eigki, na auri aiek par apam igcaki, et ti napelumai uri natmehgan iram aiek? Ja is eti tas aien. 13Is um ika a natimarid ehele ilpu aheca o un, Arore neduon im nikman aijaua, um atipagki yin, um ethaig yin an naupat itac; erupu aunyauwaig ara eahki, um ataktit eijera. 14Er ahlaig va atimi et ahinag, ja er ehtai atimi et eti elpat.

15Eris apan a ilpu Farisi, um tas jipe, mika eri tasehlek tas o un ara. 16Eris abraig pan ehelen ilpu atimi atahaijeg ra ara im ilpu atimi leh imi Herot. Eris ika ehelen ara, Ak natimi esege, ecra ato aijama mika, na inivaijec aiek, na esege inivaijec nedo o Atua aiek, um eti imtita atimi, um eti aktaktai natimi alupas o un tah: 17asuptecnaig aiek ehelema, Nai ikha aiek? et itaup nahtaivaig mune imi Sisar, ka o’o? 18Ja is ato nauatatimi ura a Iesu, um ika, Eka auri aijaua, ak ilpu atimi efaifa, par oop nyak? 19leh pam aijaua ehelek mune er ahtai, ki almoi ainyak. Eris leh pan ehelen nuari-mune is ethi ara. 20Is ika ehele ra aien, Nalmui di ineigki, im nidai di eris aged? 21Eris um ika ehelen ara, Sisar. Is um ika ehele ra aien, Alupai Sisar niji itai o Sisar; jam ahtai imi Atua niji itai o Atua. 22Eris wat atahaijeg intas o un ara, eris imyiali ara, um ude yin, um atga ura.

23An nadiat iyehki eris apan ehelen a ilpu Satusi, atimi iji eigki era ika ara eri eti lep anusjai atimi emesmas, eris ahodai yin ara, 24um ika, Ak Natimi esege, is ika a Moses, El et mas tah natimi eti asvalav, etpu leh ehgan a etoan, um asvalav vai etoan. 25Eris amen ehelema ilpu raimu is seven: is leh ehgan a inmetto, um mas, is eti eteuc inhal urau, is ude ehgan aien mika yi ehgai etoan: 26is lep leh yin a etoan is ethi, im lep is ethi, um yetpan irai seven: 27is par apitac intakata, um mas: 28inyi ehgan tah ra sji eigki a di aien is seven an nadiat anusjai? eris leh yin ara asega. 29Ja is tas a Iesu, um ika ehele ra, Eka ahnag aijaua, um eti ato intas eris aged, im nemda o Atua. 30Eru wit anusjai atimi eri eti lep atmehgan ara, um eti asanlai, ja era idivaig ilpu agelo o Atua an nohatag ara. 31Akis esvi aijaua intas o Atua ehelemia va nanusjai o atimi emesmas, ka o’o, is ika aien, 32“Ek Atua o Ebraham ainyak, um lep Atua o Aisak, um lep Atua o Jekob”? Et eti Atua o ilpu atimi emesmas a Atua, ja et Atua o ilpu atimi umumoh ache aien. 33Eris wat atahaijeg intas ineigki natimi is ahinag, eris um imyiali nesege o un ara.

34Eris wat atahaijeg a ilpu Farisi, nikavaig, is auud yi aijiraig intas o ilpu Satusi a Iesu, eris asjapicnaig ara. 35Is oop yin natimi asuptecnaig intas is ethi ira ra, um ahodai yin, um ika, 36Ak Natimi esege, et esjilid neveh tas alep? 37Is um ika ehelen a Iesu, “Etmu aiyu inliinmopom aiek vai Ihova Atua unyum anliinmopom asega, im lep an nesgam asega, im lep an naktaktai asega unyum.” 38Intas alep uhup ineig um esjilid. 39Im lep napahvaig ineig et ethi, nikavaig, “Etmu aiyu inliinmopom aiek va atimi eblaamnem unyum, et idivaig naiyu u inliinmopom vai euc.” 40Nohuun tas alep asega im intas o ilpu profeta intas alep eraigki.

41Eris wat asjapicnaig a ilpu Farisi, is ahodai ra a Iesu, 42um ika, Eka ikha aijaua vai Kristo? et mapoi di aien? Eris um ika ehelen ara, Et mapoi Tevit aien. 43Is ika ehele ra aien, Is auri a Tevit par anvi nidan irai Nesgan Upene par ika Natimarid, um ika, 44“Is ika a Ihova ehele Natimarid unyak, Namu ateuc aiek an matak, um uhum pan naopan iyehki ekpu ikni ilpu atimi tak atimi iram ainyak mika eri itai atijai neduom iran”? 45Va nitai ineigki el et anvi nidan a Tevit par ika Natimarid, et echamecha et pah mapon aien? 46Is ehka vaig tah intasvaig ehelen, eris imtitaig natimi inlep ahodai yin vaig.

Currently Selected:

Madius 22: ATY1863

Highlight

Copy