Madius 14
14
1An naopan iyehki is atahaijeg intas vai Iesu a Herot natimarid, 2is um ika ehele ilpu dualep o un aien, Joanes ineigki Natimi baptiso; et mun lep nusjai aien; va nitai ineig et ago niji auritai ehka aien.
3IS upyi arop irai Joanes a Herot, um arore yin, um ati yin anliin neom ipjin vai Herotyas, ehgai Filipus etoan. 4Is ika ehelen a Joanes, Et itaup vai euc inlehvaig ehgai etoam. 5Is merit aien mika yi atgei Joanes, jam imtita atimi is ahinag; eris ika ara, Et aprofeta aien. 6Eris wat aminjinaig nadiat ineig eris apos Herot iran, is adekdikjai inhalav atahaig o Herotyas an nuhup ura, is imyiacitak a Herot. 7Va nedo ineigki is upyi asig yi aktit intas aien, mika yi alupai yin nitai ineig inyi ugni yin vaig aien. 8Is upyi hup a risin um asuptecnaig ehelen; is um ika aien, Efi alupai nyak aiek nidjini Joanes Natimi baptiso an haklin nelcau. 9Is ohocred a natimarid: ja is ika aien, eri alupai yin, vai intas nupyi asig yi aktit o un, im lep vai ra eris ateuc ehelen ara um hag. 10Is abraig tah aien, mika yi auud yamud nidjini Joanes Natimi baptiso, anliin neom ipjin. 11Eris apos nidjinin an haklin nelcau, um alupai natahaig iyehki: is imyiapan ehele risin aien. 12Eris apan a ilpu atimi atahaijeg Joanes, um leh nohun um atelmoi, um apan um asuptecnaig ehele Iesu.
13IS wat atahaijeg a Iesu, is ahes eahki aien, um aridjai an nelcau, um echim apan an nuarin namasacen: eris wat atahaijeg atimi, eris ahes irai iji uari-pece ura ara, um atga ubos, um apitac yin. 14Is wat apan a Iesu, um alum atimi is ahinag, is aiheuc vai ra aien, um ago cehcehe ilpu atimi emehe ira ra.
15Is wat jupura, eris apan ehelen a ilpu atimi atahaijeg yin, um ika, Et amasacen igcaki, um lep epeig; abrai atimi iji eigki aiek mika eri atga ura ara, um apan irai iji uari-pece, um auanimtan nitai caig incara. 16Is um ika ehele ra a Iesu, Eri jim atga ura ara; akumu alaa ra nitai caig aijaua. 17Eris um ika ehelen ara, Et faiv ache nareto igcaki, um ero ache numu. 18Is um ika aien, Leh pam aijaua ehelek. 19Is ika aien ehele atimi asjapicnaig, eri ateucse ara irai efelelicai, is leh nareto is faiv aien, im numu is ero, um easji pan an nohatag, um naaurineig, um iswoplecoplec, um alupai ilpu atimi atahaijeg yin nareto iji ehki, eris edaig ira atimi iji ehki a ilpu atimi atahaijeg yin. 20Eris hag ara asega, um gaije: eris asjapicnaig nuari itai hegaig eris eti ahtahni ara, um atohoaig irai nefehcat is twelv, is um ohua. 21Ara eris hag ara eris faiv dausant a ilpu atamaig, um aled ilpu takata im ilpu halav.
22Is ika a Iesu ehele ilpu atimi atahaijeg yin, eri aridjai an nelcau ara, um apan an taka uarin um uhup iran, ja is abrai atimi aien mika eri atga ura ara. 23Is wat abrai atimi aien mika eri atga ura ara, is echim aridjai aien an nedoon is ethi, mika yi alaigaheni: is wat jupura, is echim amen aien ache eahki. 24Is asjeuc nelcau an namilvai, um auaijai va epeau: is has nimtinjop. 25Is apan ehele ra a Iesu an nathut o nadiat, um atga an jop. 26Eris wat ecet yin a ilpu atimi atahaijeg yin natgavaig an jop, eris um imtitaig ara, um ika, Natmas ineigki; um aunyauwaig va nimtitaig ura. 27Is idim tas ehele ra a Iesu, um ika, Etmu eropse inliinmopomia aijaua; ainyak aigki; jim imtitaig aijaua. 28Is tas a Pitrus, um ika ehelen, Ak Natimarid, el et aiek aigko, namu ika aiek ehelek ki apan ehelum ainyak an jop. 29Is um ika aien, Apam aiek. Is ahes an nelcau a Pitrus um asuol, um atga an jop, um apan ehele Iesu. 30Is wat ecetai nimtinjop aien nalupasvaig, is um imtitaig aien; is atupun aien um ete, is ahlaig aien, um ika, Ak Natimarid, imyiatamaig nyak aiek. 31Is auroauro a Iesu um arahpan va nikman, um asjirai yin, um ika ehelen, Ak natimi auatialidi, na auri aiek par imyiisjis nahcil? 32Erus wat aridjai arau an nelcau, is um esjaig nimtinjop. 33Ara eris amen an nelcau ara, eris apan ara um atpuse an nuhup o un, um ika, Et idim inivaijec ineig, nikavaig, nai Hal o Atua aiek.
34Eris apan ara, um apahai an pece Jenesaret. 35Eris wat ato a nup an nuarin pece iyehki, eris abraig pan atimi ara irai iji uari pece asega, um imyiapan ehelen ilpu atimi emehe asega; 36um ugni yin, mika eri atcei pan intid an napelumai iran ara: eris um umumoh upene ara sji eigki asega, eris atcei pan yin ara.
Currently Selected:
Madius 14: ATY1863
Highlight
Share
Copy
Want to have your highlights saved across all your devices? Sign up or sign in
historic text maintained by the British and Foreign Bible Society
