Lukas 24

1IS wat lahlah an nuhihialeg an nadiat uhup irai wiik, eris apan ara u unmun nij, um apos nitai auanipin upene eris ago ara, eris lep ahced ra nahaiji atimi. 2Eris ecetai inhat ara eris mun atcelcaigpagki u unmun nij. 3Eris apan iran ara, jam eti ecetai nohui Iesu Natimarid. 4Is wat ehioehio inliinmopura ara va nitai iji eigki, erus aiji ubutpotet ehele ra natimi is ero is ememina napelumai ira rau: 5eris imtitaig ara um atpuse an nobohtan; erus ika ehele ra arau, Eka auri aijaua par ahilek yin ehele ilpu atimi emesmas et mun nusjai aien? 6et ti aien igcaki, et mun nusjai aien: akumu imyiehva aijaua intas o un ehelemia an naopan iyehki an namen o un Calili, 7um ika, Uhpu idim ati Inhal o natimi ehele atimi auatatimi, mika eri atgei yin an nauincai atgeig, ja et wit ti pan itac nadiat inyi eseij, etpu lep nusjai aien. 8Eris imyiehva intas o un ara, 9um ahes u unmun nij, um atga ura, um asuptecnaig nitai iji eigki asega ehele atimi is eleven, im lep ehele ra asega is eche. 10Is asuptecnaig nitai iji eigki ehele ilpu apostolo a Mere nupu Mactala, im Joana, im Mere risi Jakobus, im lep nahaiji ilpu takata eris ahced ra ara. 11Ja is idivaig intas ahcil intas ura ehele ra, eris eti eteuc iran ara. 12Is atidai a Pitrus um athut pan u unmun nij; is atpuse aien um ecetai napelumai yilyil, eris echim ati, um atga o un, um imyiali nitai ineigki eris ago.

13An nadiat iyehki erus apan natimi is ero ira ra an nuarin-pece is ethi, nidan Emeus, is apohod vaig Jerusalem is tup idivaig is eet mail. 14Erus tas jipe arau va nitai iji eigki asega is yetpam. 15Erus wat tas jipe arau um aktaktai nitai iji eigki, is uhum pan rau a Iesu, um ahced rau. 16Is arupoig nesganimtarau arau, erus eti ato yin arau. 17Is ika ehele rau aien, Inhe ineigki erau atga asaig aijaurau? et atpuh nesganimtamirau aijaurau vanhe? 18Is tas natimi is ethi ira rau, nidan Kliopas, um ika ehelen, Na upu taka uarin aiek, jam amen Jerusalem, um eti ato nitai iji eigki et mun yetpam eahki an naopan ineig, ka o’o? 19Is ika aien ehele rau, Nevitai? Erus ika ehelen arau, Nitai iji eigki vai Iesu nup an Nasared, is aprofeta aien, is esjilid nedo o un im intas o un an nuhup o Atua im lep atimi asega: 20eris ati yin a ilpu atimi ahlap esjilid im ilpu atimi alupas uja mika eri asaig inmas o un, eris um atgei yin ara an nauincai atgeig. 21Ecris ika aijama is atimi iyehki aien eris ika etpu imyiatamaig nupu Isreel aien: im lep ineig, eris ago nitai iji eigki ja pah ti pan itac nadiat is eseij: 22maiya, im lep ineig, ecris imyiali aijama vai intas o nahaiji ilpu takata irama, eris apan u unmun nij ara an nuhialeg; 23eris eti ecetai nohun ara, ja eris apam ara, um ika, Era mun ehcohos pam ehelema a ilpu agelo, um ika, Et mun nusjai aien. 24Eris apan u unmun nij nahaiji atimi irama, um ecetai et idivaig intas eris asaig a ilpu takata: eris eti ecet yin ara. 25Is ika ehele rau aien, Ak ohwat atimi ahnag, et auatialidi inliinmopomirau aijaurau par imyiisjis ninivaijec intas asega eris asaig a ilpu profeta: 26eris idim ika yi leucse nohocred iji eigki a Kristo, ja par leh natimi alupas o un. 27Is atupun aien um asuptecnaig ehele rau intas asega vai yin is aged a Moses im ilpu profeta asega. 28Ehtijis apan ahtaij ubutpotet u nuarin-pece iyehki erus apan iran arau: is ika aien yi ahtaregdei rau. 29Ja erus acaiji yin arau, um ika, Amen aiek ehelemrau; et ubutpotet u nepeig; injupura mun eigki. Is apan aien um amen ehele rau. 30Is wat ateuc ehele rau aien um hag, is leh nareto aien, um naaurineig iran, um aswaplec, um alaa rau. 31Is wat weilah nesganimtarau arau, erus ato yin arau; ja is um tup ti ehpan aien ehele rau. 32Erus tas jipe arau, um ika, Is wat tas eheleijau aien an nefalaig, um asuptecnaig intas eris aged, is emda inliinmopjau akaijau.

33Erus atidai arau an nuarin-nadiat iyehki, um adumoij pan Jerusalem, um ecet natimi is eleven eris asjapicnaig ara, im lep atimi amen ehele ra, 34eris ika ara, Et mun idim nusjai a Natimarid, um ehcohos ehele Saimona. 35Erus asuptecnaig arau nitai iji ehki an natga urau an nefalaig, im lep nato yin vaig urau an naswaplec nareto o un.

36Eris wat tas jipe ara, is aiji a Iesu an nuhup ura, um ika ehele ra, Etmu eteuc neigpa ehelemia. 37Is ehioehio alupas inliinmopura ara, um imtitaig, um aktaktai, mika eris mun ecetai natmas. 38Is ika ehele ra aien, Eka auri aijaua par imtitaig? eka auri aijaua et par ehioehio inliinmopomia? 39almoi nikmak ero aijaua im neduok ero, ainyak aigki: atcei pam nyak aijaua, um almoi; et eti ohu atmas im neduon, et idivaig nalum nyak unyimia. 40Is wat asan tas ineigki aien, ja par ehvaig ehele ra nikman im neduon. 41Eris wat imyiali ara, is ti nimyiijis ninivaijec ura va nimyiacitak ura, is ika ehele ra aien, Et eteuc nitai caig unyimia aijaua, ka o’o? 42Eris alaan nuari numu ara eris ahen, im nuari hunekom. 43Is leh aien, um caig an nuhup ura.

44Is ika ehele ra aien, Kis wat amen ehelemia ainyak kis asan tas iji eigki ehelemia ainyak, mika uhpu idim ehneijid irak nitai iji eigki asega eris aged vai nyak an nitasvitai o Moses, im lep an nitasvitai o ilpu profeta, im lep an nitasvitai Ohranitai. 45Is asalgei inliinmopura aien, mika eri ato ara intas eris aged, 46um ika ehele ra, Eris aged is ucce, im lep ineig eris idim ika yi mas a Kristo, ja et wit ti pan itac nadiat inyi eseij, etpu lep nusjai aien: 47mika eri atupun Jerusalem ara um asuptecnaig ehele nup urai iji pece asega, eri adumoij anliinmopura ara um leh nitai iknipagki nedo has ura an nidan. 48Eka atimi asuptecnaig nitai iji eigki aijaua. 49Ekpu alupai caua ainyak intas upyi asaig o Etmak: jam amen aijaua an nuarin-pece Jerusalem, um uhum pan naopan iyehki akupu leh nemda aijaua jipagko.

50IS imyiapan ra Bedane aien, um adaigjai nikman ero, um asan tas upene vai ra. 51Is wat asan tas upene vai ra aien, eris atipagki yin ehele ra, um imyiaridjai yin an nohatag. 52Eris alaigaheni vai yin ara, um adumoij pan Jerusalem, um imyiacitak alupas: 53eris amen ara an neom ahlap irai iji adiat, um acesaces nohranitai, um imyiahpas Atua. Emen.

Currently Selected:

Lukas 24: ATY1863

Highlight

Copy