Lukas 20

1Is esege imi atimi aien anliin neom ahlap, an naopan iyehki an nadiat is ethi, um asuptecnaig intas-upene, eris apan ehelen a ilpu atimi ahlap esjilid, im ilpu atimi esege, im ilpu atimi tas alep, 2um tas ehelen, um ika, Na ago nitai iji eigki aiek vai intas alep u di? asuptecnaig ehelema aiek; is alupai euc nemda ineigki a di? 3Is tas ehele ra aien, um ika, Ekpu lep ahodai caua ainyak va nitai inyi ethi ache; asuptecnaig ehelek aijaua: 4Is ahes nabaptiso o Joanes an nohatag, ka ehele atimi? 5Eris tas jipe ehele ra ara, um ika, El ta ika akaija, Is ahes an nohatag; etpu ika aien, Akis auri aijaua par eti imyiaiji intas o un? 6Ja el ta ika akaija, Is ahes ehele atimi; erupu asji caija irai hat atimi asega: era ika ara is idim aprofeta a Joanes. 7Eris tas ara, um ika, Ecra eti ato aijama nuarin ineig is ahes iran. 8Is ika ehele ra a Iesu, Inki ti asuptecnaig ehelemia ainyak nohu nemda ineig ek ago nitai iji eigki vaig ainyak.

9Is atupun aien um asan tas ecsipece ineigki ehele atimi, um ika, Is ahoaig vaine natimi is ethi anliin nekaro o un, um atceijaig imi ilpu atimi ahapol, um atga o un, um apan an pece itac acen, um amen is itu iran. 10Is wat metto nohoan, is abraig pan naheca is ethi o un aien ehele ilpu atimi ahapol, mika eri alupai yin nahaiji ohoai itai an nekaro vaine o un: ja eris aredei yin a ilpu atimi ahapol, um abraig pan yin, um eti alupai yin tah nitai. 11Is lep aketo aien um abraig pan naheca o un is ethi is eche: eris lep aredei yin ara, um ago nedo has esjilid vai yin, um abraig pan yin, um eti alupai yin tah nitai. 12Is um lep aketo aien um abraig pan is ethi is eche: eris ati inmacop iran ara, um ethaig pan itac yin. 13Is ika a natimi alupas ohuun nekaro vaine iyehki, Inki ago inhe ainyak? ekpu abraig pan inhalav cop unyak ainyak: eru wit ecet yin ara, kit erupu ago nedo eccen vai yin ara. 14Ja eris wat ecet yin a ilpu atimi ahapol, eris tas jipe ehele ra ara, um ika, Natimi ineigki etpu isjipigmoig etman aien: ti apan akaija um atgei yin, va yi upu uja uman. 15Eris ethaig pan itac yin ara an nekaro vaine, um atgei yin. Etpu ago inhe ira ra a natimi alupas ohuun nekaro vaine? 16Etpu idim han aien, um atgei ilpu atimi ahapol ijiehki, um atceijaig nekaro vaine o un imi tak atimi. Eris wat atahaijeg intas ineigki ara, eris ahras ara um ika, O’o. 17Is alum ra aien, um ika, Inhe neigki eris aged, nikavaig, “Inhat ineig eris esjum vaig a ilpu atimi acta neom, et hat esjilid ineigki an nesvi va neom”? 18Aien inyi eropjai an hat iyehki aien, etpu auhoig yi oplecoplec yin aien; aien inyi etjojai iran inhat ineigki, etpu ehtoplecoplec yin inhat.

19An nuarin-nadiat iyehki eris merit a ilpu atimi ahlap esjilid, im ilpu atimi esege, narop iran vaig; eris imtita atimi ara: eris ato ara, nikavaig, is asan tas ecsipece ineigki aien vai ra. 20Eris imyiiris yin ara, um abraig pan atimi efaifa, mika eri aminjinai yin, jam idivaig atimi inivaijec, um tasehlek tas o un; eris ika ara eri atceijai yin ehele natimarid an pece, mika yi tas alep vai yin aien. 21Eris ahodai yin ara, um ika, Ak natimi esege, ecra ato aijama mika et inivaijec intas unyum im nesege unyum, na eti imtita atimi aiek, jam esege inivaijec nedo o Atua: 22Et itaup vai cama nahtaivaig mune imi Sisar, ka o’o? 23Ja is ato nefaifa ura aien, um ika ehele ra, Eka auri aijaua par oop nyak? 24leh pam aijaua ehelek mune yi ethi, ki almoi ainyak. Nalmui di ineigki, im nidai di eris aged iran? Eris tas ara, um ika, Sisar. 25Is ika ehele ra aien, Alupai Sisar niji itai o Sisar, jam ahtai imi Atua niji itai o Atua. 26Is ehka vai ra inlehvaig intas o un an nuhup o atimi: eris imyiali intas asuptecnaig o un ara, um eti tas.

27Eris apan ehelen nahaiji ilpu Satusi, atimi iji eigki eris ika ara eri eti lep anusjai atimi emesmas; eris ahodai yin ara, 28um ika, Ak natimi esege, is aged eheleija a Moses, um ika, El et mas etoan tah natimi, um ude ehgan, jam eti eteuc inhal urau, el etmu leh ehgan a etoan, um asvalav vai etoan. 29Eris amen ilpu raimu is seven: is leh ehgan a inmetto, um mas, is um eti eteuc inhal urau: 30is lep leh yin a etoan is ethi ehgan, um mas, is um eti eteuc inhal urau: 31is um lep leh yin a etoan is ethi is eche; eris um leh yin a ilpu raimu is seven, um emesmas: is um eti eteuc inhal o un tah ra: 32is par apitac a intakata, um mas: 33ja an nadiat anusjai inyi ehgan tah ra sji eigki a di aien? eris leh yin ehgara a ilpu raimu is seven. 34Is tas a Iesu, um ika ehele ra, Era atmehgan a nup uran nobohtan ineigki, um asanlai: 35ara uhpu ika eri upene ara um apan an pece iyehki um anusjai, eri eti atmehgan ara, um eti asanlai: 36eri eti lep emesmas ara: erupu tup idivaig ilpu agelo ara; erupu hal o Atua ara, im ilpu halav anusjai. 37Im lep ineig, is asuptecnaig a Moses an cai, mika erupu anusjai a ilpu atimi emesmas, is wat anvi nidan aien Ihova par ika “Atua o Ebraham, im lep Atua o Aisak, im lep Atua o Jekob.” 38Et eti Atua o ilpu atimi emesmas aien, ja et Atua o ilpu atimi umumoh ache aien: era umumoh atimi asega vai yin. 39Eris tas nahaiji ilpu atimi esege, um ika, Ak natimi esege, na mun asuptecnaig upene aiek. 40Is wat ti pan itac intas iyehki, eris lep imtitaig ara inlep ahodai yin vaig vaig tah nitai.

41Is ika ehele ra aien, Era auri ara par ika, Et mapoi Tevit a Kristo? 42Is um ika a Tevit an nitasvitai Ohranitai, “Is ika a Ihova ehele Natimarid unyak, Namu ateuc aiek an matak, 43um uhum pan naopan iyehki ekpu ikni ilpu atimi tak atimi iram ainyak mika eri itai atijai neduom iran.” 44Va nitai ineigki et anvi nidan a Tevit par ika Natimarid; et echamecha et pah mapon aien?

45Is tas aien ehele ilpu atimi atahaijeg yin an nuhup o atimi asega, um ika, 46Akumu aminjinai caua aijaua vai ilpu atimi esege, era merit ara naso ra vaig irai apelumai opra, um era lep merit ara mika eri aiheuc vai ra atimi irai uarin asjapicnaig atimi iran, era lep merit ara va niji itai ateuc esjilid irai eom alaigaheni, im ep niji uarin esjilid u inhag o atimi; 47era atoraliak inpadiaig o ilpu takata eris emesmas a ilpu atamnyura ara, um alaigaheni opra par adahpoi nedo ura: etpu esjilid nohocred ura.

Currently Selected:

Lukas 20: ATY1863

Highlight

Copy