Lukas 14

1An nadiat atumop is ethi is apan aien anliin neom o natimi alupas is ethi is Farisi aien mika yi hag, eris imyiiris nedo o un ara. 2Is ateuc an nuhup o un a natimi is ethi is emehe alagaigwai aien. 3Is tas a Iesu ehele ilpu atimi asuptecnaig intas alep im ilpu Farisi, um ika, Et itaup nago cehcehe atimi vaig an nadiat atumop, ka o’o? 4Eris eti tas ara. Is leh yin aien, um ago cehcehe yin, um adceijai yin; 5um tas ehele ra, um ika, Natimi ineig yek eda iramia, et wat etjose an nehpanitai nifo o un ka kurimatau o un, et eti aihiaigjai aien an nadiat atumop? 6Is ehka vai ra nauudvaig intas iji eigki.

7Is ecsipece aien ehele ilpu atimi eris imyiacaij ra, is wat almoi nedo ura aien nahilekvaig itai ateuc esjilid imi ra; um ika ehele ra, 8Et wit imyiacaij pan euc tah u inhag an natmehgan, namu jim ateucse aiek an nuarin esjilid; kit etpu lep imyiacaij natimi esjilid iram aien; 9etpu apan natimi ineig et imyiacaij caurau, um ika ehelum, Asuol aiek va natimi ineigki; napu ateucse aiek sepamki, um ehcamai. 10Ja et wit imyiacaij euc tah natimi, apan aiek um ateucse sepamki; et wit apan aien et imyiacaij euc, um ika, Ak etoak, namu aridjai aiek: erupu eccen vai euc ara era ateuc ehelum ara um hag. 11Aien et ago nedo ijinies aien, etpu upoupo aien; aien et ago nedo upoupo aien, etpu esjilid aien.

12Is lep tas aien ehele natimi ineig is imyiacaij yin, um ika, Na wit auanetha alupas aiek ka inhag alupas, jim imyiacaij ilpu apa unyum aiek, ka ilpu etoam, im ilpu atimi ehpan iram, im ilpu atimi ikni itai eblaamnem unyum; kit erupu lep imyiacaij euc ara, um aru nedo unyum: 13na wit auanetha alupas aiek, imyiacaij ilpu ihki atimi, im ilpu atimi amot neduora, im ilpu atimi asvahtec neduora, im ilpu atimi aupat nesgaimtara: 14namu ahesmoij aiek; et ehka vai ra naruvaig nedo unyum: ja napu leh neruvaig imi euc aiek an naopan iyehki eru wit anusjai a ilpu atimi upene.

15Is wat atahaijeg intas iji eigki natimi is ethi is ateuc aien um hag ehelen, is ika ehelen aien, Et mun ahesmoij aien etpu hag aien an nelcau o Atua. 16Is ika ehelen aien, Is auanetha alupas natimi is ethi, um imyiacaij atimi is ahinag: 17is wat jupura is abrai naheca o un aien mika yi asaig ehele ra eris imyiacaij ra, um ika, Apam aijaua; eh mun imyecrei niji itai asega. 18Eris ehrimyiisjis athiathi ara asega. Is uhup natimi is ethi, um ika, Ek mun auanimtan nuarin nobohtan ainyak, ek mun et hidim ika ainyak ki apan um almoi: ek ugni euc ainyak mika an jim imyiisjis irak aiek. 19Is lep ika is ethi, Ek mun auanimtai kurimatau et ten ainyak, ekpu apan ainyak um almoi nedo ura: ek ugni euc ainyak mika an jim imyiisjis irak aiek. 20Is lep ika is ethi, Ek mun leh ehgak ainyak; et ehka vai nyak napanvaig. 21Is apan a naheca iyehki um asuptecnaig nitai iji eigki ehele natimi alupas o un. Is edemda a natimi alupas iyehki, um ika ehele naheca o un, Auroauro aiek um apan irai efalaig esjilid im lep imteri efalaig an nuarin-pece, um imyiapam igcaki ilpu ihki atimi, im ilpu atimi amot neduora, im ilpu atimi asvahtec neduora, im ilpu atimi aupat nesgaimtara. 22Is ika a naheca iyehki, Ak natimi alupas, ek mun ago nitai iyehki ainyak as asaig aiek, ja et eti ohua neom. 23Is ika a natimi alupas ehele naheca o un, Apan aiek irai efalaig itac, im lep lelitai, um leucse atimi, um imyiapam ra, mika yi ohua neom unyak: 24ek asaig ehelemia ainyak mika, Inyi ti ecispan nitai caig unyak tah irai ra sji ehki eris imyiacaij ra.

25Eris ahced yin natimi is ahinag: is ahidai yin aien, um ika ehele ra, 26El et ham ehelek tah natimi, jam eti amcel vai etman, im risin, im ehgan, im ilpu hal o un, im ilpu etoan, im ilpu atahaig iran, im lep numoh o un, et ehka vai yin nikavaig yi atimi atahaijeg nyak. 27Aien et eti apos nauincai atgeig o un aien, um apitac nyak, et ehka vai yin nikavaig yi atimi atahaijeg nyak. 28Et wat ika tah iramia yi acta neom ijinies, et upyi hup aien um ateucse, um esvi nimtan neom, kit et ahinag niji itai o un, uhpu actaig ehni; 29va yi jim atupun neom aien, jam auatialidi par actaig ehni, eru wit ecetai atimi, erupu imyiafakahcil yin ara asega, 30um ika, Is atupun neom o un natimi ineigki, ja et ehka vai yin nactaig ehni vaig. 31Et wat ika tah natimarid yi ati nedoa vai natimarid et eche, et upyi hup aien um ateucse, um aktaktai, kit et emda aien im natimi et ten dausant o un par aat irai natimarid ineig et imyiham nedoarin aien im natimi et twente dausant o un; 32el et eti emda aien, et wat amen itac acen natimarid iyehki, et abrai ilpu aheca o un aien mika eri apan ara, um ugni yin mika etmu lep eigpa. 33Et idim ucco, aien iramia el et eti ude niji itai asega o un aien, et ehka vai yin nikavaig yi atimi atahaijeg nyak.

34Et upene inmohoanjop: ja el et aiyu inmohoanjop, uhpu lep leh nesgan um uauo? 35et eti upene vai nobohtan, um eti uri naheh; ja era erekhaig pan itac atimi. Aien et eteuc intikgan aien par ahgei itai, etmu atahaijeg aien.

Currently Selected:

Lukas 14: ATY1863

Highlight

Copy