Joanes 4

1Is wat ato a Natimarid, nikavaig, eris atahaijeg a ilpu Farisi mika is leucse ilpu atimi atahaijeg yin is ahinag a Iesu um baptiso ira ra, jam leucse eti elpat a Joanes, 2(ja is eti baptiso ira atimi a Iesu, ilpu atimi atahaijeg yin ache,) 3is ahes Jutaia aien, um atga o un, um lep apan Calili. 4Is ika aien yi ahced an pece Samerya. 5Is apan aien an nuarin-pece is ethi Samerya nidan Saikar, ubutpotet u nuarin nobohtan iyehki is alupai Josef inhal o un a Jekob. 6Is eteuc eahki nehpan wai u Jekob. Is esvi Iesu natgavaig, is um ateuc aien u inwai iyehki: is adiatdiat.

7Is apan a intakata Samerya is ethi alaig athun wai: is um ika ehelen a Iesu, Alumak tah inwai aiek. 8(Eris mun apan a ilpu atimi atahaijeg yin an nuarin-pece mika eri auanimtan nitai caig.) 9Is um ika ehelen a intakata Samerya, Na auri aiek par ugni nyak vai inwai, na upu Jutaia aiek, ja ek takata Samerya ainyak? -- era eti ahum jipe a nupu Jutaia im nupu Samerya. 10Is tas a Iesu, um ika ehelen, El et ato nitai tup ahtai o Atua aiek, im lep yin et ika ehelum aien, Alumak tah inwai aiek; el et ugni yin aiek, el et par alumam inwai umoh aien. 11Is um ika ehelen a intakata iyehki, Ak natimi alupas, eh ti nitai athun wai unyum, et lep ubou nehpan wai: napu leh inwai umoh ineigki aiek eda? 12na esjilid aiek irai Jekob etmaija, ka o’o? is alupai cama nehpan wai ineigki aien, is umwig iran aien, im ilpu hal o un, im kurimatau o un. 13Is tas ehelen a Iesu, um ika, Aien inyi umnyi inwai ineigki aien, etpu lep ahvig wai aien: 14ja aien inyi umnyi inwai ineig aien ekpu aluman ainyak, inyi ti lep ahvig wai aien irai iji mesese; inwai ineigki ekpu aluman ainyak inyi imtanwai anliinmopon, um ahlau ohua sjai nitai umoh iran inyi ti lep ti. 15Is um ika ehelen a intakata iyehki, Ak natimi alupas, alumak inwai ineigki aiek, mika ki ti lep ahvig wai ainyak, um eti lep ham igcaki par athun wai. 16Is um ika ehelen a Iesu, Apan aiek, um ahlaig vai natamnyu unyum, um lep apam igcaki. 17Is tas a intakata iyehki, um ika, Et ti natamnyu unyak. Is ika ehelen a Iesu, Et inivaijec intas unyum, nikavaig, Et ti natamnyu unyak: 18is ikman ilpu atamnyu unyum aiek; aien et amen ehelum aien an naopan ineig, et eti atamnyu unyum aien: na mun asan tas inivaijec aiek. 19Is um ika ehelen a intakata iyehki, Ak natimi alupas, ek ato ainyak, nikavaig, na aprofeta aiek: 20eris alaigaheni an nedoon ineigki a ilpu retpoma; ja eka ika aijaua, eri han alaigaheni Jerusalem ache atimi. 21Is um ika ehelen a Iesu, Ak intakata ineigki, namu eteuc an tas unyak aiek, nikavaig, etpu yetpam naopan iyehki, aku wit eti alaigaheni vai Etmak aijaua an nedoon ineigki, um ucce Jerusalem. 22Eka eti ato nitai ineig aijaua eka alaigaheni vaig aijaua: ecra ato nitai ineig aijama ecra alaigaheni vaig aijama; et ahes ehele nupu Jutaia nitai imyiatamaig atimi. 23Ja etpu yetpam naopan iyehki, et mun idim ham, eru wit alaigaheni anliinmopura um inivaijec vai Etmak a ilpu atimi alaigaheni inivaijec; et merit a Etmak mika yi ucce nedo o ilpu atimi alaigaheni vai yin. 24Et Esgan a Atua: eris idim ika eri alaigaheni vai yin an nesgara um inivaijec a ilpu atimi alaigaheni vai yin. 25Is um ika ehelen a intakata iyehki, Ek ato ainyak, nikavaig, etpu yetpam a Mesia, er anvi nidan par ika Kristo: et wit ham aien, etpu asuptecnaig ehelema aien niji itai asega. 26Is um ika ehelen a Iesu, Ainyak um aigki ek tas ehelum ainyak.

27Is wat tas aien, eris um han ehelen a ilpu atimi atahaijeg yin, um imyiali nedo o un, nikavaig, is tas ehele intakata aien: ja is eti ika tah natimi, Nai merit vanhe aiek? ka, Na auri aiek pah tas ehelen? 28Is ude nipjinitai o un a intakata iyehki um atga o un, um apan an nuarin-pece o un, um ika ehele atimi, 29Apan aijaua, um alum natimi et ethi, et mun asuptecnaig ehelek aien niji itai asega kis mun ago ainyak: kit Kristo neigki? 30Eris ahes an nuarin-pece ura ara, um apan ehelen.

31Eris ugni yin a ilpu atimi atahaijeg yin, um ika, Ak Natimi esege, namu hag aiek. 32Ja is um ika ehele ra aien, Et eteuc nitai caig unyak ainyak, ja eka eti ato aijaua. 33Eris um tas jipe a ilpu atimi atahaijeg yin, um ika, Et mun alaan nitai caig tah natimi, ka o’o? 34Is um ika ehele ra a Iesu, Et itai caig unyak ineigki, nimyiaijivaig intas o un is abrai nyak aien, um lep ago ehni nauritai o un. 35Eka idim ika aijaua, Et wit ti pan itac inmohoc inyi for, etpu yetpam naopan asjapicnaig nohoai itai; ja ek asaig ehelemia ainyak mika, Akumu eas pan irai esgaiimtamia aijaua, um alum eseian; et metto nohoai itai iran an naopan ineig. 36Aien et asjapicnaig nohoai itai aien, et leh nimtan aien, um asjapicnaig nohoai itai va nitai umoh iran ineig inyi ti lep ti: mika eri ehrimyiacitak a ilpu atimi ahapol im ilpu atimi asjapicnaig nohoai itai. 37Et idim inivaijec intas ineigki, nikavaig, Et ahapol natimi et ethi, ja etpu asjapicnaig intak atimi. 38Kis abrai caua ainyak mika aki asjapicnaig nohoai itai aijaua an nuarin ineig akis eti auritai iran aijaua: eris auritai iran intak atimi, ja eka mun yetpan irai auritai ura aijaua.

39Eris asgeig iran a nupu Samerya is ahinag an nuarin-pece iyehki vai intas o intakata iyehki, is ika aien, Et mun asuptecnaig ehelek aien niji itai asega kis ago ainyak. 40Eris yetpan ehelen a nupu Samerya, um ugni yin mika yi amen ehele ra aien: is amen aien eahki an nadiat is ero. 41Eris lep imyiisjis ninivaijec natimi is ahinag vai intas o un ehele ra; 42um ika ehele intakata iyehki, Ecra idim imyiisjis ninivaijec aijama, ja eti vai intas unyum: ecra mun idim atahaijeg intas o un aijama, um ato, nikavaig, et idim Kristo aien, Natimi imyiatamaig nup urai iji pece asega.

43Is wat ti pan itac nadiat is ero, is ahes eahki aien um atga o un, um apan Calili. 44Is idim ika a Iesu, Era eti imyiahpas tah naprofeta a nup uran pece o un. 45Is wat yetpan Calili aien, eris leh yin a nupu Calili, eris ecetai niji itai asega is ago aien Jerusalem u nasjapicnaig: eris lep apan u nasjapicnaig ara. 46Is lep apan Kena a Iesu an pece Calili, eahki is ago waina an wai aien.

Is eteuc natimi alupas is ethi, is emehe inhalav atamaig o un Kaperneum. 47Is wat atahaijeg aien, nikavaig, is ahes Jutaia a Iesu um apan Calili, is apan ehelen aien, um ugni yin mika yi apan aien, um ago cehcehe inhal o un: is ubutpotet o unmas o un aien. 48Is um ika ehelen a Iesu, El eka eti almoi niji auritai ehka aijaua im niji itai imyiali, aki eti imyiisjis ninivaijec aijaua. 49Is um ika ehelen a natimi alupas iyehki, Ak Natimarid, efi apam aiek va yi jim upyi mas a inhal unyak. 50Is um ika ehelen a Iesu, Atga unyum aiek; et mun umoh a inhal unyum. Is um imyiisjis ninivaijec intas o Iesu aien, um atga o un. 51Is wat apan aien, eris aubillid yin a ilpu aheca o un, um asuptecnaig ehelen, um ika, Et mun umoh a inhal unyum. 52Is ahodai ra aien va nuarin-nadiat ineig is umoh iran aien. Eris um ika ehelen ara, Ianiv an nadiatadiat et mun edoaijaig iran nemehe ihlup. 53Is ato a etman mika idim nuarin-nadiat yehkiyehki is asaig ehelen a Iesu, um ika, Et mun umoh a inhal unyum: is imyiisjis ninivaijec aien im lep ra asega an nimnim o un. 54Nehcero ago nauritai ehka o Iesu neigki an nahes o un Jutaia um apan Calili.

Currently Selected:

Joanes 4: ATY1863

Highlight

Copy