Joanes 21

1IS wat ti pan itac nitai iji eigki, is lep ehcohos pan a Iesu ehele ilpu atimi atahaijeg yin u unjop Taibiryas; is ehcohos pan aien is ucce. 2Eris amen an nuarin is ethi a Saimona Pitrus, im Tomas, tak idan Titimus, im Nadanyel nupu Kena an pece Calili, im ohwat hal o Sebetaius, im lep natimi atahaijeg yin is ero is eche. 3Is um ika ehele ra a Saimona Pitrus, Ekpu apok ainyak, um ahilek mu. Eris um ika ehelen ara, Ecri ahced euc aijama. Eris apok ara, um auroauro um aridjai an nelcau; ja eris eti leh tah nitai ara an nepeig iyehki. 4Is wat lahlah an nuhialeg, is aij a Iesu an nohmunjop: ja eris eti ato a ilpu atimi atahaijeg yin, nikavaig, Iesu iyehki. 5Is um ika ehele ra a Iesu, Ak ilpu takuras, eka mun leh numu aijaua, ka o’o? Eris um ika ehelen ara, O’o. 6Is um ika ehele ra aien, Atise nopoig aijaua an matan nelcau, akupu leh aijaua. Eris atise ara, is ehka vai ra nase nopoig vaig vai mu is ahinag. 7Is um ika a natimi atahaijeg yin iyehki, is aiyu inliinmopoi Iesu vai yin, ehele Pitrus, Natimarid mun eigki. Is wat atahaijeg a Saimona Pitrus, nikavaig, Natimarid iyehki, is aso yin aien an napelumai imyiahilek mu, (is ahid lavalava ache aien,) um asuol an jop. 8Eris lep apok an nalvelcau nahaiji ilpu atimi atahaijeg yin, um aihiaig pahai nopoig irai mu; eris ubutpotet u nimtidin ara, is idivaig is wun huntret nesja neduon. 9Eris wat apahai ara, eris eceta incop ara irai humla eahki, im numu eris ahen iran, im nareto. 10Is um ika ehele ra a Iesu, Imyiapam tah numu iji eig eka leh aijaua. 11Is apan a Saimona Pitrus, um aihiaig pahai nopoig, is eucen iran numu alupas, is wun huntret im fifti dri, um ohua: ja is eti ahtamud nopoig numu iji ehki is ahinag. 12Is um ika ehele ra a Iesu, Apam aijaua um hag. Eris imtitaig a ilpu atimi atahaijeg yin asega nahodai yin vaig, um ika, Aiek di aigki? Eris ato ara mika is Atimarid aien. 13Is apan a Iesu, um leh nareto im lep numu, um alaa ra. 14Nehceseij ehcohos pan o Iesu ineigki ehele ilpu atimi atahaijeg yin, an nusjai o un vai inmas o un.

15Eris wat hag ara, is um ika a Iesu ehele Saimona Pitrus, Ak Saimona, inhal o Jonas, et esjilid naiyu u unliinmopom aiek vai nyak irai ra sji eigki, ka o’o? Is um ika ehelen aien, Maiya, ak Natimarid; na ato aiek, nikavaig, et aiyu inliinmopok ainyak vai euc. Is um ika ehelen aien, Alayi hakli siip unyak aiek. 16Is ehcero ika ehelen aien, Ak Saimona, inhal o Jonas, et aiyu inliinmopom aiek vai nyak, ka o’o? Is um ika ehelen aien, Maiya, ak Natimarid; na ato aiek, nikavaig, et aiyu inliinmopok ainyak vai euc. Is um ika ehelen aien, Aminjinaig siip unyak aiek. 17Is ehceseij ika ehelen aien, Ak Saimona, inhal o Jonas, et aiyu inliinmopom aiek vai nyak, ka o’o? Is ohocred a Pitrus vai intas o un, nikavaig, is ehceseij ahodai yin aien, um ika, Et aiyu inliinmopom aiek vai nyak, ka o’o? Is um ika ehelen aien, Ak Natimarid, na ato niji itai asega aiek; na ato aiek, nikavaig, et aiyu inliinmopok ainyak vai euc. Is um ika ehelen a Iesu, Alayi siip unyak aiek: 18et idim inivaijec ineig ek asaig ehelum ainyak mika, As wat takuras aiek, as ahid napelumai unyum aiek, um apan an nuarin ineig as merit vaig aiek: ja na wit efatimi aiek, napu atgeig yapidi nikmam aiek, etpu ahid napelumai unyum intak atimi, um imyiapan euc an nuarin ineig na eti merit vaig aiek. 19Is asan tas ineigki aien par asuptecnaig nedo vai inmas o un ineig etpu imyiahpas Atua vaig aien. Is asan tas ineigki aien, ja par ika ehelen, Apitac nyak aiek. 20Is ahidai yin a Pitrus, um alum natimi atahaijeg Iesu iyehki, is aiyu inliinmopon aien vai yin, napitac yin vaig; aien aigki is asgeig an ritin aien u inhag iyehki, um lep ika, Ak Natimarid, etpu aniv euc a di? 21Is wat alum yin a Pitrus, is ika ehele Iesu aien, Ak Natimarid, inyi auri natimi ineigki? 22Is um ika ehelen a Iesu, El ek merit ainyak mika yi aitgaig napam unyak aien, tup ainyak marom; namu apitac nyak aiek. 23Is apaahni intas ineigki ehele ilpu etoan, mika inyi ti mas natimi atahaijeg yin iyehki: ja is eti ika ehelen a Iesu, Inyi ti mas aien; ja, El ek merit ainyak mika yi aitgaig napam unyak aien, tup ainyak marom. 24Et asuptecnaig nitai iji eigki a natimi atahaijeg Iesu iyehki, um lep aged nitai iji eigki: ecra ato aijama nikavaig, et inivaijec nasuptecnaig o un.

25IS lep ago niji itai is ahinag is eche a Iesu, el eh aged niji itai asega, ek ika ainyak, inyi idim tintin nobohtan inlehvaig nitasvitai iji eig er aged. Emen.

Currently Selected:

Joanes 21: ATY1863

Highlight

Copy