Joanes 16

1EK mun asuptecnaig nitai iji eigki ehelemia ainyak, va aki jim epihtau aijaua. 2Erupu ahlo caua ara irai eom alaigaheni ura: etpu lep yetpam naopan iyehki eru wit atgei caua atimi, um aktaktai mika er ago nauritai o Atua. 3Erupu ago nitai iji eigki iramia ara, va nitai ineigki, nikavaig, era eti ato Etmak ara, im lep nyak. 4Ja ek mun asupecnaig nitai iji eigki ehelemia ainyak, mika, et wit yetpam naopan iyehki, aki imyiehva aijaua intas unyak ehelemia. Kis eti fi asuptecnaig nitai iji eigki ehelemia ainyak itu acen, va namen unyak ehelemia: 5ja inki apan ainyak an naopan ineig ehelen is abrai nyak aien; ja et eti ahodai nyak tah caua, um ika, An han eda aiek? 6Ja et ohocred esjilid inliinmopomia aijaua vai intas iji eigki kis asaig ehelemia ainyak: 7ja ek asaig intas inivaijec ehelemia ainyak; Et upene vai caua mika ki apan ainyak: el ek eti apan ainyak, inyi ti yetpam ehelemia a Natimi atau iramia; ja el ek apan ainyak, ekpu abraig pam yin ainyak ehelemia. 8Et wit ham aien, etpu asuptecnaig nedo has an nobohtan aien, im lep nedo atoh, im lep neru va nedo has: 9nedo has, va nitai ineig, nikavaig, era eti asgeig irak ara; 10im nedo atoh, va nitai ineig, nikavaig, ekpu apan ehele Etmak ainyak, akupu eti lep ecet nyak aijaua; 11im neru va nedo has, va nitai ineig, nikavaig, eh mun aru irai natimarid an nobohtan ineigki.

12Ek lep merit ainyak nasuptecnaigvaig ehelemia niji itai et ahinag, ja eka auatialidi aijaua inlehvaig an naopan ineig: 13ja et wit ham a Nesgan inivaijec, etpu atau iramia aien irai itai inivaijec asega: inyi eti ispun tas aien; ja etpu esege nitai iji eigki aien et atahaijeg aien: etpu lep asuptecnaig ehelemia aien nitai iji eigki etpu yetpam: 14etpu ehvai natimi alupas unyak aien: etpu lep leh niji itai unyak aien, um asuptecnaig ehelemia. 15Et unyak niji itai asega ehele Etmak: va nitai ineigki, ek mun asaig ainyak, mika etpu leh niji itai unyak aien, um asuptecnaig ehelemia. 16Akupu eti ecet nyak aijaua tupko; ja par lep ecet nyak tupko, va nitai ineigki, nikavaig, ekpu apan ehele Etmak ainyak. 17Eris tas jipe a ilpu ahaiji atimi atahaijeg yin, um ika, Inhe ineigki et asaig eheleija aien mika, Akupu eti ecet nyak aijaua tupko; ja par lep ecet nyak tupko: va nitai ineigki, nikavaig, ekpu apan ehele Etmak ainyak? 18Eris ika ara, Inhe ineigki et asaig aien mika, Tupko? Inta eti ato akaija intas ineig et asaig aien. 19Is ato a Iesu mika eris merit ara nahodai yin vaig, is ika ehele ra aien, Eka mun tas jipe ehelemia aijaua, ka o’o, vai intas ineig ek mun asaig ainyak mika, Akupu eti lep ecet nyak aijaua tupko; ja par lep ecet nyak tupko? 20Et idim inivaijec ineig ek asaig ehelemia ainyak mika, Akupu ehtigtaig aijaua um imyitaig nyak, ja erupu idim imyiacitak natimi an nobohtan: akupu ohocred aijaua, ja par lep imyiacitak. 21Et ohocred intakata an nikavaig yi apos inhal o un: ja et wat apos yin aien, et eti lep imyiehva nohocred o un aien, va nimyiacitak o un va naposvaig natimi an nobohtan: 22eka ohocred aijaua an naopan ineig: ja ekpu lep ateghe caua ainyak, etpu imyiacitak inliinmopomia aijaua, inyi ti atipagki nimyiacitak unyimia tah natimi. 23Aki eti ahodai nyak vaig tah nitai aijaua an naopan iyehki. Et idim inivaijec ineig ek asaig ehelemia ainyak mika, Etpu alupai caua nitai iji eigki a Etmak, eka ugni yin vaig aijaua an nidak. 24Akis eti ugni tah nitai an nidak aijaua: akumu ugni aijaua, akupu leh aijaua, va etpu esjilid nimyiacitak unyimia. 25Kis esege nitai iji eigki imi caua ainyak um ecsipece iran: ja etpu yetpam naopan iyehki, inki eti lep ecsipece iran ehelemia ainyak, ja ekpu asuptecnaig upene Etmak ehelemia ainyak. 26Akupu ugni itai aijaua an nidak an naopan iyehki: ek eti ika ehelemia ainyak, ekpu ugni Etmak ainyak vai caua: 27et idim aiyu inliinmopoi Etmak vai caua, va nitai ineig, nikavaig, et aiyu inliinmopomia aijaua vai nyak, um lep imyiisjis ninivaijec mika kis ahes ehele Atua ainyak. 28Kis ahes ehele Etmak ainyak, um ham an nobohtan: ekpu lep ude nobohtan ainyak, um apan ehele Etmak.

29Eris um ika ehelen a ilpu atimi atahaijeg yin, Na idim asuptecnaig upene aiek an naopan ineig, um eti ecsipece iran: 30ecra ato aijama an naopan ineig, mika na tup ispum ato niji itai asega aiek, um eti ika yi pu ahodai euc tah natimi: va nitai ineigki, ecra imyiisjis ninivaijec aijama mika as ahes ehele Atua aiek. 31Is um ika a Iesu ehele ra, Eka imyiisjis ninivaijec aijaua an naopan ineig, ka o’o? 32Etpu idim yetpam naopan iyehki, maiya, et mun yetpam an naopan ineig, akupu terimterim aijaua asega, um apan irai imnim unyimia, um ude nyak: ja ek eti echim amen ainyak, et idim amen ehelek a Etmak. 33Ek mun asuptecnaig nitai iji eigki ehelemia ainyak, mika yi eigpa inliinmopomia aijaua vai nyak. Akupu ohocred aijaua an nobohtan: jam jim auatialidi; ek esjilid ainyak ira atimi an nobohtan.

Currently Selected:

Joanes 16: ATY1863

Highlight

Copy