Marko 3

A̱ti̱ri̱z Ye̱su̱ e̱e̱t ci arude a̱zzi̱ti̱

(Ma̱te̱yo̱ 12:9-14; Lu̱ka̱ 6:6-11)

1Imma i̱i̱te̱n imma baling okko Ye̱su̱ Ce̱e̱ze̱ wa Lawinto, aave da̱ e̱e̱ti̱ ci arude a̱zzi̱ti̱ nginati. 2Ma̱i̱je̱ ol uggak ne̱k aavtte nginati ke̱ orong gool ci kar kovolongte Ye̱su̱ ming abac gi̱i̱ imma, atangamttek zin nege nonno oroot, ming a̱ti̱ri̱z Ye̱su̱ e̱e̱t neci arude a̱zzi̱ti̱ ke̱ I̱i̱te̱ne̱ wa Yu̱bze̱nto̱. 3Izek zin Ye̱su̱ e̱e̱t neci arude a̱zzi̱ti̱ ke̱ ne, “Bil je̱e̱na̱ ngu̱me̱ ci ollu veelek.”

4I̱jji̱n zin Ye̱su̱ nogo izek ne, “Gi̱i̱ jang ci a̱du̱wa̱ lo̱ti̱nno̱wa̱ cik abunna I̱i̱te̱ne̱ wa Yu̱bze̱nto̱: Ku̱tu̱gu̱ gi̱i̱ ci abunna yo icima ku̱tu̱gu̱ mu̱nye̱n, ka̱ti̱ri̱z ol kuruget icima kanyike ol ka̱da̱i̱to̱ I̱i̱te̱ne̱ wa Yu̱bze̱nto̱?” Abarik ijakce nege li̱i̱m.

5Egelem Ye̱su̱ nogo mozinta, u̱u̱c nonno zinin oroot zo̱ze̱ ci gerze anyak nege zi̱nze̱tti̱nne̱ ko̱, kar zin kizek e̱e̱t neci ne, “Zolan a̱zzi̱t cunne.” Ozolan zin e̱e̱ti̱ neci a̱zzi̱t, ubunna zin nonno a̱zzi̱ti̱. 6Oot zin olli Varacis reena akate orongit ki olli alaan He̱ro̱di̱ gool ci kar ku̱ru̱kte̱ Ye̱su̱ ka̱da̱k.

Annu koole ci a̱ppwe̱ Ye̱su̱

7Baling ovvo Ye̱su̱ ki nuyak waginnek nyatapara, unuwet zin koole cik meelek lo̱o̱ce̱ ci Ga̱li̱li̱ nogo vu̱rrta̱. 8Ma baling iziyyet nege kaal cik ogon Ye̱su̱ ko̱ do̱o̱k, i̱vi̱tta̱k ol cik meelek lo̱o̱ce̱ ci Ju̱de̱ya̱ ki orog ci Jerusalemi ko̱ nonno. A̱vvu̱ ol bo̱do̱k lo̱o̱ce̱ ci Idumea, ki lo̱o̱cco̱k cik ti̱ti̱me̱ ci moro ci Jordani ki o̱ro̱gjo̱k cik een Tyre ki Sidon. 9Ma̱rri̱t ming a̱ppwa̱ koole, u̱du̱wa̱k enne nuyak waginnek kanyaktak nonno i̱bo̱ cidici kize ojon, kar kalam ol ngati amunye nonno. 10Eci enne angaru ol cik meelek giir mo̱ri̱zo̱we̱, iyota zin ol wak anyak mo̱ri̱zzo̱k e̱le̱tti̱ne̱ orongit ku̱u̱me̱t nonno. 11Ming acin ol wak anyak kuulo wak miningu ko̱ nonno, uduwet zin lo̱o̱c kar kegerenyit kizeto ne, “E̱e̱ni̱ i̱nna̱ Ngerrti Ta̱mu̱ta̱dde̱no̱.” 12Abarik Ye̱su̱ u̱du̱wa̱k ol wak anyak kuulo ko̱ zoz ci okkomi, “Ma a̱du̱wa̱nnu̱ ke̱e̱ni̱ anna ngene.”

Atahala Ye̱su̱ to̱ni̱a̱k omoto ki rama

(Ma̱te̱yo̱ 10:1-4; Lu̱ka̱ 6:12-16)

13Ottod Ye̱su̱ bee kar kutu demezyak wak orong enne, kar zin nege ki̱vi̱ta̱k nonno. 14Atahala zin Ta̱mu̱ta̱dde̱n to̱ni̱a̱k#3:14 To̱ni̱a̱k: E̱e̱ggi̱n ol ne̱ko̱ cik i̱tto̱n Ye̱su̱ doize cinne kar koot ke̱de̱me̱zi̱t ol zoz cinne kar bo̱do̱k kanyik nogo doiz ci otowe nege kuulo cik lo̱rye̱nta̱k kar kangaruc ol mo̱ri̱zo̱we̱ bu̱k. omoto ki rama kar kizeto ciginnek, kar gon korkorrit ki nogo, kar gon ki̱tto̱n nogo koot kuwaktek ol zoz ci Ta̱mu̱ta̱dde̱no̱, 15kar kanyait komiz ci ottowe nege kuulo cik lo̱rye̱nta̱k olle. 16E̱e̱ggi̱n ne̱ko̱ to̱ni̱a̱k wak atahala Ye̱su̱ ko̱: Si̱mo̱ne̱ (wa akannek bo̱do̱k enne zar cik een Peturu); 17Je̱mi̱s ngerrti Zebedee ki gotoni wa een Jon (wak anyik enne nogo zar wak een Borgenec, azi keng cinne ne dooli cik borowoco); 18ki Andereya, ki Vilip, ki Bartolomeyo, ki Ma̱te̱yo̱, ki Tomas, ki Je̱mi̱s ngerrti Alipeyo, ki Taudesio, ki Si̱mo̱ne̱ wa amarine gaala wak Romi, 19ki Judas Iskariyot bali adawa Ye̱su̱ ke̱.

Ye̱su̱ ki Beelzebub alaan ci kuulou

(Ma̱te̱yo̱ 12:22-32; Lu̱ka̱ 11:14-23; 12:10)

20I̱tto̱ zin Ye̱su̱ ce̱e̱z imma, kar bo̱do̱k koole ku̱lu̱te̱, ki̱zzi̱ gool to ci adaine enne ki nuyak ciginnek. 21Baling iziyyet boor co Ye̱su̱ gi̱i̱ ci ogon enne ko̱, oot nege ngatinne orongit kanyaktak nonno ce̱e̱z, eci azi nege ne, “I̱pi̱ye̱ nonno oo.”

22Imma de̱me̱zzo̱wa̱ wak lo̱ti̱nno̱k wak Musesi balik a̱vvu̱ Jerusalema izeto ne, “Anyak enne Beelzebub#3:22 Beelzebub: Een Beelzebub zar u̱gge̱ cik Sitan lo̱rye̱ni̱t wa een alaan ci anjilonyau wak bali abure Ta̱mu̱ta̱dde̱no̱ ta̱mu̱-kenga, kar Ta̱mu̱ta̱dde̱n kottowak nogo lo̱o̱c. I̱vi̱ta̱ zin anjilonya ne̱ko̱ izeto kuulo lo̱o̱ta̱ ngatu. IkebO̱no̱zzo̱k 12:7-9. wa a̱ddi̱ki̱re̱! Ottok enne kuulo komize ci lo̱rye̱nto̱ wa een alaan ci kuulou.”

23Utuwa zin Ye̱su̱ nogo kar zin kozozik nogo yabzinta, izek ne, “Ottok wo̱ye̱ Sitani Sitan ku̱? 24Ming oyoho alaanzet ecito, iróng alaanzet neci abile. 25Ming oyoho ol ce̱e̱za̱ ecito, iróng ce̱e̱z neci abile. 26Ming adang Sitani gonoggi, kar bo̱do̱k kengerit e̱le̱tti̱, iróng wo̱ye̱ nege angida; uṯurehe alaanzet cinne̱ng. 27Een de̱de̱, iróng wo̱ye̱ e̱e̱ti̱ imma i̱i̱zo̱ ce̱e̱z ci e̱e̱t ci okkomi kar kodong i̱jjo̱ cik e̱e̱t neci, orong arrak enne keceb manyi ce̱e̱z, kar kogoroz ce̱e̱z neci. 28Ka̱du̱wa̱kku̱ng zoz ci een de̱de̱, alalnek atin Ta̱mu̱ta̱dde̱n mu̱nye̱n cik ollu ki zoz ci odome nege Ta̱mu̱ta̱dde̱n. 29Ma̱i̱je̱ e̱e̱ti̱ ci odom Vongiz ci A̱li̱le̱, iróng Ta̱mu̱ta̱dde̱n, alalnek nonno mu̱nye̱n, abac enne mu̱nye̱n cik ovvo udut.”

30U̱du̱wa̱ enne zoz necu eci ol izeto ne, “Anyak enne kuulo cik lo̱rye̱nta̱k.”

Gotonoggi Ye̱su̱ ki yaatinne

(Ma̱te̱yo̱ 12:46-50; Lu̱ka̱ 8:19-21)

31A̱ra̱yya̱ zin gotonoggi Ye̱su̱ ki yaatinne. Ibilet zin reena, i̱tto̱ni̱t zin e̱e̱t imma kar kutu nonno. 32Aburuk da̱ koole nonno ngati aavtte lo̱o̱ta̱, kar ku̱du̱kta̱k nonno, “Aavtte ciko yaatunne ki gotonoggu ki ngonoggu reena, orong kicinti i̱nne̱ta̱.”

33I̱jji̱n zin enne nogo, “Ngene ci een yaatanni ki ciko ngene cik e̱e̱ggi̱n gotonogga?”

34Kar zin enne kicin ol wak aavtte lo̱o̱ta̱ aburuk nonno ko̱, kar zin ize ne, “E̱e̱ggi̱n ne̱ko̱ yaatanni ki gotonogga! 35Ming ogon e̱e̱ti̱ zoz ci orong Ta̱mu̱ta̱dde̱n, een enne gotona ki ngoona ki yaatanni.”

Currently Selected:

Marko 3: tex

Highlight

Copy