Lu̱ka̱ 8

Ngaai cik annu Ye̱su̱

1Imma bali vu̱rrta̱, eron Ye̱su̱ owo o̱ro̱gjo̱we̱, uwahek ol kaviyak cik abunna ba̱a̱li̱nte̱ ci Ta̱mu̱ta̱dde̱no̱. Orkor enne ki nuyak waginnek omoto ki rama, 2ki ngaai u̱gge̱, kar bo̱do̱k enne kaara ngati ngaai ne̱ko̱ u̱gge̱ kuulo cik lo̱rye̱nta̱k ki mo̱ri̱zzo̱k u̱gge̱: Ma̱ri̱ya̱ wa een zara uggak Madalina aara Ye̱su̱ ngatinne kuulo turgerem cik iyowa ngatinne; 3ki Joanna, ngaa ci Cuza wa een karan ci ce̱e̱z ci He̱ro̱di̱; ki Susanna; ki bo̱do̱k ngaai u̱gge̱ cik meelek. Eela ngaai ne̱ko̱ nogo kaale cigge̱k.

Tubzenet ci e̱e̱t ci arire

(Ma̱te̱yo̱ 13:1-9; Marko 4:1-9)

4Baling ngen ol alutai o̱ro̱gjo̱we̱ ovvo acin Ye̱su̱, u̱du̱wa̱k zin enne nogo tubzenet cu: 5“Okko e̱e̱ti̱ ci e̱e̱vye̱ okko arir ma̱na̱ cinne. Baling okko enne azacek i̱nyo̱mo̱, itazak i̱nyo̱mo̱na̱ uggak gool; kar zin ol korocit zoone, kar iballi cik ta̱mu̱-kengo keberta ne̱ke̱. 6Itazak i̱nyo̱mo̱na̱ uggak nginti een biyen, baling ovvo alize, ataman niko a̱da̱i̱to̱, eci i̱llo̱i̱ zizi. 7Ovvo i̱nyo̱mo̱na̱ uggak i̱i̱na̱k nginti een biila, i̱ti̱li̱za̱ zin ki biila nga̱to̱de̱ kar kadalit nogo ci iróng ngen a̱bbi̱re̱. 8Itazak bo̱do̱k i̱nyo̱mo̱na̱ uggak nginti een to̱ri̱cto̱. Itingazzo i̱nyo̱mo̱na̱ ne̱ko̱ ki̱bbi̱re̱to̱ ju̱rru̱m kommogit balik arir nege ke̱.”

Baling u̱du̱wa̱ enne tubzenet necu, kar kize ne, “Ming anyak e̱e̱ti̱ iin cik aziknene, anyik nonno kiziyo.”

Ozoz Ye̱su̱ nga̱ri̱de̱te̱ nya

(Ma̱te̱yo̱ 13:10-17; Marko 4:10-12)

9I̱jji̱nne̱t zin nuyaha ciginnek keng ci tubzenet neci. 10O̱bo̱de̱k zin enne, “Anyoziung i̱ge̱t genyizi ci zoz ci a̱lu̱gnye̱ ko̱ ba̱a̱li̱nte̱ ci Ta̱mu̱ta̱dde̱no̱, ma̱i̱je̱ ngati ol u̱gge̱ kozozi anna tubzenta, kar zin,

“‘ming acine nege nu̱nu̱n, iróng wo̱ye̱ nege acine;

ming aziye nege nu̱nu̱n, iróng wo̱ye̱ nege a̱gga̱.’#Isaya 6:9

A̱du̱wa̱ Ye̱su̱ keng ci tubzento

(Ma̱te̱yo̱ 13:18-23; Marko 4:13-20)

11“Icu keng ci tubzento: E̱e̱ggi̱n i̱nyo̱mo̱na̱ zoz ci Ta̱mu̱ta̱dde̱no̱. 12Ovvo i̱nyo̱mo̱na̱ ne̱k i̱i̱na̱k gool ko̱, ogon nege ki ol cik aziye zoz ci Ta̱mu̱ta̱dde̱no̱, kar zin lo̱rye̱nti̱ ki̱ki̱ya̱ kogoroz zoz zi̱nze̱tti̱nne̱ cigge̱k, kar atin iróng nege a̱tu̱we̱ icima amuda ti̱ri̱ze̱ne̱t. 13Imma i̱nyo̱mo̱na̱ ne̱k i̱i̱na̱k biyen ko̱, ogon nege ki ol wak a̱gga̱ma̱ zoz talninta ming ovvo nege aziye, ma̱i̱je̱ ngatu iróng nege anyak egero. A̱tu̱we̱ arrak nege do̱yo̱i̱t, imma i̱i̱te̱n ci amuda nege timaninet, utungtek zin zoz neci lo̱o̱c. 14Imma i̱nyo̱mo̱na̱ ne̱k i̱i̱na̱k biila ko̱, atubo ki ol wak aziye zoz ci Ta̱mu̱ta̱dde̱no̱ kar ming ovvo nege ovvo gool cinne̱ng, adal nogo no̱ngi̱tto̱na̱ cik baizo, i̱tto̱kze̱t ki zoz ci adahe ol botorzet, iróng nege ngen anyaha o̱ya̱u̱ cik abunna. 15Imma i̱nyo̱mo̱na̱ ne̱k i̱i̱na̱k nginti een to̱ri̱c ko̱, atubo ki ol cik aziye zoz ci Ta̱mu̱ta̱dde̱no̱ ju̱rru̱m kar bo̱do̱k kanyait zi̱nze̱tti̱ cik abunna, aziye zoz ci Ta̱mu̱ta̱dde̱no̱, a̱gga̱ zin, kar ngati a̱gga̱me̱ anyaha o̱ya̱u̱ cik abunna.

Tukulec ci abile

(Marko 4:21-25)

16“I̱llo̱i̱ e̱e̱t imma ci alanycek tukulec kar karik í̱jjó̱ icima arike kwe̱e̱n ecito. Abarik arike enne tukulec nginti abilne tukuleci, kar ol ne̱k i̱i̱zo̱ ce̱e̱z kicinnet tukulec. 17Eci i̱llo̱i̱ gi̱i̱ imma ci a̱lu̱gnye̱ ci iróng atin i̱ye̱la̱i̱, kar i̱llo̱i̱ gi̱i̱ ci alamnye ci atin iróng a̱gga̱ye̱ icima anyakcai re̱e̱nu̱n. 18I̱yo̱ko̱ zin, a̱gga̱c zin ju̱rru̱m gool ci aziknenu niga zoz ci Ta̱mu̱ta̱dde̱no̱ ku̱. Ming anyak e̱e̱ti̱ imma, anyonik atin nonno cik meelek; ming iróng e̱e̱ti̱ imma anyak, a̱gga̱mnya̱i̱ atin rok ne̱k i̱no̱n enne azi ne anyai cidici ko̱.”

E̱e̱ti̱ Ye̱su̱ ki Gotonoggi

(Ma̱te̱yo̱ 12:46-50; Marko 3:31-35)

19I̱yo̱ko̱ i̱ki̱ya̱ e̱e̱ti̱ Ye̱su̱ ki gotonoggi ovvo acin nonno, iróng nege amuda gool ci kar koot ojonun ngatinne eci a̱ppwa̱ koole. 20U̱du̱wa̱k zin e̱e̱ti̱ imma nonno, “Aave yaatunne ki gotonoggu reena, orong kicintin.”

21O̱bo̱de̱k zin enne, “Een yaatanni ki gotonogga ol wak aziye zoz ci Ta̱mu̱ta̱dde̱no̱ kar ki̱li̱ngli̱ngte̱ zoz neci.”

A̱ti̱va̱n Ye̱su̱ ngoot

(Ma̱te̱yo̱ 8:23-27; Marko 4:35-41)

22Anyak i̱i̱te̱n imma ci a̱nne̱k Ye̱su̱ nuyak waginnek ne, “Koo ti̱ti̱me̱ co̱de̱ nyatapara.” I̱tto̱zzo̱ zin i̱bo̱ kar zin kamarucet maam. 23Baling ngen nege amaruc i̱bo̱ maame, a̱gga̱mtta̱ Ye̱su̱ ungnyaha. I̱ki̱ya̱ zin ngooti ci a̱ppwe̱ u̱vu̱wa̱n maam kapalpalanek i̱bo̱, a̱vvu̱to̱ nege ngati gerze oroot.

24Oot zin nuyaha i̱ti̱ngka̱c nonno, kar zin kizettek ne, “Manyi, Manyi, koot naga kutududdewa!”

Itinga zin enne je̱e̱na̱ kar kegerenyek ngoot ki maam cik apalpalane ko̱; i̱mi̱re̱ zin tawani ize idica, kar ka̱vvu̱ dee. 25I̱jji̱n zin enne nuyak ciginnek, “Aave tu̱we̱ne̱t cinno̱ng nga?”

Kar ngati o̱ngo̱o̱li̱nne̱ nege eci zoz ci a̱ku̱le̱k nege je̱e̱n ko̱, i̱jji̱nto̱ zin nege do̱ e̱le̱tti̱ne̱, “Ngene dim icu? Abiliz enne rok ngoot ki maam cik apalpalane, kar nege kiziyet zoz cinne.”

Angaru Ye̱su̱ e̱e̱t ci anyak kuulo cik lo̱rye̱nta̱k

(Ma̱te̱yo̱ 8:28-34; Marko 5:1-20)

26Oot zin nege i̱bo̱wa̱ rok lo̱o̱c ci Gerasenes, ci aave nyatapare ci Ga̱li̱li̱ ti̱ti̱me̱ co̱de̱ ke̱. 27Baling a̱vvu̱ Ye̱su̱ ti̱ti̱ma̱, u̱ru̱me̱k zin e̱e̱ti̱ ci a̱kku̱ orgato ci anyak kuulo cik lo̱rye̱nta̱k nonno gool. Iróng da̱ e̱e̱ti̱ neci aim ru̱u̱m e̱rki̱nya̱ cik meelek icima abak ce̱e̱za̱, abarik abak enne ilomete. 28Baling icin enne Ye̱su̱, u̱tu̱lu̱ kar zin ku̱yu̱we̱ zoone ciginnek, egereny muluwe ci a̱ppwe̱ oroot, “Orongi i̱nna̱ nya ngatinanni, Ye̱su̱, Ngerrti Ta̱mu̱ta̱dde̱n wa aave Ta̱dde̱na̱? Kilaleki anna i̱nne̱ta̱, ma edeza annita!” 29Ottok zin Ye̱su̱ kuulo koot twa̱ ngati e̱e̱t neci. Aminye da̱ gon kuulo nonno, ming nu̱nu̱n e̱ce̱bje̱ azzina ki zo̱o̱ ciginnek kar bo̱do̱k kebehe, a̱du̱l enne didita kar kuulo kuwe nonno ngati aave enne do̱.

30I̱jji̱n zin Ye̱su̱ nonno, “Zar cigunnek ngene?”

O̱bo̱de̱k zin enne “Koole,” eci i̱tto̱zzo̱ kuulo cik meelek nonno. 31Ilalttek zin kuulo ne̱ke̱ Ye̱su̱ gerza ming ottok nogo koot lo̱o̱wa̱.

32Anyak da̱ batakwa cik meelek ege biya abanyca. Ilalttek zin kuulo ne̱ke̱ Ye̱su̱ abunna ming anyik nogo ki̱tto̱zo̱ batakwa ne̱ke̱, elema zin Ye̱su̱. 33Baling iyokta kuulo cik lo̱rye̱nta̱k ngati e̱e̱t neci, i̱tto̱zzo̱ batakwa, kar zin batakwana ki̱vi̱re̱t koot zi̱la̱ itazak nyatapar kutuddudde veelek.

34Baling icinnet tuwayowa zoz ci ogone ko̱, i̱vi̱re̱t oot u̱du̱kta̱k ol zoz necu orgato, 35kar ol koot kicinnet gi̱i̱ ci ogone ko̱. Baling i̱vi̱tta̱k nege Ye̱su̱, urubta e̱e̱t bali iyowa kuulo cik lo̱rye̱nta̱k ngatinne ke̱, ming aave ojonun zoone cik Ye̱su̱, aime ju̱rru̱m, abunna oo; kar nege ko̱to̱ngo̱o̱ltte̱. 36Imma ol balik icinnet ke̱ u̱du̱kta̱k ol ottok Ye̱su̱ kuuloc ci lo̱rye̱nto̱ ngati e̱e̱t neci kar enne kubunna. 37I̱jji̱nne̱t zin ol do̱o̱k cik lo̱o̱c ci Gerasenes Ye̱su̱ anyik kutungek lo̱o̱c cinne̱ng lo̱o̱c, eci nege o̱to̱ngo̱o̱ltte̱ lo̱o̱c oroot. Ottod zin enne i̱bo̱ orong kuk.

38Itinga zin e̱e̱ti̱ wanai iyowane kuulo cik lo̱rye̱nta̱k ngatinne ke̱, ilalek Ye̱su̱ orong korkorrit ki nonno, ma̱i̱je̱ Ye̱su̱ i̱tto̱n nonno kuk orgato, a̱nne̱k ne, 39“Mi̱re̱ bit ce̱e̱za̱ kar du̱wa̱k ol gi̱i̱ ci ogoniki Ta̱mu̱ta̱dde̱n i̱nne̱ta̱.” Uk zin enne reena kar ku̱du̱wa̱k ol orgato do̱o̱k gi̱i̱ ci u̱tu̱gu̱we̱k Ye̱su̱ nonno.

Do̱le̱c ci nga̱a̱ye̱ a̱da̱ha̱ ki ngaa ci omori

(Ma̱te̱yo̱ 9:18-26; Marko 5:21-43)

40I̱yo̱ko̱ baling oboda Ye̱su̱ ti̱ti̱me̱ co̱de̱ nyatapara, ivata zin koole nonno, eci bali nege ere nonno. 41I̱ki̱ya̱ zin e̱e̱ti̱ ci azi zar ne Jairus, ddi̱ki̱ryo̱i̱t ci Ce̱e̱z wa Lawinto, a̱kku̱ ki̱ki̱ya̱ akatek u̱zu̱ngtti̱ lo̱o̱c zoone cik Ye̱su̱, ilalek nonno abunna enne ming a̱kku̱ rok ce̱e̱z cinne, 42eci buweenyinne ci o̱de̱ ṯok, een e̱rki̱nya̱ omoto ki ram, ize daizoit.

Baling okko Ye̱su̱ goola, orongit abarik koole kiyotit nonno. 43Kar nginati anyak ngaa ci ibborye keng e̱rki̱nya̱ omoto ki rama, abarik i̱llo̱i̱ e̱e̱t imma ci angaru nonno. 44Uk enne bo̱i̱ce̱ ci Ye̱su̱ kar ku̱u̱m ru̱u̱m cinne, ibilet zin bi̱ye̱ta̱ ciginnek ataman niko.

45I̱jji̱nno̱ zin Ye̱su̱, “Ngene ci u̱u̱mnya̱ annita?”

Baling imigtoi nege do̱o̱k, ize zin Peturu ne, “Manyi, amunyo ol do̱o̱k orong ki̱vi̱ta̱i̱ i̱nne̱ta̱.”

46Ma̱i̱je̱ Ye̱su̱ ize ne, “U̱u̱ma̱ e̱e̱ti̱ imma annita; ka̱gga̱ anna iyowa doizi ngatinanni.”

47Kar zin ngaa kicin niko, ovvo atidic ol a̱gga̱ nonno, i̱ki̱ya̱ a̱bba̱ri̱t kar ku̱yu̱we̱ zoone cik Ye̱su̱. Kar zin enne kozoz orgene ci ollu do̱o̱k, nya ming u̱u̱m enne ru̱u̱m cinne ko̱ kar enne kubunna niko. 48Izek zin Ye̱su̱ nonno ne, “Do̱le̱c, angaruwi i̱nne̱t tu̱we̱ne̱t cunne. Bit yahe.”

49Baling ngen Ye̱su̱ ozozi, i̱ki̱ya̱ e̱e̱ti̱ imma ce̱e̱ze̱ ci Jairusi, ddi̱ki̱ryo̱i̱t ci Ce̱e̱z wa Lawinto. Kar enne ku̱du̱wa̱k Jairus kize ne, “A̱da̱k buweenyunne. Ma ngen azuca de̱me̱zo̱i̱t gaganiko.”

50Baling izik Ye̱su̱ zoz necu, izek enne Jairus ne, “Ma o̱ngo̱o̱le̱ gi̱i̱ imma; nyak tu̱we̱ne̱t, okko enne abunna.”

51Baling arawa Ye̱su̱ ce̱e̱z ci Jairusi, iróng zin enne ngen aanyik e̱e̱t imma ki̱tto̱ ki nonno, elemi Peturu, ki Jon ki Je̱mi̱s ki be̱e̱ti̱ do̱le̱co̱ ki yaatinne do̱ niko. 52Kar arrak do̱yo̱i̱t niko, a̱lu̱we̱k ol do̱o̱k nonno. Ize Ye̱su̱ ne, “Ibilte u̱lu̱wa̱, ngen enne ka̱da̱k abarik adunge.”

53Atarate nege nonno, eci a̱gga̱ nege a̱da̱k enne la̱du̱n. 54A̱gga̱m zin Ye̱su̱ a̱zzi̱t ci do̱le̱c bali a̱da̱k ke̱, kar kize ne, “Do̱le̱c cinanni, tinga je̱e̱na̱!” 55Oboda zin vongizi cinne, kar lak co̱de̱ itinga zin enne je̱e̱na̱. U̱du̱wa̱k zin Ye̱su̱ nogo kar anycik nonno gi̱i̱ kar kadak. 56A̱ma̱li̱ltte̱ zin yaatinne ki baatinne o̱o̱tti̱, ma̱i̱je̱ enne a̱nne̱k nogo ne, ma a̱du̱wa̱kku̱ e̱e̱t imma zoz ci ogone ko̱.

Currently Selected:

Lu̱ka̱ 8: tex

Highlight

Copy